مجمع الزوائد ومنبع الفوائد

سیدنا عمر رضی اللہ عنہ بیان کرتے ہیں : نبی اکرم صلی اللہ علیہ وسلم کی ازواج کے بارے میں ذکر کیا گیا کہ وہ کتنا دامن لٹکا سکتی ہیں ، تو نبی اکرم صلی اللہ علیہ وسلم نے فرمایا : ایک بالشت ، آن ازواج نے عرض کی : ایک بالشت ، تو تھوڑا ہوتا ہے ، اس میں پردے والا حصہ ، تو نکل آئے گا ۔ نبی اکرم صلی اللہ علیہ وسلم نے فرمایا : ایک ذراع ، انہوں نے عرض کی : اس صورت میں ، تو قدم ظاہر ہوں گے نبی اکرم صلی اللہ علیہ وسلم نے ایک ذراع اس سے زیادہ نہیں ۔
یہ روایت امام بزار نے نقل کی ہے ۔ اس کی سند میں ایک راوی زید بن حواری عمی ہے جس کی توثیق کی گئی ہے اکثر ائمہ نے اسے ضعیف قرار دیا ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے اپنی بعض ازواج کو کھڑا کیا اور ان کے دامن میں سے ایک یا دو بالشت لٹکا کر فرمایا : تم اس سے زیادہ نہ کرنا ۔
یہ روایت امام ابویعلیٰ نے نقل کی ہے ۔ اور اس کے رجال صحیح کے رجال ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ فاطمہ رضی اللہ عنہا کی پشت سے ان کا دامن ایک بالشت لٹکایا اور فرمایا : عورت کا دامن اتنا ہوتا ہے ۔
یہ روایت امام طبرانی نے معجم اوسط میں نقل کی ہے ۔ اور اس کی سند میں ایک راوی ضرار بن صرد ہے ، اور وہ ضعیف ہے ۔