مجمع الزوائد ومنبع الفوائد

سیدنا زبیر رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کے زمانہ اقدس میں گھوڑا ذبح کیا اور اس کا گوشت کھا لیا ۔
یہ روایت امام بزار نے اپنے استاد زکریا بن یحیی بن ایوب سے نقل کی ہے ۔ اور میں ان سے واقف نہیں ہوں ۔ اس روایت کے بقیہ رجال ثقہ ہیں امام بزار کہتے ہیں : شبابہ نے مغیرہ کے حوالے سے ہشام کے حوالے سے ان کے والد کے حوالے سے سیدنا زبیر رضی اللہ عنہ سے اسے اسی طرح روایت کیا ہے وہ بیان کرتے ہیں : اس روایت کو ابواسامہ ہشام کے حوالے سے فاطمہ بنت منذر کے حوالے سے سیدہ اسماء بنت ابوبکر رضی اللہ عنہما سے نقل کیا ہے ( جو سیدنا زبیر رضی اللہ عنہ کی اہلیہ ہیں ) ۔

سیدہ اسماء بنت ابوبکر رضی اللہ عنہما بیان کرتی ہیں : ہم نے گھوڑا ذبح کیا اور ہم نے اور نبی اکرم صلی اللہ علیہ وسلم کے گھر والوں نے اس کا گوشت کھایا ۔ ( علامہ ہیثمی فرماتے ہیں : ) میں یہ کہتا ہوں
یہ روایت صحیح میں مذکور ہے تاہم اس میں یہ الفاظ نہیں ہیں : ” ہم نے اور نبی اکرم صلی اللہ علیہ وسلم کے گھر والوں نے “ ۔
یہ روایت امام طبرانی نے نقل کی ہے ۔ اس کی سند میں ایک راوی سلیمان بن أحمد واسطی ہے ، اور وہ متروک ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے پالتو گدھوں کا گوشت کھانے سے منع کر دیا تھا اور آپ نے گھوڑوں کے گوشت کے بارے میں حکم دیا تھا کہ اسے کھایا جا سکتا ہے ۔ ( علامہ ہیثمی فرماتے ہیں : ) میں یہ کہتا ہوں ان صحابی کے حوالے سے صحیح میں یہ بات مذکور ہے کہ پالتو گدھوں کے گوشت کھانے سے منع کر دیا گیا تھا اس میں گھوڑوں کے گوشت کے بارے میں اجازت دینے کا ذکر نہیں ہے ۔
یہ روایت امام طبرانی نے معجم کبیر اور معجم اوسط میں نقل کی ہے ۔ ان دونوں کے رجال صحیح کے رجال ہیں صرف محمد بن عبید محاربی کا معاملہ مختلف ہے ، اور وہ ثقہ ہے ۔

سیدنا جابر بن عبداللہ رضی اللہ عنہ بیان کرتے ہیں : غزوہ خبیر کے موقع پر لوگوں کو بھوک لاحق ہوئی انہوں نے گدھے پکڑے اور انہیں ذبح کیا اور ہنڈیائیں چڑھا دیں جب نبی اکرم صلی اللہ علیہ وسلم کو اس بات کی اطلاع ملی ، تو سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں یہ حکم دیا کہ ہم ہنڈیاؤں کو الٹ دیں آپ نے ارشاد فرمایا : اللہ تعالیٰ عنقریب تمہیں ایسا رزق عطا کرے گا ، جو تمہارے لئے اس سے زیادہ حلال اور زیادہ پاکیزہ ہو گا راوی کہتے ہیں : تو اس دن ہم نے ہنڈیائیں الٹا دیں حالانکہ وہ جوش مار رہی تھیں راوی کہتے ہیں : تو نبی اکرم صلی اللہ علیہ وسلم نے پالتو گدھوں کے گوشت گھوڑوں کے گوشت اور خچروں کے گوشت اور ہر نوکیلے دانتوں والے درندے اور نوکیلے پنچوں والے پرندے کے گوشت کھانے کو حرام قرار دیا آپ نے مجثمہ ، خلسہ اور نہبہ ( یعنی اچک کر یا لوٹ لی جانے والی چیز کو استعمال کرنے ) کو حرام قرار دیا ۔ علامہ ہیثمی فرماتے ہیں : ) میں یہ کہتا ہوں
یہ روایت امام ترمذی نے اختصار کے ساتھ نقل کی ہے ۔
یہ روایت امام طبرانی نے معجم اوسط میں نقل کی ہے ۔ اور امام بزار نے اختصار کے ساتھ نقل کی ہے ۔ ان دونوں کے رجال صحیح کے رجال ہیں صرف امام طبرانی کے استاد عمر بن حفص سدوی کا معاملہ مختلف ہے ، اور وہ ثقہ ہے ۔