مجمع الزوائد ومنبع الفوائد

سیدنا عبداللہ بن عمر رضی اللہ عنہما انگلیاں چاٹ لیا کرتے تھے پھر وہ یہ بات بیان کرتے تھے : نبی اکرم صلی اللہ علیہ وسلم نے ارشاد فرمایا ہے : ” تم لوگ یہ نہیں جانتے کہ تم لوگوں کے کھانے کے کون سے حصے میں برکت موجود ہے “ ۔
یہ روایت امام أحمد اور امام بزار نے نقل کی ہے ۔ اور ان کے الفاظ یہ ہیں ” جب تم میں سے کوئی ایک شخص کھانا کھائے ، تو اپنا ہاتھ اس وقت تک نہ پونچھے جب تک اسے چاٹ نہیں لیتا یا چٹوا نہیں لیتا کیونکہ نبی اکرم صلی اللہ علیہ وسلم نے یہ بات ارشاد فرمائی ہے : ” تم یہ بات نہیں جانتے کہ تمہارے کھانے کے کون سے حصے میں برکت ہے “ ۔ ان دونوں روایات کے رجال صحیح کے رجال ہیں ۔

سیدنا عرباض بن ساریہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص برتن چاٹ لیتا ہے ، اور انگلیاں چاٹ لیتا ہے اللہ تعالیٰ اسے دنیا اور آخرت میں سیر کرے گا“ ۔
یہ روایت امام طبرانی نے اپنے استاد ابراہیم بن محمد بن عرق سے نقل کی ہے ۔ اور امام ذہبی نے انہیں ضعیف قرار دیا ہے ۔

جبیر بن مثنی اپنے والد کا یہ بیان نقل کرتے ہیں عبدالملک بن مروان نے سیدنا زید بن ثابت رضی اللہ عنہ کو پیغام بھیج کر ان سے دریافت کیا : آپ کیسے کھاتے ہیں اور کیسے پیتے ہیں ۔ انہوں نے فرمایا : میں اس وقت تک پیتا رہتا ہوں جب تک سانس منقطع نہیں ہو جاتا پھر میں اپنے منہ سے برتن ہٹا لیتا ہوں ، اور جب میں کھاتا ہوں ، تو اپنی انگلیاں چاٹ لیتا ہوں کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جب تم میں سے کوئی ایک شخص کچھ کھائے ، تو اپنی انگلیاں چاٹ لے کیونکہ وہ یہ نہیں جانتا کہ کھانے کے کون سے حصے میں برکت موجود ہے “ ۔
یہ روایت امام طبرانی نے نقل کی ہے ۔ جبیر اور اس کے والد دونوں سے میں واقف نہیں ہوں ۔ اس روایت کے بقیہ رجال کی نقل کردہ حدیث حسن ہے ۔

ابومضاء بیان کرتے ہیں : مروان بن حکم نے سیدنا زید بن ثابت رضی اللہ عنہ سے دریافت کیا : آپ کیسے کھاتے ہیں ؟ انہوں نے جواب دیا : سیدنا ابوسعید خدری رضی اللہ عنہ نے مجھے یہ بات نبی اکرم صلی اللہ علیہ وسلم کے حوالے سے بیان کی ہے ۔ نبی اکرم صلی اللہ علیہ وسلم نے ارشاد فرمایا ہے : ” جب تم میں سے کوئی ایک شخص کھانا کھائے ، تو وہ اپنا ہاتھ اس وقت تک نہ پوچھے جب تک اپنی انگلیاں نہیں چاٹ لیتا کیونکہ وہ یہ نہیں جانتا کہ اس کے کھانے کے کون سے حصے میں اس کے لئے برکت رکھی گئی ہے “ ۔
یہ روایت امام طبرانی نے نقل کی ہے ۔ ابومضاء اور اس کا بیٹا جمیل میں ان دونوں سے واقف نہیں ہوں ۔ اس روایت کے بقیہ رجال کی نقل کردہ حدیث حسن ہے یا صحیح ہے ۔ امام طبرانی نے اسے معجم اوسط میں نقل کیا ہے اس کی سند میں ایک راوی عبداللہ بن محمد بن عمارہ انصاری ہے ۔ امام ذہبی کہتے ہیں : وہ مستور ہے اس روایت کے بقیہ رجال صحیح کے رجال ہیں ۔

سیدنا کعب بن عجرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو اپنی تین انگلیوں کے ذریعے کھاتے ہوئے دیکھا ہے انگوٹھا اور اس کے ساتھ والی دو انگلیاں ( کھانے سے فارغ ہو کر ) آپ سب سے پہلے درمیان والی انگلی کو چاٹتے تھے پھر اس کے بعد والی کو اور پھر انگوٹھے کو ( چاٹ لیتے تھے ) ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حسین بن ابراہیم اذنی ہے ، اور ایک راوی محمد بن کعب بن عجرہ ہے میں ان دونوں سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب تم میں سے کوئی ایک شخص کچھ کھائے ، تو اپنی تینوں انگلیاں چاٹ لے کیونکہ وہ یہ نہیں جانتا کہ ان میں سے کس میں برکت ہے “ ۔
یہ روایت امام طبرانی نے معجم اوسط میں نقل کی ہے ۔ اور اس کے رجال صحیح کے رجال ہیں
یہ روایت امام مسلم اور امام ابوداؤد نے نبی اکرم صلی اللہ علیہ وسلم کے فعل کے طور پر نقل کی ہے کہ ” جب آپ کھانا کھاتے تھے ، تو تینوں انگلیاں چاٹ لیتے تھے “ ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم جب کھانا کھاتے تھے ، تو اپنی انگلیاں چاٹ لیتے تھے اور یہ ارشاد فرماتے تھے : انگلیوں کو چاٹنا برکت ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن محمد بن عمارہ انصاری ہے ، اور وہ مستور ہے اس روایت کے بقیہ رجال صحیح کے رجال ہیں
یہ روایت امام مسلم اور امام ترمذی نے نبی اکرم صلی اللہ علیہ وسلم کے اس فرمان کی شکل میں نقل کی ہے : ” جب تم میں سے کوئی ایک شخص کچھ کھائے ، تو اسے اپنی انگلیاں چاٹ لینی چاہئیں کیونکہ وہ یہ نہیں جانتا کہ اس میں سے کس میں برکت ہے “ ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے پیالے کو چاٹ لینے کا حکم دیا ہے ۔
یہ روایت امام طبرانی نے نقل کی ہے ۔ اس کی سند میں ایک راوی مسیب بن واضح ہے ۔ ابوحاتم کہتے ہیں : یہ صدوق ہے ، اور بکثرت غلطی کرتا ہے ، جب اس سے کہا: جاتا ہے ، تو یہ اصلاح کو قبول نہیں کرتا امام نسائی رحمہ اللہ کی اس کے بارے میں رائے اچھی تھی اس روایت کے بقیہ رجال صحیح کے رجال ہیں ۔