مجمع الزوائد ومنبع الفوائد

بنو سلیم سے تعلق رکھنے والے ایک صاحب جنہیں صحابی ہونے کا شرف حاصل ہے ، وہ فرماتے ہیں : جب نبی اکرم صلی اللہ علیہ وسلم کھانا کھا کر فارغ ہوتے تھے ، تو یہ پڑھتے تھے : ” اے اللہ ! ہر طرح کی حمد تیرے ہی لیے مخصوص ہے ، تو نے کھلایا ہے ، تو نے ہی پلایا ہے ، تو نے سیر کیا ہے ، اور تو نے سیراب کیا ہے ، تو ہر طرح کی حمد تیرے ہی لئے مخصوص ہے ، جو ایسی نہ ہو کہ جسے قبول نہ کیا جائے ، اور جو ایسی نہ ہو کہ اسے رخصت کر دیا جائے ، اور نہ ہی ایسی ہو کہ تجھ سے بے نیاز ہوا جائے “ ۔
یہ روایت امام أحمد نے نقل کی ہے ۔ اس کی سند میں ایک راوی عبداللہ بن عامر اسلمی ہے ، اور وہ ضعیف ہے ۔

حماد بن ابوسلیمان بیان کرتے ہیں : میں نے ( سیدنا ابوموسیٰ اشعری رضی اللہ عنہ کے صاحبزادے ) ابوبردہ کے ساتھ رات کا کھانا کھایا ، تو انہوں نے فرمایا : کیا میں تمہیں وہ حدیث بیان نہ کروں جو میرے والد سیدنا عبداللہ بن قیس رضی اللہ عنہ ( یعنی سیدنا ابوموسی اشعری رضی اللہ عنہ ) نے مجھے بیان کی تھی وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کھانا کھائے ، اور سیر ہو جائے ، اور پیئے ، اور سیراب ہو جائے ، تو وہ یہ پڑھے : ہر طرح کی حمد اللہ تعالیٰ کے لئے مخصوص ہے جس نے مجھے کھلایا تو مجھے سیر کر دیا اور پلایا تو مجھے سیراب کر دیا “ ۔ ( نبی اکرم صلی اللہ علیہ وسلم فرماتے ہیں : ) تو وہ شخص گناہوں سے نکل کر یوں ہو جاتا ہے جیسے اس دن تھا جب اس کی والدہ نے اسے جنم دیا تھا “ ۔
یہ روایت امام ابویعلیٰ نے نقل کی ہے ۔ اس کی سند میں ایسا راوی ہے جس سے میں واقف نہیں ہوں ۔

سیدنا عبدالرحمن بن عوف رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں کہ جب آپ کھانا کھا کر فارغ ہوتے تھے ، تو یہ پڑھتے تھے : ” ہر طرح کی حمد اللہ تعالیٰ کے لئے مخصوص ہے جس نے ہمیں کھلایا اور جس نے ہمیں پلایا ہر طرح کی حمد اللہ تعالیٰ کے لیے مخصوص ہے جس نے ہماری کفایت کی اور جس نے ہمیں پناہ دی ہر طرح کی حمد اللہ تعالیٰ کے لئے مخصوص ہے جس نے ہم پر نعمت کی اور ہم پر فضل کیا ہم تجھ سے تیری رحمت کے وسیلے سے یہ سوال کرتے ہیں کہ ، تو ہمیں جہنم سے بچا لے “ ۔
یہ روایت امام بزار نے محمد بن ابولیلی کی بعض اہل مکہ سے نقل کردہ روایت کے طور پر نقل کی ہے ۔ اور ابن ابولیلیٰ کا حافظ خراب ہے ، اور اس کے استاد کا نام بیان نہیں کیا گیا ہے ، اور ابوسلمہ نامی راوی نے اپنے والد سے سماع نہیں کیا ہے ۔

سیدنا حارث بن حارث رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو سنا آپ نے کھانے سے فارغ ہو کر یہ پڑھا : ” اے اللہ ! ہر طرح کی حمد تیرے ہی لئے مخصوص ہے ، تو نے کھلایا ہے ، اور تو نے پلایا ہے ، تو نے سیر کیا ہے ، اور تو نے سیراب کیا ہے حمد تیرے ہی لئے مخصوص ہے ، جس کو مسترد نہ کیا جائے ، اُسے رخصت نہ کیا جائے ، اور اے ہمارے پروردگار ! تجھ سے بے نیاز نہ ہوا جائے “
یہ روایت امام طبرانی نے نقل کی ہے ۔ اس کی سند میں ایک راوی عمر بن موسیٰ بن وجیہ ہے ، اور وہ ضعیف ہے ۔

سعد بن مسعود ثقفی بیان کرتے ہیں : سیدنا نوح علیہ السلام کا نام شکر گزار بندہ اس لئے رکھا گیا کیونکہ جب وہ کھاتے تھے اور پیتے تھے ، تو اللہ تعالیٰ کی حمد بیان کرتے تھے ۔
یہ روایت امام طبرانی نے نقل کی ہے ۔ اس میں تابعی سعد بن سنان ہے ، اور میں اس سے واقف نہیں ہوں ۔ اس روایت کے بقیہ رجال صحیح کے رجال ہیں ۔

حارث بن سوید بیان کرتے ہیں : سیدنا سلمان فارسی رضی اللہ عنہ جب کھانا کھا کر فارغ ہوتے تھے ، تو یہ پڑھتے تھے : ” ہر طرح کی حمد اللہ تعالیٰ کے لئے مخصوص ہے جس نے ہماری ضرورت کو پورا کیا اور ہمیں رزق میں وسعت عطا کی “ ۔
یہ روایت امام طبرانی نے نقل کی ہے ۔ اس کی سند میں ایک راوی یزید بن عطاء ہے ، اور وہ انتہائی ضعیف ہے ویسے اس کی توثیق کی گئی ہے ۔