مجمع الزوائد ومنبع الفوائد

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عرب ایک دوسرے کا کفو ہیں ، اور موالی ایک دوسرے کا کفو ہیں “ ۔
یہ روایت امام بزار نے نقل کی ہے ، اس کی سند میں ایک راوی سلیمان بن ابوجون ہے ، میں نے اس کا ذکر کرتے ہوئے کسی کو نہیں پایا ہے ، اس روایت کے بقیہ رجال صحیح کے رجال ہیں ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” خواتین کی شادی ، صرف کفو میں کی جائے ، اور اُن کی شادیاں صرف ان کے اولیاء کریں ، اور دس درہم سے کم مہر نہیں ہو گا “ ۔
یہ روایت امام ابویعلیٰ نے نقل کی ہے ، اس کی سند میں ایک راوی مبشر بن عبید ہے اور وہ متروک ہے ۔

سیدنا سلمان فارسی رضی اللہ عنہ بیان کرتے ہیں : نبی اکرم صلی اللہ علیہ وسلم نے ہم ( غیر عربوں ) کو اس بات سے منع کیا تھا کہ ہم عربوں کی عورتوں کے ساتھ نکاح کریں ۔
یہ روایت امام طبرانی نے معجم اوسط میں نقل کی ہے ۔

ان صحابی کے حوالے سے معجم کبیر میں یہ بات منقول ہے : ” ہم تم لوگوں کو ( یعنی عربوں کو ) نبی اکرم صلی اللہ علیہ وسلم کی عطا کردہ فضیلت کی وجہ سے فضیلت دیتے ہیں “ ۔ سیدنا سلمان رضی اللہ عنہ کی مراد عرب لوگ تھے ( انہوں نے فرمایا : ” ہم تمہاری خواتین کے ساتھ نکاح نہیں کریں گے “ ۔ معجم کبیر کے رجال ثقہ ہیں ، اور معجم اوسط کی سند میں ایک راوی سری بن اسماعیل ہے اور وہ متروک ہے ۔

ثابت بنانی بیان کرتے ہیں : سیدنا ابودرداء رضی اللہ عنہ سیدنا سلمان فارسی رضی اللہ عنہ کے ساتھ گئے ، تاکہ ان کے لئے بنولیث سے تعلق رکھنے والی ایک خاتون کو شادی کا پیغام دیں ، وہ میزبان کے گھر میں داخل ہوئے ، انہوں نے سیدنا سلمان رضی اللہ عنہ کی فضیلات کا اُن کی سبقت کا ان کے اسلام کا ذکر کیا ، اور یہ بات بیان کی : وہ ان لوگوں کے ہاں فلاں خاتون کے ساتھ شادی کرنا چاہتے ہیں ، تو ان لوگوں نے کہا: جہاں تک سیدنا سلمان رضی اللہ عنہ کا تعلق ہے ، تو ہم ان کے ساتھ شادی نہیں کروائیں گے ، البتہ ہم آپ کے ساتھ شادی کروا دیتے ہیں تو سیدنا ابودرداء رضی اللہ عنہ نے اس ( خاتون ) کے ساتھ شادی کر لی ، پھر وہ وہاں سے نکلے اور انہوں نے فرمایا : یہ ایسی صورت حال ہے کہ میں اس کا ذکر کرتے ہوئے شرما رہا ہوں ، تو سیدنا سلمان رضی اللہ عنہ نے فرمایا : وہ کیوں ؟ سیدنا ابودرداء رضی اللہ عنہ نے انہیں پوری صورت حال بتائی تو سیدنا سلمان رضی اللہ عنہ نے فرمایا : میں اس بات کا زیادہ حق رکھتا ہوں کہ مجھے آپ سے شرم آنی چاہیے کہ میں نے اس عورت کو شادی کا پیغام دیا تھا ، جبکہ اللہ تعالیٰ نے اسے آپ کے مقدر میں لکھ دیا تھا ۔
یہ روایت امام طبرانی نے نقل کی ہے ، اور اس کے رجال ثقہ ہیں ، البتہ ثابت نے سیدنا سلمان فارسی رضی اللہ عنہ سے یا سیدنا ابودرداء رضی اللہ عنہ سے سماع نہیں کیا ہے ۔

عروہ بیان کرتے ہیں : سیدنا علی بن ابوطالب رضی اللہ عنہ نے فرمایا ہے : اے میرے بیٹو ! تم اپنی بیٹیوں کی شادیاں صرف کفو میں کرنا ، انہوں نے عرض کی : اے ہمارے ابا جان ! کفو کون ہیں ؟ انہوں نے جواب دیا : سیدنا زبیر بن عوام رضی اللہ عنہ کی اولاد ۔
یہ روایت امام طبرانی نے نقل کی ہے ، اس کی سند میں ایک راوی عبداللہ بن محمد بن یحیی بن عروہ ہے اور وہ متروک ہے ۔