مجمع الزوائد ومنبع الفوائد

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں ہم ایک کپڑے کے عوض میں متعہ کر لیتے تھے ۔
یہ روایت امام أحمد اور امام بزار نے نقل کی ہے ، امام أحمد کے رجال صحیح کے رجال ہیں ۔

سیدنا سبرہ جہنی رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ہمراہ فتح مکہ کے سال روانہ ہوئے ، ہم نے ( مکہ میں ) پندرہ سے لے کر تیس کے درمیان دنوں کا قیام کیا ، اس دوران نبی اکرم صلی اللہ علیہ وسلم نے ہمیں متعہ کرنے کی اجازت دے دی ، راوی کہتے ہیں : میں اور میرا چچازاد مکہ کے زیریں علاقے میں ( راوی کو شک ہے ، شاید یہ الفاظ ہیں : ) بالائی علاقے میں نکلے ، ہماری ملاقات ایک نوجوان خاتون سے ہوئی ، جس کا تعلق بنو عامر بن صعصعہ سے لگ رہا تھا ، اور وہ لمبی گردن کی مالک جوان عورت تھی ، میں کچھ بدصورت تھا ، میرے جسم پر عمدہ لباس تھا اور میرے چازاد کی چادر پرانی تھی ، ہم نے اس سے کہا: کیا ہم میں سے کوئی ایک تمہارے ساتھ متعہ کر سکتا ہے ؟ اس نے دریافت کیا : کیا یہ درست ہے ؟ ہم نے کہا: جی ہاں ! اس نے میرے چچازاد کی طرف دیکھنا شروع کیا ، میں نے اس سے کہا: میری یہ چادر نئی اور عمدہ ہے اور میرے چچازاد کی چادر پرانی اور بوسیدہ ہے ، اس نے کہا: تمہارے چچازاد کی چادر میں بھی کوئی حرج نہیں ہے ، پھر اس چچازاد نے اس عورت کے ساتھ متعہ کر لیا ، پھر ہمارے مکہ سے نکلنے سے پہلے نبی اکرم صلی اللہ علیہ وسلم نے اسے حرام قرار دے دیا ۔
( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اس کے برعکس منقول ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : غزوہ تبوک کے موقع پر ہم لوگ نبی اکرم صلی اللہ علیہ وسلم کے ہمراہ روانہ ہوئے ، ہم نے ثنیہ الوداع کے پاس پڑاؤ کیا ، نبی اکرم صلی اللہ علیہ وسلم نے کچھ چراغ دیکھے اور کچھ خواتین کو روتے ہوئے دیکھ کر دریافت کیا : ان کا کیا معاملہ ہے ؟ لوگوں نے عرض کی : یہ خواتین ہیں جو رو رہی ہیں ، جن سے متعہ کیا جاتا تھا ، نبی اکرم صلی اللہ علیہ وسلم نے فرمایا : اسے حرام قرار دے دیا گیا ہے ( راوی کو شک ہے ، شاید یہ الفاظ ہیں : ) نکاح ، طلاق ، عدت اور میراث نے متعہ کو کالعدم کر دیا ہے ۔
یہ روایت امام ابویعلیٰ نے نقل کی ہے ، اس کی سند میں ایک راوی مؤمل بن اسماعیل ہے ، جسے یحیی بن معین اور ابن حبان نے ثقہ قرار دیا ہے ، امام بخاری رحمہ اللہ اور دیگر حضرات نے اسے ضعیف کہا: ہے ، اس روایت کے بقیہ رجال صحیح کے رجال ہیں ۔

سیدنا جابر بن عبداللہ انصاری رضی اللہ عنہ بیان کرتے ہیں : ہم لوگ روانہ ہوئے ، ہمارے ساتھ وہ خواتین تھیں ، جن کے ساتھ ہم متعہ کیا کرتے تھے یہاں تک کہ ہم روانگی والی پہاڑی کے پاس آ گئے ، تو ہم نے کہا: یا رسول اللہ ! یہ وہ خواتین ہیں ، جن سے ہم متعہ کیا کرتے تھے ، نبی اکرم صلی اللہ علیہ وسلم نے فرمایا : اب یہ قیامت تک کے لئے حرام ہو گئی ہیں ، پھر ان خواتین نے ہمیں وہاں سے رخصت کر دیا ، اس وجہ سے اس گھائی کا نام ثنیہ الوداع رکھا گیا ، حالانکہ اس سے پہلے یہ ثنیۃ الرقاب ( یعنی سواروں کی گھاٹی ) ہوتی تھی ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی صدقہ بن عبداللہ ہے ، جسے امام ابوحاتم نے ثقہ قرار دیا ہے امام أحمد اور ایک جماعت نے اسے ضعیف کہا: ہے اس روایت کے بقیہ رجال صحیح کے رجال ہیں ۔

سیدنا ثعلبہ بن حکم رضی اللہ عنہ بیان کرتے ہیں : نبی اکرم صلی اللہ علیہ وسلم نے غزوہ خیبر کے موقع پر متعہ سے منع کر دیا تھا ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ، صرف شریک کا معاملہ مختلف ہے اور وہ ثقہ ہے ۔

سالم بن عبداللہ بیان کرتے ہیں : ایک شخص سیدنا عبداللہ بن عمر رضی اللہ عنہما کے پاس آیا اور ان سے کہا: سیدنا عبداللہ بن عباس رضی اللہ عنہما نکاح متعہ کی اجازت دیتے ہیں ، سیدنا عبداللہ بن عمر رضی اللہ عنہما نے فرمایا : سبحان اللہ ! ابن عباس کے بارے میں میرا یہ گمان نہیں تھا کہ وہ ایسا کرتے ہوں گے ، لوگوں نے عرض کی : جی ہاں ! وہ ایسا کرتے ہیں تو سیدنا عبداللہ بن عمر رضی اللہ عنہما نے فرمایا : جب نبی اکرم صلی اللہ علیہ وسلم تھے تو اس وقت ابن عباس کمسن لڑکے تھے ، پھر سیدنا عبداللہ بن عمر رضی اللہ عنہما نے بتایا : نبی اکرم صلی اللہ علیہ وسلم نے ہمیں اس سے منع کر دیا تھا اور اب ہم زنا کرنے والے نہیں ہیں ۔
یہ روایت امام طبرانی نے معجم اوسط میں نقل کی ہے ، اس کے رجال صحیح کے رجال ہیں ، صرف معافی بن سلیمان کا معاملہ مختلف ہے اور وہ ثقہ ہے ۔

سیدنا عبداللہ بن عمر رضی اللہ عنہما کے بارے میں یہ بات منقول ہے : اُن سے متعہ کے بارے میں دریافت کیا گیا : تو انہوں نے فرمایا : یہ حرام ہے ، ان سے کہا: گیا : سیدنا عبداللہ بن عباس رضی اللہ عنہما تو اس میں کوئی حرج نہیں سمجھتے ہیں ، انہوں نے فرمایا : اللہ کی قسم ! ابن عباس یہ بات جانتے ہیں کہ غزوہ خیبر کے موقع پر نبی اکرم صلی اللہ علیہ وسلم نے اس سے منع کر دیا تھا اور ہم لوگ زنا کرنے والے نہیں ہیں ۔
یہ روایت امام طبرانی نے نقل کی ہے ، اس کی سند میں ایک راوی منصور بن دینار ہے اور وہ ضعیف ہے ۔

سیدنا علی بن ابوطالب رضی اللہ عنہ بیان کرتے ہیں : یہ حکم اس شخص کے لئے تھا جو گنجائش نہیں پاتا تھا ، لیکن جب نکاح ، طلاق ، عدت اور وراثت کے احکام آ گئے ، تو پھر اس سے منع کر دیا گیا ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا ابتدائی حصہ منقول ہے ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی ابن لہیعہ ہے ، اس کی نقل کردہ حدیث حسن ہے اس کے بقیہ رجال ثقہ ہیں ۔

محمد بن حنفیہ بیان کرتے ہیں : خواتین کے ساتھ متعہ کرنے کے بارے میں سیدنا علی رضی اللہ عنہ اور سیدنا عبداللہ بن عباس رضی اللہ عنہما کے درمیان بات چیت ہوئی ، تو سیدنا علی رضی اللہ عنہ نے ان سے کہا: تم ایک گمراہ شخص ہو ، نبی اکرم صلی اللہ علیہ وسلم نے حجتہ الوداع کے موقع پر عورتوں کے ساتھ متعہ کرنے سے منع کر دیا تھا ۔
( علامہ ہیثمی فرماتے ہیں : ) میں یہ کہتا ہوں : ” صحیح “ میں
یہ روایت مذکور ہے : غزوہ خیبر کے موقع پر اس سے منع کیا گیا تھا ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سعید بن جبیر بیان کرتے ہیں : میں نے سیدنا عبداللہ بن عباس رضی اللہ عنہما سے کہا: کیا آپ جانتے ہیں کہ آپ نے کیا کیا ہے ؟ اور آپ نے کیا فتویٰ دیا ہے ؟ سواروں نے آپ کا فتویٰ پھیلا دیا ہے ، اور اس کے بارے میں شاعروں نے شعر بھی کہے ہیں ، انہوں نے دریافت کیا : ان شاعروں نے کیا کہا: ہے ؟ میں نے جواب دیا : ان شاعروں نے یہ کہا: ہے : ” اس نے بزرگ سے کہا: جب اس کی ہم نشینی طویل ہو گئی کہ اے شخص ! کیا تمہیں سیدنا عبداللہ بن عباس رضی اللہ عنہما کے فتوی میں دلچسپی ہے ؟ کیا تم رخصت میں دلچسپی رکھتے ہو کہ وہ تمہارا ٹھکانہ ہو جائے ، جب تک لوگ واپس نہیں آتے “ ۔ تو سیدنا عبداللہ بن عباس رضی اللہ عنہما نے فرمایا : انا للہ وانا الیہ راجعون ، اللہ کی قسم ! میں نے یہ فتویٰ نہیں دیا ، اور نہ ہی میں نے یہ ارادہ کیا ہے ، اور نہ ہی میں نے اس حوالے سے کسی ایسی چیز کو حلال قرار دیا ہے ، جسے اللہ تعالیٰ نے حلال قرار نہ دیا ہو ، اس کا تعلق مردار ، یا خون ، یا خنزیر کے گوشت سے ہے ۔
یہ روایت امام طبرانی نے نقل کی ہے ، اس کی سند میں ایک راوی حجاج بن ارطاۃ ہے اور وہ ثقہ ہے لیکن وہ تدلیس کرنے والا ہے اس روایت کے بقیہ رجال صحیح کے رجال ہیں ۔

سیدنا زید بن خالد جہنی رضی اللہ عنہ بیان کرتے ہیں : میں اور میرے ساتھی ، ایک متعین مدت کے لئے ایک عورت کے ساتھ متعہ کرنے لگے تھے ، پھر ایک شخص ہمارے پاس آیا اور اس نے ہمیں یہ بتایا کہ نبی اکرم صلی اللہ علیہ وسلم نے نکاح متعہ کو حرام قرار دے دیا ہے ، اور آپ نے ہر نوکیلے دانتوں والے درندے اور پالتو گدھے کو بھی حرام قرار دیا ہے ۔
یہ روایت امام طبرانی نے نقل کی ہے ، اس کی سند میں ایک راوی موسیٰ بن عبیدہ ربذی ہے اور وہ ضعیف ہے ۔

سیدنا حارث بن غزیہ رضی اللہ عنہ بیان کرتے ہیں : فتح مکہ کے دن ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” عورتوں کے ساتھ نکاح متعہ حرام ہے “ یہ بات آپ صلی اللہ علیہ وسلم نے تین مرتبہ ارشاد فرمائی ۔
یہ روایت امام طبرانی نے نقل کی ہے ، اس کی سند میں ایک راوی اسحاق بن عبداللہ بن ابوفروہ ہے اور وہ ضعیف ہے ۔

سیدنا سہل بن سعد ساعدی رضی اللہ عنہ بیان کرتے ہیں : نبی اکرم صلی اللہ علیہ وسلم نے ضرورت کے پیش نظر لوگوں کو متعہ کی اجازت دی تھی ، کیونکہ لوگوں کو شدید ضرورت لاحق ہو گئی تھی ، اس کے بعد نبی اکرم صلی اللہ علیہ وسلم نے اس سے منع کر دیا ۔
یہ روایت امام طبرانی نے نقل کی ہے ، اس کی سند میں ایک راوی یحیی بن عثمان بن صالح اور ایک راوی ابن لہیعہ ہے ، ان دونوں کی نقل کردہ حدیث حسن ہے ، ان دونوں کے بارے میں کلام کیا گیا ہے ، اس روایت کے بقیہ رجال صحیح کے رجال ہیں ۔

سیدنا کعب بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے عورتوں کے ساتھ متعہ کرنے سے منع کیا ہے ۔
یہ روایت امام طبرانی نے نقل کی ہے ، اس کی سند میں ایک راوی یحیی بن ابوانیسہ ہے اور وہ متروک ہے ۔