مجمع الزوائد ومنبع الفوائد

سیدنا ابوذر غفاری رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اس کا نام عکاف بن بشر تمیمی تھا ، نبی اکرم صلی اللہ علیہ وسلم نے اس سے دریافت کیا : اے عکاف ! کیا تمہاری بیوی ہے ؟ اس نے عرض کی : جی نہیں ! نبی اکرم صلی اللہ علیہ وسلم نے دریافت کیا : کنیز بھی نہیں ہے ؟ اس نے عرض کی ! جی نہیں ! نبی اکرم صلی اللہ علیہ وسلم نے دریافت کیا : کیا تم بھلائی کے ساتھ خوشحال ہو ؟ انہوں نے عرض کی : میں بھلائی کے ساتھ خوشحال ہوں ، نبی اکرم صلی اللہ علیہ وسلم نے فرمایا : ایسی صورت میں تم شیاطین کے بھائیوں میں سے ایک ہو ، اگر تم عیسائیوں میں سے ہوتے ، تو ان کے راہبوں میں سے ایک ہوتے ، ہماری سنت نکاح کرنا ہے اور تم میں سے برے لوگ کنوارے ہیں اور تم میں بری موت کنواروں کو آتی ہے ، کیا تم شیاطین کے راستے پر چلنا چاہتے ہو ؟ شیاطین کا کوئی ہتھیار ایسا نہیں ہے ، جو نیک لوگوں کے بارے میں ، عورتوں سے زیادہ تیز ہو ، البتہ شادی کرنے والوں کا معاملہ مختلف ہے ، وہ لوگ پاک اور خیانت ( یا فحاشی ) سے بری ہوتے ہیں ، اے عکاف ! تمہارا سیتاناس ہو ، یہ ( خواتین ) سیدنا ایوب علیہ السلام سیدنا داؤد علیہ السلام اور سیدنا یوسف علیہ السلام اور کرسف کی بیویاں رہی ہیں ( یا یہ حضرات بھی شادی شدہ تھے ) ۔
راوی بیان کرتے ہیں : سیدنا بشر بن عطیہ رضی اللہ عنہ نے عرض کی : یا رسول اللہ ! ” کرسف“ کون ہے ؟ نبی اکرم صلی اللہ علیہ وسلم نے ارشاد فرمایا : ایک شخص جو سمندر کے ایک ساحل پر تین سو سال تک اللہ تعالیٰ کی عبادت کرتا رہا ، وہ دن کے وقت روزہ رکھتا تھا اور رات کو نفل پڑھا کرتا تھا ، پھر اس نے ایک عورت کے عشق کی وجہ سے اللہ تعالیٰ کا کفر کیا اور اللہ تعالیٰ کی جو عبادت کی تھی ، اسے چھوڑ دیا ، پھر اس کی کسی نیکی کی وجہ سے ، اللہ تعالیٰ نے اسے توبہ کی توفیق بخشی ، اس نے توبہ کی ۔ ( نبی اکرم صلی اللہ علیہ وسلم نے فرمایا : ) اے عکاف ! تمہارا ستیاناس ہو ، تم شادی کر لو ! ورنہ تم درمیان کے لوگوں میں رہو گے ، انہوں نے عرض کی : یا رسول اللہ ! آپ میری شادی کروا دیجیے ! نبی اکرم صلی اللہ علیہ وسلم نے فرمایا : میں تمہاری شادی کریمہ بنت کلثوم حمیری سے کرواتا ہوں ۔
یہ روایت امام أحمد نے نقل کی ہے اس کی سند میں ایک راوی ایسا ہے ، جس کا نام بیان نہیں کیا ہے ، اس روایت کے بقیہ رجال ثقہ ہیں ۔

سیدنا عطیہ بن بسر مازنی رضی اللہ عنہ بیان کرتے ہیں : سیدنا عکاف بن وداعہ ہلالی رضی اللہ عنہ ، نبی اکرم صلی اللہ علیہ وسلم کی خدمت میں حاضر ہوئے ، نبی اکرم صلی اللہ علیہ وسلم نے دریافت کیا : اے عکاف ! کیا تمہاری بیوی ہے ؟ انہوں نے عرض کی : جی نہیں ! نبی اکرم صلی اللہ علیہ وسلم نے دریافت کیا : کیا کنیز بھی نہیں ہے ؟ انہوں نے عرض کی : جی نہیں ! نبی اکرم صلی اللہ علیہ وسلم نے ارشاد فرمایا : کیا تم تندرست اور خوشحال ہو ؟ انہوں نے عرض کی : جی ہاں ! ہر طرح کی حمد ، اللہ تعالیٰ کے لئے مخصوص ہے ، نبی اکرم صلی اللہ علیہ وسلم نے ارشاد فرمایا : پھر تم شیاطین کے بھائیوں میں سے ہو ، یا تو تم عیسائیوں کے راہبوں میں ہوتے ، تو ان میں سے ایک ہوتے ، اگر تم ہم میں سے ہو گے ؟ تو تم وہ کرو ، جس طرح ہم کرتے ہیں اور ہماری سنت میں نکاح کرنا شامل ہے ، تمہارے برے لوگ کنوارے ہیں ، اور بری موت کا شکار ہونے والے کنوارے ہیں کیا وہ شیطان کی پیروی کرنا چاہتے ہیں ؟ میرے خیال میں شیاطین کا کوئی بھی ہتھیار ، نیک لوگوں کے بارے اس سے زیادہ تیز نہیں ہے ، جو مردوں اور عورتوں کا تعلق ہوتا ہے ، البتہ شادی کرنے والے لوگوں کا معاملہ مختلف ہے ، وہ پاک اور خیانت ( یا فحاشی ) سے بری ہوتے ہیں ۔ اس کے بعد راوی نے پوری حدیث ذکر کی ہے ، جو سیدنا ابوزر غفاری رضی اللہ عنہ کی نقل کردہ روایت کی مانند ہے ، تا ہم اس میں ان کے یہ الفاظ ہیں : ” نبی اکرم صلی اللہ علیہ وسلم نے فرمایا : اے عکاف ! تمہارا ستیاناس ہو تم شادی کر لو ! کیونکہ تم درمیان کے لوگوں میں سے ہو ( یا تذبذب کا شکار لوگوں میں سے ہو ) راوی کہتے ہیں : سیدنا عکاف رضی اللہ عنہ نے عرض کی : یا رسول اللہ ! میں اس وقت تک شادی نہیں کروں گا ، جب تک آپ جس سے چاہیں ، میری شادی نہیں کروا دیتے ، راوی کہتے ہیں : تو نبی اکرم صلی اللہ علیہ وسلم نے فرمایا : پھر میں اللہ کا نام لے کر اور اس کی برکت کے ساتھ ، تمہاری شادی کریمہ بنت کلثوم حمیری سے کرواتا ہوں ۔
یہ روایت امام ابویعلیٰ اور امام طبرانی نے نقل کی ہے ، اس کی سند میں ایک راوی معاویہ بن یحیی صدفی ہے اور وہ ضعیف ہے ۔

سیدنا ابوہریرہ رضی اللہ عنہ بیان کرتے ہیں : اگر میری زندگی کا صرف ایک دن باقی رہ گیا ہو ، تو میں ایسی حالت میں اللہ تعالیٰ کی بارگاہ میں حاضر ہوؤں گا کہ میری بیوی موجود ہو ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تمہارے برے لوگ ، تمہارے کنوارے ہیں “ ۔
یہ روایت امام ابویعلیٰ نے اور امام طبرانی نے معجم اوسط میں نقل کی ہے ، اس کی سند میں ایک راوی خالد بن اسماعیل مخزومی ہے ۔ اور وہ متروک ہے ۔

سیدنا عبداللہ بن مسعود رضی اللہ عنہ فرماتے ہیں : اگر مجھے یہ پتہ چل جائے کہ میری زندگی کے صرف دس دن باقی رہ گئے ہیں ، تو میں اس بات کو پسند کروں گا کہ ان کے دوران میری بیوی مجھ سے جدا نہ ہو ۔
یہ روایت امام طبرانی نے نقل کی ہے ، اس کی سند میں ایک راوی عبدالرحمن بن عبداللہ مسعودی ہے وہ ثقہ ہے ، لیکن اختلاط کا شکار ہو گیا تھا ، اس روایت کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے نسوانیت ظاہر کرنے والے مردوں ، جو عورتوں کے ساتھ مشابہت رکھتے ہیں ، اور مردانگی کا اظہار کرنے والی عورتوں ، جو مردوں کے ساتھ مشابہت رکھتی ہیں ، اور مردوں میں سے کنوارے رہنے والے لوگوں ، جو یہ کہتے ہیں کہ ہم شادی نہیں کریں گے ، اور خواتین میں سے اکیلی رہنے والی عورتوں ، جو اس کی مانند بات کہتی ہیں اور ویرانے میں تنہا سوار ( ان سب پر ) لعنت کی ہے ۔ ( راوی بیان کرتے ہیں : ) یہ بات صحابہ کرام پر گراں گزری ، اور یہ چیز ان کے چہروں سے ظاہر ہوئی ، تو نبی اکرم صلی اللہ علیہ وسلم نے ارشاد فرمایا : ( اس سے مراد یہ ہے ) کہ جو تنہا رات گزارتا ہے ( یعنی ویرانے میں رات کے وقت تنہا سفر کرتا ہے ) ۔
یہ روایت امام أحمد نے نقل کی ہے اس کی سند میں ایک راوی طبیب بن محمد ہے ، جسے ابن حبان نے ثقہ قرار دیا ہے ، عقیلی نے اسے ضعیف کہا: ہے ، اس روایت کے بقیہ رجال صحیح کے رجال ہیں ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” چار لوگ ہیں ، جن پر اللہ تعالیٰ نے عرش کے اوپر سے لعنت کی ہے اور فرشتوں نے اس پر آمین کہا: ہے ، وہ شخص جو خواتین کے حوالے سے اپنے آپ کو محفوظ رکھے ، اور شادی نہ کرے اور کوئی کنیز نہ رکھے کہ اس کے ہاں اولاد نہ ہو جائے ، اور وہ شخص جو عورتوں کے ساتھ مشابہت رکھتا ہے جبکہ اللہ تعالیٰ نے اسے مرد بنایا ہے اور وہ عورت جو مردوں کے ساتھ مشابہت رکھتی ہے ، حالانکہ اللہ تعالیٰ نے اُسے عورت بنایا ہے اور مسکینوں کو گمراہ کرنے والا شخص “ ۔ خالد بن زبرقان بیان کرتے ہیں : اس سے مراد ان کا مذاق اڑانے والا شخص ہے ، جیسے وہ کسی غریب سے یہ کہے کہ تم آؤ ! تاکہ میں تمہیں کچھ دوں ، جب دوسرا شخص اس کے پاس آئے تو وہ شخص کہے : میرے پاس کچھ نہیں ہے ، یا نابینا سے یہ کہے کہ تم کنویں سے بچ کے رہو ! تم جانور سے بچ جاؤ ! حالانکہ اس کے آگے کچھ نہ ہو ، یا کوئی شخص کسی علاقے کا پتہ دریافت کرے ، تو وہ اس کی رہنمائی دوسرے راستے کی طرف کر دے ۔
یہ روایت امام طبرانی نے حماد بن عبدالرحمن عکی کے حوالے سے خالد بن زبرقان سے نقل کی ہے اور یہ دونوں راوی ضعیف ہیں ۔

سیدنا ابونجیح رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص نکاح کرنے جتنا خوشحال ہو اور پھر وہ نکاح نہ کرے ، تو اس کا مجھ سے تعلق نہیں “ ۔
یہ روایت امام طبرانی نے معجم اوسط اور معجم کبیر میں نقل کی ہے اور اس کی سند ” مرسل “ ہے اور حسن ہے ، جیسا کہ یحیی بن معین نے یہ بات بیان کی ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم قریش کے کچھ نوجوانوں کے پاس تشریف لائے ، آپ نے فرمایا : اے نوجوانوں کے گروہ ! تم میں سے جو شخص یہ قدرت رکھتا ہو ، اسے نکاح کر لینا چاہیے ( راوی کو شک ہے ، شاید یہ الفاظ ہیں : ) اسے شادی کر لینی چاہیے ، ورنہ اس پر روزہ رکھنا لازم ہے کیونکہ یہ اس کی شہوت کو ختم کر دے گا “ ۔
یہ روایت امام بزار نے اور امام طبرانی نے معجم اوسط میں نقل کی ہے ، امام طبرانی کے رجال ثقہ ہیں ۔

سیدنا عبید بن سعد رضی اللہ عنہ بیان کرتے ہیں : ان تک نبی اکرم صلی اللہ علیہ وسلم کا یہ فرمان پہنچا ہے : آپ نے ارشاد فرمایا ہے : ” جو شخص میری فطرت سے محبت رکھتا ہے ، اُسے میری سنت کی پیروی کرنی چاہیے اور میری سنت میں نکاح کرنا شامل ہے “ ۔
یہ روایت امام ابویعلیٰ نے نقل کی ہے اور اس کے رجال ثقہ ہیں ، اگرچہ سیدنا عبید بن سعد رضی اللہ عنہ صحابی ہیں ، لیکن
یہ روایت ” مرسل “ ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے نوجوانوں کے گروہ ! تم میں سے جو شخص صاحب حیثیت ہو ، اسے شادی کر لینی چاہیے اور جو نہ ہو ، تو اس پر روزے رکھنا لازم ہے “ ۔ راوی کہتے ہیں : میرا خیال ہے آپ نے یہ بھی ارشاد فرمایا تھا : ” یہ چیز ( یعنی روزے رکھنا ) اس کی شہوت کو ختم کر دے گی “ ۔
یہ روایت امام بزار نے اور امام طبرانی نے معجم اوسط میں نقل کی ہے اور امام طبرانی کے رجال ثقہ ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم شادی کرنے کا حکم دیتے تھے اور کنوارے رہنے سے منع کرتے تھے ، اور اس بارے میں سختی کرتے تھے ، آپ ارشاد فرماتے تھے : ” تم محبت کرنے والی اور اولاد پیدا کرنے کی صلاحیت رکھنے والی عورتوں کے ساتھ شادی کرو ! کیونکہ قیامت کے دن میں دیگر انبیاء کے سامنے تمہاری کثرت پر فخر کا اظہار کروں گا“ ۔
یہ روایت امام أحمد نے اور امام طبرانی نے معجم اوسط میں حفص بن عمر کے حوالے سے سیدنا انس رضی اللہ رضی اللہ عنہ سے نقل کی ہے ، ابن ابوحاتم نے اس کا ذکر کیا ہے ، ایک جماعت نے اس سے روایت نقل کی ہے ، اس روایت کے بقیہ رجال صحیح کے رجال ہیں ۔

سیدنا سعید بن العاص رضی اللہ عنہ بیان کرتے ہیں : سیدنا عثمان بن مظعون رضی اللہ عنہ نے عرض کی : یا رسول اللہ ! آپ مجھے خصی ہو جانے کی اجازت دیجیے ! نبی اکرم صلی اللہ علیہ وسلم نے ان سے فرمایا : ” بیشک اللہ تعالیٰ نے رہبانیت کی جگہ ہمیں نرم اور سیدھا دین عطا کیا ہے ، اور ہر بلندی پر چڑھتے ہوئے تکبیر ( کہنے کا حکم عطا کیا ہے ) اگر تم ہم میں سے ہو ، تو وہ کرو جو ہم کرتے ہیں“ ۔
یہ روایت امام طبرانی نے نقل کی ہے ، اس کی سند میں ایک راوی ابراہیم بن زکریا ہے اور وہ ضعیف ہے ۔

سیدنا انس بن مالک رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص شادی کر لے ، اُسے نصف عبادت عطا کر دی گئی “ ۔
یہ روایت امام ابویعلیٰ نے نقل کی ہے ، اس کی سند میں ایک راوی عبدالرحیم عمی ہے اور وہ متروک ہے ۔

سیدنا انس رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص شادی کر لے ، وہ نصف ایمان مکمل کر لیتا ہے ، تو باقی نصف کے بارے میں ، اُسے اللہ سے ڈرتے رہنا چاہیے “ ۔
یہ روایت امام طبرانی نے معجم اوسط میں دو اسناد کے ساتھ نقل کی ہے اور ان دونوں میں ایک راوی یزید رقاشی اور ایک راوی جعفر جعفی ہے ، اور یہ دونوں راوی ضعیف ہیں ، ویسے ان دونوں کی توثیق کی گئی ہے ۔

ابونجیح روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مسکین ، مسکین ، مسکین وہ شخص ہے ، جس کی بیوی نہ ہو ، اگرچہ اس کے پاس بہت سا مال ہو ، اور مسکنیہ ، مسکینہ ، مسکینہ وہ عورت ہے ، جس کا شوہر نہ ہو ، اگرچہ اس کا مال بہت ہو “ ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ، البتہ ابونجیح کو صحابی ہونے کا شرف حاصل نہیں ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے قریش کے نوجوانو ! تم زنا نہ کرو اور تم اپنی شرمگاہوں کی حفاظت کرو ، خبردار ! جو شخص اپنی شرمگاہ کی حفاظت کرے گا ، اسے جنت نصیب ہو گی “ ۔

ایک روایت میں یہ الفاظ ہیں : ” خبردار ! جو شخص اپنی شرمگاہ کی حفاظت کرے گا ، وہ جنت میں داخل ہو گا“ ۔
یہ روایت امام بزار نے اور امام طبرانی نے معجم کبیر اور معجم اوسط میں نقل کی ہے ، اور اس کے رجال صحیح کے رجال ہیں ۔

سیدنا سہل بن حنیف رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم لوگ شادی کرو ! کیونکہ میں دوسری امتوں کے سامنے تمہاری کثرت کی وجہ سے فخر کا اظہار کروں گا “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی موسیٰ بن عبیدہ ہے اور وہ ضعیف ہے ۔