مجمع الزوائد ومنبع الفوائد

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب کوئی قوم ، کسی فرد کو اپنے ساتھ لاحق کر لے ، تو وہ ان کا وارث بنے گا “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ہیثم بن عدی ہے ، امام بخاری رحمہ اللہ کہتے ہیں : یہ جھوٹ بولتا تھا ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اسلام میں زنا کی گنجائش نہیں ہے ( یعنی اس کے ذریعے نسبی تعلق ثابت نہیں ہو گا ) جس شخص نے زمانہ جاہلیت میں زنا کیا تھا اور پھر اسے اُس کے عصبہ کے ساتھ لاحق کر دیا گیا ، یا جو شخص کسی ایسے بچے کو دعوی کرتا ہے ، جس کا ثبوت شرعی طریقے سے نہ ہو ، تو نہ وہ ( بچہ ) وارث بنے گا اور نہ اس کا وارث بنا جائے گا“ ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی عمرو بن حصین عقیلی ہے اور وہ متروک ہے ۔