مجمع الزوائد ومنبع الفوائد

سیدنا عبداللہ بن مسعود رضی اللہ عنہ فرماتے ہیں : ایک شخص نے اپنے مال کے ” ایک حصے “ کے بارے میں اس شخص کے لئے وصیت کر دی تو نبی اکرم صلی اللہ علیہ وسلم نے اس ” حصے “ کو ” چھٹا حصہ “ قرار دیا ۔
یہ روایت امام بزار نے نقل کی ہے اس کی سند میں ایک راوی محمد بن عبیداللہ عرزمی ہے اور وہ ضعیف ہے ۔

ان کے حوالے سے یہ بات منقول ہے : ایک شخص نے نبی اکرم صلی اللہ علیہ وسلم کے زمانہ اقدس میں ایک شخص کے لئے اپنے مال کا ” ایک حصہ “ مخصوص کر دیا پھر اس شخص کا انتقال ہو گیا یہ پتہ نہیں چلتا تھا کہ اس حصے سے مراد کیا ہے ؟ یہ معاملہ نبی اکرم صلی اللہ علیہ وسلم کے سامنے پیش کیا گیا ، تو نبی اکرم صلی اللہ علیہ وسلم نے اس ” حصے “ سے مراد اس شخص کے مال کا ” چھٹا “ حصہ لیا ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی محمد بن عبیداللہ عرزمی ہے اور وہ ضعیف ہے ۔