مجمع الزوائد ومنبع الفوائد

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ نے تمہاری وفات کے قریب تمہارے اموال کے ایک تہائی حصے کو تم پر صدقہ کیا ہے “ ۔
یہ روایت امام أحمد نے اور امام بزار نے اور امام طبرانی نے نقل کی ہے اس کی سند میں ایک راوی ابوبکر بن ابومریم ہے ، جو اختلاط کا شکار ہو گیا تھا ۔

سیدنا معاذ بن جبل رضی اللہ عنہ نے نبی اکرم صلی اللہ علیہ وسلم کا یہ فرمان نقل کیا ہے : ” بے شک اللہ تعالیٰ نے تمہاری وفات کے قریب تمہارے اموال کے ایک تہائی حصے کو تم پر صدقہ کیا ہے تاکہ تمہاری زندگی میں یہ چیز اضافی ہو جائے ، اور یہ تمہارے اعمال میں اضافے کا باعث بن جائے “ ۔
یہ روایت امام طبرانی نے نقل کی ہے ، اس کی سند میں ایک راوی عقبہ بن حمید ضبی ہے ، جسے ابن حبان اور دیگر حضرات نے ثقہ قرار دیا ہے ، امام أحمد نے اسے ضعیف کہا: ہے ۔

سیدنا خالد بن عبید سلمی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے تمہاری وفات کے قریب تمہارے اموال کا ایک تہائی حصہ تمہیں عطا کیا ہے ، تاکہ تمہارے اعمال میں اضافہ ہو جائے “ ۔
یہ روایت امام طبرانی نے نقل کی ہے اور اس کی سند حسن ہے ۔

سیدنا عبداللہ بن مسعود رضی اللہ عنہ ” مرفوع “ حدیث کے طور پر یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا : ) ” مسلمان شخص موت کے قریب ایک تہائی مال کے بارے میں بھلائی کر دے ، تو اللہ تعالیٰ اس کے ذریعے اس کا پورا تزکیہ کر دیتا ہے “ ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا عمرو بن قاری رضی اللہ عنہ بیان کرتے ہیں : نبی اکرم صلی اللہ علیہ وسلم تشریف لائے آپ نے سیدنا سعد رضی اللہ عنہ کو بیمار چھوڑا تھا ، یہ اس وقت کی بات ہے جب آپ حنین تشریف لے گئے تھے ، جب آپ جعرانہ سے عمرہ کرنے کے لئے تشریف لائے ، تو آپ ۔ سیدنا سعد رضی اللہ عنہ کے پاس تشریف لائے وہ انتہائی بیمار تھے ، انہوں نے عرض کی : یا رسول اللہ ! میرے پاس مال بھی ہے اور میری آل اولاد نہیں ہے ، تو کیا میں اپنے پورے مال کے بارے میں وصیت کر دوں یا اسے صدقہ کر دوں ؟ نبی اکرم صلی اللہ علیہ وسلم نے ارشاد فرمایا : جی نہیں ! انہوں نے عرض کی : کیا میں دو تہائی کے بارے میں وصیت کر دوں ؟ نبی اکرم صلی اللہ علیہ وسلم نے ارشاد فرمایا : جی نہیں ! انہوں نے عرض کی : نصف کے بارے میں وصیت کر دوں ؟ نبی اکرم صلی اللہ علیہ وسلم نے ارشاد فرمایا : جی نہیں ! انہوں نے عرض کی : ایک تہائی کے بارے میں وصیت کر دوں ؟ نبی اکرم صلی اللہ علیہ وسلم نے فرمایا : جی ہاں ! لیکن یہ بھی زیادہ ہے ، انہوں نے عرض کی : یا رسول اللہ کیا میں اس سرزمین پر مر جاؤں گا ؟ جہاں سے میں ہجرت کر کے نکلا تھا ، نبی اکرم صلی اللہ علیہ وسلم نے فرمایا : مجھے یہ امید ہے کہ اللہ تعالیٰ تمہیں سر بلندی عطا کرے گا ( یعنی تمہیں اور بھی زندگی دے گا ) اور تمہارے ذریعے کچھ لوگوں کو رسوا کرے گا اور دوسرے لوگوں کو تمہارے ذریعے نفع دے گا ، اے عمرو بن قاری ! اگر میرے بعد سعد کا انتقال یہاں ہوتا ہے ، تو تم اسے ( یہاں ) دفن کرنا “ ۔ نبی اکرم صلی اللہ علیہ وسلم نے مدینہ منورہ کے راستے کی طرف اپنے دست مبارک کے ذریعے اس طرح اشارہ کر کے فرمایا کہ یہاں دفن کرنا ۔
یہ روایت امام أحمد اور امام طبرانی نے نقل کی ہے تاہم انہوں نے یہ الفاظ نقل کیے ہیں : فتح مکہ کے دن نبی اکرم صلی اللہ علیہ وسلم سیدنا سعد بن مالک رضی اللہ عنہ کے پاس تشریف لائے وہ اس وقت مکہ میں تھے یہ آپ کے حنین چلے جانے اور جعرانہ سے واپس آنے اور مال غنیمت تقسیم کر دینے کے بعد کی بات ہے ، نبی اکرم صلی اللہ علیہ وسلم نے بیت اللہ کا طواف کیا ، صفا و مروہ کی سعی کی ۔ ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق روایت نقل کی ہے اس کی سند میں ایک راوی عیاض بن عمرو قاری ہے ، کسی نے اس پر جرح بھی نہیں کی ہے اور کسی نے اس کی توثیق بھی نہیں کی ہے ۔

عثمان بن عبدالرحمن مخزومی ، اپنے والد کے حوالے سے ، اپنے دادا کا یہ بیان نقل کرتے ہیں : سیدنا سعد رضی اللہ عنہ نے نبی اکرم صلی اللہ علیہ وسلم سے وصیت کے بارے میں دریافت کیا ، تو نبی اکرم صلی اللہ علیہ وسلم نے فرمایا : ایک چوتھائی حصے کے بارے میں ( وصیت کر دو ) ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا ابوقتادہ رضی اللہ عنہ بیان کرتے ہیں : سیدنا براء بن معرور رضی اللہ عنہ نے نبی اکرم صلی اللہ علیہ وسلم کے لئے اپنے مال میں ایک تہائی حصے کی وصیت کی کہ نبی اکرم صلی اللہ علیہ وسلم جہاں چاہیں اُسے خرچ کر سکتے ہیں ، تو نبی اکرم صلی اللہ علیہ وسلم نے وہ مال اُن کے بچوں کو واپس کر دیا ۔
یہ روایت امام طبرانی نے نقل کی ہے ، اس کے تابعی سے میں واقف نہیں ہوں ، اس روایت کے بقیہ رجال ثقہ ہیں ۔