مجمع الزوائد ومنبع الفوائد

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ کی معصیت کے بارے میں نذر پوری نہیں کی جائے گی “ ۔
یہ روایت امام أحمد نے نقل کی ہے ، سلیمان بن موسیٰ کے بارے میں یہ بات کہی گئی ہے : اس نے سیدنا جابر رضی اللہ عنہ سے سماع نہیں کیا ہے ۔ انہوں نے
یہ روایت صحیح کے رجال کے ساتھ نقل کی ہے ، لیکن یہ سیدنا جابر رضی اللہ عنہ پر ” موقوف “ ہے ۔

ایک صاحب بیان کرتے ہیں : انہوں نے اپنے ایک رشتے دار کے ساتھ رسی میں بندھ کر حج کیا ، جب نبی اکرم صلی اللہ علیہ وسلم نے اس کا ملاحظہ کیا ، تو فرمایا : اس کی کیا وجہ ہے ؟ انہوں نے بتایا کہ یہ نذر ہے ، تو نبی اکرم صلی اللہ علیہ وسلم نے رسی کے بارے میں حکم دیا کہ اسے کاٹ دیا جائے ۔
یہ روایت امام أحمد نے نقل کی ہے اور اس کی سند میں ایسا راوی ہے ، جس کا نام بیان نہیں کیا گیا ہے ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم نے دو آدمیوں کو پایا کہ وہ دونوں ایک دوسرے سے ملے ہوئے تھے اور پیدل چلتے ہوئے بیت اللہ کی طرف جا رہے تھے ، نبی اکرم صلی اللہ علیہ وسلم نے دریافت کیا : اس رسی کا کیا معاملہ ہے ؟ ان دونوں نے عرض کی : یا رسول اللہ ! ہم نے یہ نذر مانی تھی کہ اس طرح رسی میں بندھ کر پیدل چل کر ، بیت اللہ کی طرف جائیں گے ، نبی اکرم صلی اللہ علیہ وسلم نے ارشاد فرمایا : یہ چیز نذر نہیں ہوتی ہے ، آپ نے ان دونوں کی رسی کو کٹوا دیا اور فرمایا : نذر اس چیز کے بارے میں ہوتی ہے ، جس کے ذریعے اللہ تعالیٰ کی رضا کا حصول مراد لیا گیا ہو ۔ ( علامہ ہیثمی فرماتے ہیں : ) میں یہ کہتا ہوں : امام ابوداؤد نے اس روایت کا آخری حصہ نقل کیا ہے ۔
یہ روایت امام أحمد نے نقل کی ہے اور اس کی سند میں ایک راوی عبدالرحمن بن ابوزناد ہے ، جسے ایک جماعت نے ثقہ قرار دیا ہے اور دیگر لوگوں نے اسے ضعیف کہا: ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کا گزر دو آدمیوں کے پاس سے ہوا ، جو بندھے ہوئے تھے اور حج کے لئے جا رہے تھے ، انہوں نے نذر مانی ہوئی تھی ، نبی اکرم صلی اللہ علیہ وسلم نے فرمایا : تم دونوں اپنی رسی کو اتار دو ، ان دونوں نے عرض کی : یا رسول اللہ ! یہ نذر ہے ، نبی اکرم صلی اللہ علیہ وسلم نے فرمایا : تم دونوں اپنی رسی کو اتار دو اور پھر حج کے لیے جاؤ ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی محمد بن کریب ہے اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ایک سفر کے دوران مکہ کے قریب ایک عورت کو دیکھا ، جس نے بال بکھرائے ہوئے تھے ( یعنی وہ پردے کے بغیر تھی ) ، نبی اکرم صلی اللہ علیہ وسلم نے دریافت کیا : اس کا کیا معاملہ ہے ؟ لوگوں نے بتایا کہ یہ قریش سے تعلق رکھنے والی عورت ہے اور اس نے یہ نذر مانی ہے کہ وہ اپنے بال کھلے رکھ کر ( یعنی پردے کے بغیر ) حج کے لئے جائے گی ، تو نبی اکرم صلی اللہ علیہ وسلم نے اسے یہ حکم دیا کہ وہ چادر لے ۔
یہ روایت امام بزار نے نقل کی ہے اور اس کی سند میں ایک راوی یحیی بن ابویحیی ہے ، یہ اس راوی کے علاوہ ہے ، جس کا ذکر ” میزان “ میں ہوا ہے کیونکہ اس سے فضل بن سہل اعرج نے روایت نقل کی ہے اور وہ زید بن حباب سے روایت نقل کرتا ہے اس روایت کے بقیہ رجال صحیح کے رجال ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” نذر صرف اس چیز کے بارے میں ہوتی ہے ، جس کے ذریعے اللہ تعالیٰ کی اطاعت کی گئی ہو ، قطع رحمی کے بارے میں نذر کی کوئی حیثیت نہیں ہوتی ہے اور آدمی جب مالک نہ ہو ، تو طلاق دینے ، یا غلام آزاد کرنے کی کوئی حیثیت نہیں ہوتی “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اور یہ الفاظ زائد نقل کیے ہیں : ” غصب کے بارے میں قسم کی کوئی حیثیت نہیں ہوتی “ اس میں یہ الفاظ ساقط ہیں : ” قطع رحمی کے بارے میں نذر کی کوئی حیثیت نہیں ہوتی “ ۔ معجم کبیر کے رجال ثقہ ہیں ۔

سیدنا علی بن ابوطالب رضی اللہ عنہ روایت کرتے ہیں : تمہارے لیے نبی اکرم صلی اللہ علیہ وسلم سے مجھے چھ چیزیں یاد ہیں : ” طلاق دینے کا حق صرف نکاح کے بعد ہوتا ہے ، غلام آزاد کرنا صرف ملکیت کے بعد ہوتا ہے اور معصیت کے بارے میں نذر پوری نہیں کی جاتی ۔ ۔ ۔ ۔ ۔ ۔ ۔ “ ۔ علامہ ہیثمی فرماتے ہیں : ) میں یہ کہتا ہوں : یہ مکمل روایت طلاق سے متعلق باب میں آئے گی ۔
یہ روایت امام طبرانی نے معجم صغیر میں نقل کی ہے اور اس کے رجال ثقہ ہیں ۔

سیدنا عبداللہ بن عمرو رضی اللہ عنہ بیان کرتے ہیں : ایک شدید گرم دن میں نبی اکرم صلی اللہ علیہ وسلم نے خطبہ دیا آپ نے ایک شخص کو کھڑے ہوئے ملاحظہ فرمایا ، وہ دیہاتی لگ رہا تھا اور دھوپ میں کھڑا ہوا تھا ، نبی اکرم صلی اللہ علیہ وسلم نے اس سے فرمایا : کیا وجہ ہے کہ میں تمہیں کھڑا ہوا دیکھ رہا ہوں ؟ اس نے کہا: میں نے یہ نذر مانی ہے کہ جب تک آپ خطبہ سے فارغ نہیں ہوں گے میں بیٹھوں گا نہیں ’ نبی اکرم صلی اللہ علیہ وسلم نے اس سے فرمایا : تم بیٹھ جاؤ ! یہ نذر نہیں ہوتی ہے ، نذر وہ ہوتی ہے ، جس کے ذریعے اللہ تعالیٰ کی رضا مراد لی گئی ہو ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی عبداللہ بن نافع مدنی ہے اور وہ ضعیف ہے ۔

سیدنا جابر رضی اللہ عنہ بیان کرتے ہیں : سیدنا ابواسرائیل رضی اللہ عنہ نے یہ نذر مانی کہ وہ پورا دن ، رات ہونے تک دھوپ میں کھڑے رہیں گے اور بات چیت نہیں کریں گے ، تو نبی اکرم صلی اللہ علیہ وسلم نے انہیں یہ حکم دیا کہ وہ بیٹھ بھی جائیں اور بات چیت بھی کریں ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی حجاج بن ارطاۃ ہے اور وہ تدلیس کرنے والا ہے ۔

سیدنا نواس بن سمعان کلابی رضی اللہ عنہ بیان کرتے ہیں : نبی اکرم صلی اللہ علیہ وسلم کی اونٹنی جدعاء چوری ہو گئی ، نبی اکرم صلی اللہ علیہ وسلم نے فرمایا : اگر اللہ تعالیٰ نے وہ مجھے واپس کروا دی تو میں اپنے پروردگار کا ضرور شکر ادا کروں گا ، وہ اونٹنی عربوں کے ایک قبیلے تک پہنچ گئی ، جس میں ایک مسلمان عورت بھی قید تھی ، وہاں یہ ہوتا تھا کہ جب اونٹ بیٹھتے تھے تو الگ الگ بیٹھا کرتے تھے اور اپنی گردن ڈال دیتے تھے اس عورت نے سوچا یوں لگتا ہے یہ اونٹنی کچھ مانوس سی لگتی ہے ، اللہ تعالیٰ نے اس کے ذہن میں یہ بات ڈال دی کہ وہ اس کے اوپر سوار ہو کر فرار ہو سکتی ہے ، اس نے لوگوں کو غفلت کی حالت میں پایا ، تو وہ اس اونٹنی پر سوار ہوئی اسے حرکت دی اور اس پر سوار ہو کر مدینہ منورہ آ گئی جب مسلمانوں نے اسے دیکھا تو وہ اس حوالے سے خوش ہوئے اور اس کے پہلو میں چلتے ہوئے ، نبی اکرم صلی اللہ علیہ وسلم تک آ گئے نبی اکرم صلی اللہ علیہ وسلم نے جب اسے ملاحظہ فرمایا ، تو آپ نے فرمایا : ہر طرح کی حمد اللہ تعالیٰ کے لئے مخصوص ہے ، اس عورت نے عرض کی : یا رسول اللہ ! میں نے یہ نذر مانی تھی کہ اگر اللہ تعالیٰ نے مجھے اس اونٹنی پر نجات عطا کر دی ، تو میں اسے قربان کر کے اس کا گوشت مسکینوں کو کھلاؤں گی ، نبی اکرم صلی اللہ علیہ وسلم نے فرمایا : تم نے اسے برا بدلہ دیا ہے ، تمہاری نذر صرف اس چیز کے بارے میں ہو سکتی ہے ، جس کی تم مالک ہو ، راوی کہتے ہیں : ہم اس بات کا انتظار کرتے رہے کہ شاید نبی اکرم صلی اللہ علیہ وسلم روزہ رکھیں گے ، یا نماز پڑھیں گے ، لوگوں نے یہ گمان کیا کہ شاید آپ بھول گئے ہیں ، لوگوں نے عرض کی : یا رسول اللہ آپ نے تو یہ بات ارشاد فرمائی تھی کہ اگر اللہ تعالیٰ نے یہ اونٹنی مجھے واپس کر دی ، تو میں اللہ تعالیٰ کا شکر ادا کروں گا ، نبی اکرم صلی اللہ علیہ وسلم نے فرمایا : کیا میں نے یہ نہیں کہا: تھا : ہر طرح کی حمد اللہ تعالیٰ کے لئے مخصوص ہے ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی عمرو بن واقد قرشی ہے ، جسے محمد بن مبارک صوری نے ثقہ قرار دیا ہے ، لیکن ان کی اس بات کو مسترد کیا گیا ہے ائمہ نے اس راوی کو ضعیف قرار دیا ہے اور اس کی حدیث کو متروک قرار دیا ہے ۔

سیدنا عبدالله بن بدر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” معصیت کے بارے میں نذر کی کوئی حیثیت نہیں ہوتی “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ابوحویرث ہے ، جسے امام أحمد اور دیگر حضرات نے ضعیف قرار دیا ہے ابن حبان نے اسے ثقہ کہا: ہے اس روایت کے بقیہ رجال ثقہ ہیں ۔

سیدنا ابوثعلبہ رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا میں نے عرض کی : یا رسول اللہ ! میں نے یہ نذر مانی تھی کہ میں زمانہ جاہلیت کے ایک بت کے پاس اپنے اونٹ کو ذبح کروں گا ، نبی اکرم صلی اللہ علیہ وسلم نے فرمایا : تم اپنی نذر کو پورا کر دو لیکن اپنے پروردگار کی نافرمانی نہ کرو پھر نبی اکرم صلی اللہ علیہ وسلم نے فرمایا : معصیت کے بارے میں قطع رحمی کے بارے میں اور آدمی جس چیز کا مالک نہ ہو ، ( اس کے بارے میں ) نذر کا پورا کرنا لازم نہیں ہوتا ۔
یہ روایت امام طبرانی نے معجم کبیر میں ایک طویل حدیث میں نقل کی ہے ، جو اس سے پہلے مکمل روایت لقطہ سے متعلق باب میں گزر چکی ہے اس کی سند میں ایک راوی یزید بن سنان ہے ، جسے ابوحاتم اور دیگر حضرات نے ثقہ قرار دیا ہے اور ایک جماعت نے اسے ضعیف کہا: ہے ۔

سیدنا کردم بن قیس رضی اللہ عنہ بیان کرتے ہیں : میں نے عرض کی : یا رسول اللہ ! میں نے یہ نذر مانی تھی کہ میں فلاں فلاں جگہ پر ایک اونٹ قربان کروں گا ، نبی اکرم صلی اللہ علیہ وسلم نے ارشاد فرمایا : تم اپنی نذر پوری کر دو ، لیکن قطع رحمی کے بارے میں نذر کی کوئی حیثیت نہیں ہوتی اور آدمی جس چیز کا مالک نہ ہو ، اس کے بارے میں بھی نذر کی کوئی حیثیت نہیں ہوتی “ ۔
یہ روایت امام طبرانی نے ایک طویل حدیث کے ضمن میں نقل کی ہے ، جو آگے چل کر نکاح سے متعلق باب میں آئے گی ، اگر اللہ نے چاہا اور اس کی سند میں ایسا راوی ہے ، جس سے میں واقف نہیں ہوں ۔

علی بن زید بن جدعان بیان کرتے ہیں : سیدنا صفوان بن معطل رضی اللہ عنہ نے یہ نذر مانی کہ وہ تلوار کے ذریعے سیدنا حسان بن ثابت رضی اللہ عنہ پر ضرب لگائیں گے ۔
یہ روایت امام طبرانی نے معجم کبیر میں نقل کی ہے ، علی بن زید نامی راوی کے بارے میں کلام کیا گیا ہے اس کی نقل کردہ حدیث حسن ہے اور
یہ روایت ” مرسل “ ہے اس کے بقیہ رجال ثقہ ہیں ۔