مجمع الزوائد ومنبع الفوائد

سیدنا جبیر بن معطم رضی اللہ عنہ کے بارے میں یہ بات منقول ہے : انہوں نے اپنی قسم کی جگہ دس ہزار درہم فدیہ کے طور پر دیدیے تھے اور پھر یہ بات بیان کی تھی : رب کعبہ کی قسم ! اگر میں حلف اٹھاتا تو سچا ہوتا لیکن یہ ایک ایسی چیز ہے ، جسے میں نے اپنی قسم کی جگہ فدیہ کے طور پر دے دیا ہے ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدنا اشعث بن قیس رضی اللہ عنہ فرماتے ہیں : میں نے اپنی قسم ، ایک مرتبہ ستر ہزار کے عوض میں خریدی تھی ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عیسیٰ بن مسیب بجلی ہے اور وہ ضعیف ہے ۔

عبدالقاہر بن سری بیان کرتے ہیں : ایک شخص ابوسوار عدوی کے ہاں چھپ گیا ، یہ حجاج بن یوسف کے زمانے کی بات ہے ، حجاج کو بتایا گیا کہ وہ شخص ابوسوار کے ہاں ہے ، حجاج نے انہیں بھیجا جب وہ آئے تو حجاج نے ان سے دریافت کیا : وہ شخص تمہارے پاس ہے ؟ انہوں نے جواب دیا : میرے پاس نہیں ہے ، اس نے کہا: اگر ایسا نہ ہو ، تو سوار کی والدہ ، یعنی ابوسوار کی اہلیہ ، کو طلاق ہے ، تو انہوں نے کہا: میں نے اس خاتون کے پاس سے نکلتے ہوئے اُسے طلاق دینے کی نیت نہیں کی تھی ، اس نے کہا: اچھا ، پھر آپ اسلام سے بری ہوں گے ، انہوں نے دریافت کیا : پھر تم کہاں جاؤ گے ؟ تو اس نے انہیں چھوڑ دیا ۔
یہ روایت امام طبرانی نے معجم صغیر میں نقل کی ہے اور اس کے رجال ثقہ ہیں ۔