مجمع الزوائد ومنبع الفوائد

سیدنا ابوموسی اشعری رضی اللہ عنہ بیان کرتے ہیں : نبی اکرم صلی اللہ علیہ وسلم کے سامنے دو آدمیوں نے ایک زمین کے بارے میں مقدمہ پیش کیا جو ان دونوں میں سے کسی ایک کی تھی اور ان کا تعلق حضرموت سے تھا ، راوی بیان کرتے ہیں : ان دونوں میں سے ایک حلف اٹھانے لگا تو دوسرا پریشان ہو گیا اور بولا: ایسی صورت میں تو یہ میری زمین لے جائے گا ، نبی اکرم صلی اللہ علیہ وسلم نے ارشاد فرمایا : اگر اس نے اپنی قسم کی بنیاد پر ظلم کے طور پر وہ زمین ہتھیائی ہو گی ، تو یہ ان افراد میں سے ایک ہو گا کہ قیامت کے دن اللہ تعالٰی نہ تو اس کی طرف نظر کرے گا اور نہ ہی اس کا تزکیہ کرے گا اور اس کے لئے دردناک عذاب ہو گا ، راوی بیان کرتے ہیں : تو دوسرا شخص پریشان ہو گیا اور اس نے وہ زمین واپس کر دی ۔
یہ روایت امام أحمد نے ، اور امام بزار نے ، امام ابویعلیٰ نے اور امام طبرانی نے معجم کبیر اور معجم اوسط میں نقل کی ہے ، اور اس کی سند حسن ہے ۔

سیدنا عدی بن عمیرہ رضی اللہ عنہ بیان کرتے ہیں : کندہ سے تعلق رکھنے والے ایک صاحب جن کا نام امرء القیس بن عابس تھا ، اس نے نبی اکرم صلی اللہ علیہ وسلم کے سامنے حضر موت سے تعلق رکھنے والے ایک شخص کے خلاف مقدمہ پیش کیا ، نبی اکرم صلی اللہ علیہ وسلم نے حضرمی شخص کے لیے ثبوت فراہم کرنے کا فیصلہ دیا ، تو اس کے پاس کوئی ثبوت نہیں تھا ، نبی اکرم صلی اللہ علیہ وسلم نے امرء القیس کے لیے قسم کا فیصلہ دیا ، تو حضرمی نے کہا: یا رسول اللہ ! اگر آپ اسے قسم اٹھانے کا موقع دیں گے ، تو یہ اللہ کی قسم ( راوی کو شک ہے شاید یہ الفاظ ہیں : ) رب کعبہ قسم ! میری زمین لے جائے گا ، نبی اکرم صلی اللہ علیہ وسلم نے ارشاد فرمایا : ” جو شخص جھوٹی قسم اٹھا کر اس کے ذریعے کسی شخص کا مال ہتھیائے گا ، جب وہ اللہ تعالیٰ کی بارگاہ میں حاضر ہو گا ، تو اللہ تعالٰی اس پر غضبناک ہو گا “ ۔ رجاء نامی راوی نے یہ بات بیان کی ہے : پھر نبی اکرم صلی اللہ علیہ وسلم نے یہ آیت تلاوت کی : ” بے شک وہ لوگ جو اللہ کے نام کے عہد اور اس کے نام کی قسموں کے عوض میں ، تھوڑی قیمت کماتے ہیں “ ۔ امرہ القیس نے کہا: یا رسول اللہ ! جو شخص اسے چھوڑ دے ، اُسے کیا ثواب ملے گا ؟ نبی اکرم صلی اللہ علیہ وسلم نے فرمایا : جنت ، اس نے عرض کی : پھر میں آپ کو گواہ بنا کر یہ کہتا ہوں کہ میں نے ساری زمین اس کے لئے چھوڑ دی ۔
یہ روایت امام أحمد نے اور امام طبرانی نے معجم کبیر میں نقل کی ہے اور ان دونوں کے رجال ثقہ ہیں ۔

سیدنا عرس بن عمیرہ رضی اللہ عنہ بیان کرتے ہیں : حضرموت سے تعلق رکھنے والے ایک شخص اور امرء القیس بن عابس کے درمیان ایک زمین کے سلسلے میں مقدمہ تھا ، وہ لوگ نبی اکرم صلی اللہ علیہ وسلم کی خدمت میں حاضر ہوئے ، نبی اکرم صلی اللہ علیہ وسلم نے حضرمی سے ثبوت مانگا اس کے پاس کوئی ثبوت نہیں تھا ، نبی اکرم صلی اللہ علیہ وسلم نے امرء القیس کے لئے قسم اٹھانے کا فیصلہ دے دیا ، تو حضرمی نے عرض کی : یا رسول اللہ ! اگر آپ اسے قسم اٹھانے کا موقع دیں گے ، تو اللہ کی قسم یہ میری زمین لے جائے گا ، نبی اکرم صلی اللہ علیہ وسلم نے ارشاد فرمایا : جو شخص جھوٹی قسم اٹھا لے تاکہ اس کے ذریعے کسی مسلمان شخص کا مال ہتھیا لے ، تو جب وہ اللہ تعالیٰ کی بارگاہ میں حاضر ہو گا تو اللہ تعالیٰ اس پر غضبناک ہو گا“ ۔ پھر نبی اکرم صلی اللہ علیہ وسلم نے امرء القیس کو بلوایا اور اس کے سامنے یہ آیت تلاوت کی : ” بے شک وہ لوگ جو اللہ کے نام کے عہد اور اس کے نام کی قسموں کے عوض میں تھوڑی قیمت خریدتے ہیں ۔ ۔ ۔ ۔ ۔ ۔ ۔ ۔ ۔ ۔ “ الآیة تو امراء القیس نے کہا: یا رسول اللہ ! جو شخص اسے ترک کر دے ، اسے کیا ملے گا ؟ نبی اکرم صلی اللہ علیہ وسلم نے ارشاد فرمایا : جنت ، اس نے عرض کی : پھر میں آپ کو گواہ بنا کر یہ کہتا ہوں کہ میں نے اسے چھوڑ دیا ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

عیاض بن خالد بیان کرتے ہیں : میں نے دو آدمیوں کو سیدنا معقل بن یسار رضی اللہ عنہ کے سامنے جھگڑا کرتے ہوئے دیکھا ، سیدنا معقل بن یسار رضی اللہ عنہ نے کہا: نبی اکرم صلی اللہ علیہ وسلم نے ارشاد فرمایا ہے : ” جو شخص قسم اٹھا کر اس کے ذریعے کسی شخص کا مال ہتھیائے گا ، جب وہ اللہ تعالیٰ کی بارگاہ میں حاضر ہو گا ، تو اللہ تعالیٰ اس پر غضبناک ہو گا “ ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : میں اس بات کی گواہی دیتا ہوں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو بھی بندہ ، یا کنیز اس منبر کے پاس جھوٹی قسم اٹھا لے ، خواہ وہ ایک تر مسواک کے بارے میں ہی کیوں نہ ہو ، تو اس کے لئے جہنم واجب ہو جائے گی “ ۔
یہ روایت امام أحمد نے نقل کی ہے اور اس کے رجال ثقہ ہیں ۔

ابوسلمہ بیان کرتے ہیں : مروان نے کہا: تم لوگ جاؤ اور ان دو آدمیوں کے درمیان صلح کروا دو ، ان کی مراد سیدنا سعید بن زید رضی اللہ عنہ اور عروی بنت اویس نامی خاتون تھیں ، راوی کہتے ہیں : ہم لوگ سیدنا سعید بن زید رضی اللہ عنہ کے پاس آئے تو انہوں نے فرمایا : کیا تم لوگ یہ سمجھتے ہو ؟ کہ میں نے اس عورت کے حق میں کوئی کمی کی ہو گی ؟ میں اس بات کی گواہی دیتا ہوں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص بالشت بھر زمین ناحق طور پر لے گا ، اُسے سات زمینوں کا طوق پہنایا جائے گا اور جو شخص کسی قوم کی اجازت کے بغیر اُن کی بجائے کسی اور کی طرف نسبت ولاء قائم کرے گا ، اس پر اللہ تعالیٰ کی لعنت ہو گی اور جو شخص ( جھوٹی ) قسم کے ذریعے مسلمان شخص کا مال ہتھیائے گا ، تو اللہ تعالیٰ اس شخص کے لئے اس مال میں برکت نہیں رکھے گا “ ۔
یہ روایت امام أحمد نے نقل کی ہے ” صحیح “ میں اس کا یہ حصہ منقول ہے : ” جو شخص بالشت بھر زمین ہتھیائے گا ، اسے سات زمینوں کا طوق پہنایا جائے گا“ ۔ یہ روایت امام أحمد نے نقل کی ہے اور اس کے رجال ثقہ ہیں ، یہ روایت امام بزار نے اختصار کے ساتھ نقل کی ہے اور امام ابویعلی نے مکمل روایت کے طور پر نقل کی ہے ۔

سیدنا ابوسود رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” وہ جھوٹی قسم ، جس کے ذریعے کوئی شخص کسی مسلمان کا مال ہتھیا لے ، وہ رحم کو بانجھ کر دیتی ہے “ ۔
یہ روایت امام أحمد نے اور امام طبرانی نے معجم کبیر میں نقل کی ہے اور اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا عبدالرحمن بن عوف رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جھوٹی قسم مال لے جاتی ہے “ ( یہاں ایک لفظ کے بارے میں راوی کو شک ہے ، لیکن اس کا مفہوم یہی ہے ) ۔
یہ روایت امام بزار نے نقل کی ہے اور اس کے رجال صحیح کے رجال ہیں ، البتہ ابوسلمہ نامی راوی کا اپنے والد ( سیدنا عبدالرحمن بن عوف رضی اللہ عنہ ) سے سماع مستند طور پر ثابت نہیں ہے ، باقی اللہ بہتر جانتا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص ایسی قسم اٹھائے ، جو اس پر ( کوئی چیز ) لازم کرتی ہو ، اور وہ اس میں جھوٹا ہو ، تو اسے جہنم میں اپنے مخصوص ٹھکانے تک پہنچنے کے لئے تیار رہنا چاہیے “ ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی محمد بن عبداللہ بن علاثہ ہے ، جسے یحیی بن معین نے ثقہ قرار دیا ہے اور دیگر حضرات نے اسے ضعیف کہا: ہے ، لیکن اس کو ضعیف قرار دینا مسترد قرار دیا گیا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس اطاعت کا سب سے جلدی ثواب ملتا ہے ، وہ صلہ رحمی ہے ، جس اطاعت کا سب سے جلدی ثواب ملتا ہے وہ صلہ رحمی ہے اور بعض اوقات کسی گھرانے کے لوگ گناہگار ہوتے ہیں ، اُن کے مال زیادہ ہوتے ہیں ان کی تعداد زیادہ ہوتی جاتی ہے ، جبکہ وہ صلہ رحمی کرتے ہیں ، اور جس گناہ کی سب سے زیادہ جلدی سزا ملتی ہے ، وہ سرکشی اور جھوٹی قسم ہے ، جو مال لے جاتی ہے ، اور رحم کو بوجھل کر دیتی ہے اور آبادیوں کو برباد کر دیتی ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابودھماء اصعب ہے ، جس نفیلی نے ثقہ قرار دیا ہے اور ابن حبان نے اسے ضعیف کہا: ہے ۔

سیدنا سلمہ بن اکوع رضی اللہ عنہ بیان کرتے ہیں : نبی اکرم صلی اللہ علیہ وسلم نے منبر پر ارشاد فرمایا : ” جو شخص جھوٹی قسم اٹھائے وہ جہنم میں اپنے مخصوص ٹھکانے تک پہنچنے کے لئے تیار رہے “ ۔
یہ روایت امام طبرانی نے معجم اوسط اور معجم کبیر میں نقل کی ہے اور اس کے رجال ثقہ ہیں ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص جھوٹی قسم اٹھائے تاکہ اس کے ذریعے کسی مسلمان کا مال ہتھیا لے تو جب قیامت کے دن وہ اللہ تعالیٰ کی بارگاہ میں حاضر ہو گا تو اللہ تعالیٰ اس پر غضبناک ہو گا “ ۔ ( علامہ ہیثمی فرماتے ہیں : ) میں یہ کہتا ہوں : سیدنا جابر رضی اللہ عنہ کے حوالے سے ایک اور حدیث منقول ہے ، جسے امام ابوداؤد نے روایت کیا ہے اور وہ اس حدیث کے علاوہ ہے ۔
یہ روایت امام طبرانی نے معجم صغیر اور معجم اوسط میں نقل کی ہے اس کی سند میں ایک راوی عبداللہ بن بزیع ہے وہ کمزور ہے اس روایت کے بقیہ رجال ثقہ ہیں ۔

سیدنا اشعث بن قیس رضی اللہ عنہ بیان کرتے ہیں : سیدنا معاذ رضی اللہ عنہ اور ایک شخص کے درمیان اختلاف ہو گیا تو نبی اکرم صلی اللہ علیہ وسلم نے ان دونوں میں سے ایک پر قسم کی ادائیگی کا فیصلہ دیا تو دوسرے نے کہا: یا رسول اللہ ! آپ اسے حلف اٹھانے کا موقع دے رہے ہیں یہ تو یہ چیز لے جائے گا نبی اکرم صلی اللہ علیہ وسلم نے ارشاد فرمایا اگر اس نے جھوٹا حلف اٹھایا ( راوی بیان کرتے ہیں : ) تو نبی اکرم صلی اللہ علیہ وسلم نے اس بارے میں شدید کلمات ارشاد فرمائے ۔ ( علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے ” صحیح “ میں ایک حدیث مذکور ہے ، جو اس کے علاوہ ہے ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی محمد بن سلام منجی ہے اس کے حالات میں یہ بات بیان کی گئی ہے کہ اس سے عجیب و غریب روایات منقول ہیں اس کے بقیہ رجال صحیح کے رجال ہیں ۔

سیدنا اشعث بن قیس رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے ” جو شخص جھوٹی قسم اٹھائے تاکہ اس کے ذریعے کسی مسلمان کا مال ہتھیا لے تو جب وہ اللہ تعالیٰ کی بارگاہ میں حاضر ہو گا تو اللہ تعالیٰ اس پر غضبناک ہو گا اگر وہ چاہے گا تو اس سے درگزر کر دے گا اور اگر وہ چاہے گا تو اسے سزا دے گا “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے تا ہم اس میں یہ الفاظ نہیں ہے : ” اگر وہ چاہے گا تو اس سے درگزر کرے گا اور وہ چاہے گا تو اسے سزا دے گا “ ۔
یہ روایت امام طبرانی نے معجم کبیر اور معجم اوسط میں نقل کی ہے معجم کبیر کی سند میں ایک راوی عمر بن محمد بن یحیی بن سعید بن العاص ہے میں نے کسی کو اس کے حالات بیان کرتے ہوئے نہیں پایا ہے اس روایت کے بقیہ رجال ثقہ ہیں معجم اوسط کی سند میں ایک کذاب راوی ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے مجھے یہ اجازت دی کہ میں اس مرغ کے بارے میں بیان کروں جس کی دونوں ٹانگیں زمین میں ہیں اور اس کی گردن عرش کے نیچے جھکی ہوئی ہے اور وہ یہ کہتا ہے : ” تو ہر عیب سے پاک ہے : اے ہمارے پروردگار ! تو کتنی عظمت والا ہے ، تو پروردگار اسے یہ جواب دیتا ہے : یہ بات وہ شخص نہیں جانتا جو میرے نام کی جھوٹی قسم اٹھاتا ہے “ ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا جابر بن عتیک رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے : ” جو شخص اپنی قسم کے ذریعے کسی مسلمان کا مال ہتھیا لے ، اللہ تعالیٰ اس پر جنت کو حرام کر دیتا ہے اور اس کے لئے جہنم کو واجب کر دیتا ہے ، عرض کی گئی : یا رسول اللہ ! اگرچہ وہ معمولی سی چیز ہو ، نبی اکرم صلی اللہ علیہ وسلم نے فرمایا : اگرچہ وہ مسواک ہی کیوں نہ ہو “ ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ، البتہ ابوسفیان بن جابر بن عتیک کا معاملہ مختلف ہے ، ابن ابوحاتم نے اس کا ذکر کیا ہے ، اہل ” صحیح “ میں سے ایک سے زیادہ افراد نے اس سے روایات نقل کی ہیں ، اور کسی نے ان کے بارے میں کلام نہیں کیا ہے ۔

سیدنا حارث بن برصاء رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو سنا : آپ اس وقت دو جمرات کے درمیان چلتے ہوئے جا رہے تھے اور یہ ارشاد فرما رہے تھے : ” جو شخص جھوٹی قسم کے ذریعے کسی مسلمان کے مال میں سے کچھ بھی ہتھیا لے گا ، اُسے جہنم میں اپنے گھر تک پہنچنے کے لئے تیار رہنا چاہیے “ ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا عمران بن حصین رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص جان بوجھ کر جھوٹی قسم کا حلف اٹھاتا ہے ، اسے جہنم میں اپنے مخصوص ٹھکانے تک پہنچنے کے لئے تیار رہنا چاہیے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عمر بن ابراہیم عبدی ہے اور وہ ثقہ ہے اور اس کے بارے میں کلام کیا گیا ہے ۔

سیدنا عمران بن حصین رضی اللہ عنہ فرماتے ہیں : ہم جھوٹی قسم کو کبیرہ گناہوں میں سے شمار کرتے تھے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی کثیر ابوفضل ہے ، جس سے ایک جماعت نے روایات نقل کی ہیں ، کسی نے اسے ضعیف قرار نہیں دیا ہے ، اس روایت کے بقیہ رجال ثقہ ہیں ۔

سیدنا ثعلبہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص جھوٹی قسم کے ذریعے کسی مسلمان کا حق ہتھیا لے گا ، تو یہ اس کے دل میں ” سر سال “ سے بنا ہوا سیاہ نکتہ بن جائے گا ، جسے قیامت کے دن تک کوئی چیز تبدیل نہیں کر سکے گی “ ۔
یہ روایت امام طبرانی نے نقل کی ہے اس کی سند میں ایک راوی عبیداللہ بن ثعلبہ انصاری ہے ، میں اس سے واقف نہیں ہوں اس روایت کے بقیہ جال ثقہ ہیں ۔

سیدنا ابورہم سمعی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک سب سے بڑا چور وہ ہے ، جو حاکم کی زبان چوری کرتا ہے اور سب سے بڑا گناہ یہ ہے کہ آدمی ناحق طور پر کسی مسلمان کا مال ہتھیا لے اور نیکیوں میں یہ چیز بھی شامل ہے کہ بیمار کی عیادت کی جائے اور اس کی عیادت کی تکمیل میں یہ بات شامل ہے کہ تم اپنا ہاتھ اس پر رکھو اور تم اس سے دریافت کرو کہ وہ کیسا ہے ؟ اور سب سے زیادہ فضیلت والی سفارش یہ ہے کہ تم نکاح کے موقع پر دو افراد ( یعنی لڑکے اور لڑکی ) کے درمیان سفارش کرو ، یہاں تک کہ ان دونوں کو اکٹھا کروا دو ، اور پہلے کے انبیاء کا لباس شلوار ہے اور جس موقع پر دعا مستجاب ہوتی ہے ، وہ چھینکنا ہے “ ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس کا کچھ حصہ نقل کیا ہے ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ، اس کے بعض راویوں کے بارے میں ایسا کلام کیا گیا ہے ، جو نقصان دہ نہیں ہے ۔