مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں سے کوئی ایک شخص ، اپنے مومن بھائی کو اپنی دیوار پر لکڑی رکھنے سے ہرگز منع نہ کرے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، اس کی نقل کردہ حدیث حسن ہے اس روایت کے بقیہ رجال صحیح کے رجال ہیں ۔

ان کے حوالے سے منقول ایک روایت میں یہ الفاظ ہیں : ” آدمی کو اس بات کا حق حاصل ہے کہ اپنی پڑوسی کی دیوار پر اپنی لکڑی ( یعنی شہتیر ) رکھ لے “ ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص دیواریں بناتا ہے ، وہ اپنے بھائی کی دیوار پر شہتیر رکھ سکتا ہے “ ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدنا ابوشریح کعبی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” پڑوسی اپنے پڑوسی سے کیا امید رکھے گا کہ جب وہ اس کی دیوار پر شہتیر ہی نہیں رکھ سکتا “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عبداللہ بن سعید مقبری ہے اور وہ ضعیف ہے ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جس شخص سے ، اس شخص کا پڑوسی یہ درخواست کرے کہ اس کی دیوار میں وہ لکڑی گاڑ لے ، تو وہ شخص اسے منع نہ کرے “ ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ، صرف شعیب بن یحیی کا معاملہ مختلف ہے ، ویسے وہ ثقہ ہے ۔