مجمع الزوائد ومنبع الفوائد

حسن بیان کرتے ہیں : سیدنا عثمان بن ابوالعاص رضی اللہ عنہ کو ختنہ کے موقع پر کی جانے والی دعوت میں بلایا گیا تو انہوں نے جانے سے انکار کر دیا ان سے کہا: گیا تو انہوں نے فرمایا : نبی اکرم صلی اللہ علیہ وسلم کے زمانہ اقدس میں نہ تو ہم ختنے کی دعوت میں جایا کرتے تھے اور نہ ہی ہمیں اس کے لئے بلایا جاتا تھا ۔
یہ روایت امام أحمد نے اور امام طبرانی نے معجم کبیر میں نقل کی ہے ۔

امام طبرانی کی ایک روایت میں یہ الفاظ ہیں : وہ بیان کرتے ہیں : سیدنا عثمان رضی اللہ عنہ کو کھانے کی دعوت دی گئی ان سے کہا: گیا کیا آپ جانتے ہیں ؟ یہ کس چیز کا کھانا ہے ؟ یہ ایک لڑکی کے ختنے کا کھانا ہے ، تو انہوں نے فرمایا : یہ ایک ایسی چیز ہے ، جو ہم نے نبی اکرم صلی اللہ علیہ وسلم کے زمانے میں نہیں دیکھی تو انہوں نے وہ کھانا کھانے سے انکار کر دیا ۔ پہلی روایت کے رجال میں ایک راوی محمد بن اسحاق ہے وہ ثقہ ہے لیکن وہ تدلیس کرنے والا ہے جبکہ دوسری روایت کے رجال میں ایک راوی ابوحمزہ عطار ہے ، جسے ابوحاتم نے ثقہ قرار دیا ہے اور دیگر حضرات نے اسے ضعیف کہا: ہے ۔