مجمع الزوائد ومنبع الفوائد

سیدنا رافع بن خدیج رضی اللہ عنہ بیان کرتے ہیں : عرض کی گئی یا رسول اللہ ! کون سی کمائی زیادہ پاکیزہ ہے ؟ آپ نے فرمایا : آدمی کا اپنے ہاتھ کے ذریعے کام کر کے ( کمانا ) اور ہر جائز سودا “ ۔
یہ روایت امام أحمد نے امام بزار نے اور امام طبرانی نے معجم کبیر اور معجم اوسط میں نقل کی ہے اس کی سند میں ایک راوی مسعودی ہے وہ ثقہ ہے لیکن وہ اختلاط کا شکار ہو گیا تھا امام أحمد کے بقیہ رجال صحیح کے رجال ہیں ۔

جمیع بن عمیر اپنے ماموں کا یہ بیان نقل کرتے ہیں : نبی اکرم صلی اللہ علیہ وسلم سے سب سے زیادہ فضیلت والی کمائی کے بارے میں دریافت کیا گیا تو آپ نے ارشاد فرمایا : جائز سودا اور آدمی کا اپنے ہاتھ کے ذریعے کمائی کرنا ۔
یہ روایت امام احد نے نقل کی ہے امام طبرانی نے معجم کبیر میں اختصار کے ساتھ نقل کی ہے ۔ انہوں نے یہ بات بیان کی ہے ۔ انہوں نے اپنے ماموں سیدنا ابوبردہ بن نیار رضی اللہ عنہ کے حوالے سے
یہ روایت نقل کی ہے ۔ امام بزار نے اسے امام أحمد کی طرح نقل کیا ہے تاہم انہوں نے یہ کہا: ہے جمیع بن عمیر کے حوالے سے ان کے چچا سے منقول ہے جمیع نامی راوی کو ابوحاتم نے ثقہ قرار دیا ہے امام بخاری رحمہ اللہ کہتے ہیں : اس میں غور و فکر کی گنجائش ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم سے سوال کیا گیا کون سی کمائی زیادہ فضیلت رکھتی ہے ؟ آپ نے ارشاد فرمایا : آدمی کا اپنے ہاتھ کے ذریعے کام کرنا اور ہر جائز سودا ۔
یہ روایت امام طبرانی نے معجم اوسط اور معجم کبیر میں نقل کی ہے اور اس کے رجال ثقہ ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سب سے بہتر کمائی کام کرنے والے کے ہاتھ کی کمائی ہے جبکہ وہ خیرخواہی کرے “ ۔
یہ روایت امام أحمد نے نقل کی ہے اور اس کے رجال ثقہ ہیں ۔