مجمع الزوائد ومنبع الفوائد

سیدنا سہل بن سعد رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ صفیہ رضی اللہ عنہا کے ساتھ شادی کے بعد ولیمہ کیا تھا ( راوی بیان کرتے ہیں : ) میں نے دریافت کیا : اس ولیمے میں کیا چیز تھی ؟ انہوں نے بتایا کہ صرف کھجوریں اور ستو تھے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عبدالحمید بن سلیمان ہے اور وہ ضعیف ہے ویسے اس کی توثیق کی گئی ہے ۔

سیدنا جابر رضی اللہ عنہ بیان کرتے ہیں : جب سیدہ صفیہ بنت حیی رضی اللہ عنہا کی نبی اکرم صلی اللہ علیہ وسلم کے ساتھ شادی ہوئی اور وہ نبی اکرم صلی اللہ علیہ وسلم کے خیمے میں آئیں تو کچھ لوگ نبی اکرم صلی اللہ علیہ وسلم کے پاس موجود تھے میں بھی ان لوگوں کے ساتھ موجود تھا تاکہ مجھے بھی ان میں سے حصہ ملے نبی اکرم صلی اللہ علیہ وسلم تشریف لائے تو آپ نے چادر میں تقریباً ڈیڑ مد عجوہ کھجوریں رکھی ہوئی تھیں آپ نے فرمایا : اپنی والدہ کے ولیمے ( کی کھجوریں ) کھاؤ ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں نبی اکرم صلی اللہ علیہ وسلم نے اپنی ایک زوجہ محترمہ کے ولیمے میں جو کے دو مد کے ساتھ ولیمہ کیا تھا ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ فرماتے ہیں : نبی اکرم صلی اللہ علیہ وسلم نے اپنی ایک زوجہ محترمہ کے ولیمے میں ”حریسہ“ کی ایک ہنڈیا کھلائی تھی ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی جرول ہے ذہبی کہتے ہیں : وہ صدوق ہے ابن مدینی کہتے ہیں : اس نے منکر روایات نقل کی ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ ام سلمہ رضی اللہ عنہا کے ولیمے میں کھجوریں اور گھی کھلایا تھا ۔ ( علامہ ہیثمی فرماتے ہیں : ) میں یہ کہتا ہوں کہ ” صحیح “ میں یہ بات منقول ہے کہ سیدہ صفیہ رضی اللہ عنہا کے ولیمے میں ایسا ہوا تھا اور یہاں یہ ذکر ہے کہ سیدہ ام سلمہ رضی اللہ عنہا کے ولیمے میں ایسا ہوا ہے ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدنا جابر بن عبداللہ رضی اللہ عنہ بیان کرتے ہیں : ہم سیدنا علی رضی اللہ عنہ اور سیدہ فاطمہ رضی اللہ عنہا کی شادی میں شریک ہوئے ہم نے اس سے زیادہ اچھی شادی اور کوئی نہیں دیکھی نبی اکرم صلی اللہ علیہ وسلم نے ہمارے لئے کشمش اور کھجوریں تیار کروائی تھیں ہم نے وہ کھائیں اس شادی کی رات ان کا بستر دنبے کی کھال کا تھا ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی مسلم بن خالد زنگی ہے اور وہ ضعیف ہے ویسے اس کی توثیق کی گئی ہے ۔

سیدنا سہل بن سعد رضی اللہ عنہ بیان کرتے ہیں : نبی اکرم صلی اللہ علیہ وسلم کے صحابی سیدنا اسید رضی اللہ عنہ نے ایک خاتون کے ساتھ شادی کی ، تو انہوں نے اپنی شادی میں نبی اکرم صلی اللہ علیہ وسلم کو بھی بلایا تو ان کی اہلیہ نے ہماری دیکھ بھال کی ( یعنی کھانے پینے کا بندوبست کیا ) وہ دلہن تھیں ، لیکن انہوں نے ہمیں کھجور کی نبیذ پلائی جو انہوں نے گزشتہ رات ہی تیار کر لی تھی اور اسے صاف ( یا تیار کر لیا تھا ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدہ اسماء بنت عمیس رضی اللہ عنہا بیان کرتی ہیں میں نے تمہاری دادی سیدہ فاطمہ رضی اللہ عنہا کی تمہارے دادا سیدنا علی رضی اللہ عنہ کے ساتھ رخصتی کروائی تھی ان کے بستر اور تکیہ میں صرف پتے بھرے ہوئے تھے سیدنا علی رضی اللہ عنہ نے سیدہ فاطمہ رضی اللہ عنہا کا ولیمہ کروایا تھا اس زمانے میں ان کے ولیمے سے زیادہ فضیلت والا ولیمہ کوئی نہیں ہوا انہوں نے اپنی زرہ ایک یہودی کے پاس کچھ جو کے عوض میں رہن رکھوائی تھی ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عون بن محمد بن حنفیہ ہے میں نے کسی کو اس کے حالات بیان کرتے ہوئے نہیں پایا ہے ۔

شہر بن حوشب بیان کرتے ہیں : سیدہ اسماء بنت یزید بن سکن رضی اللہ عنہا جن کا تعلق بنی عبد اشہل کی خواتین سے ہے ایک مرتبہ شہر ان کی خدمت میں حاضر ہوئے اس خاتون نے ان کے سامنے کھانا رکھا تو انہوں نے کہا: مجھے اس کی خواہش نہیں ہے اس خاتون نے بتایا میں نے سیدہ عائشہ رضی اللہ عنہا کو نبی اکرم صلی اللہ علیہ وسلم کے ساتھ شادی کے موقع پر تیار کروایا تھا پھر میں نبی اکرم صلی اللہ علیہ وسلم کے پاس آئی اور آپ کو بلوایا تاکہ آپ سیدہ عائشہ رضی اللہ عنہا کے پاس آ کر بیٹھیں نبی اکرم صلی اللہ علیہ وسلم تشریف لائے اور سیدہ عائشہ رضی اللہ عنہا کے پہلو میں بیٹھ گئے پھر دودھ کا برتن لایا گیا نبی اکرم صلی اللہ علیہ وسلم نے اس میں سے پیا پھر نبی اکرم صلی اللہ علیہ وسلم نے وہ سیدہ عائشہ رضی اللہ عنہا کی طرف بڑھایا تو انہوں نے سر جھکا لیا اور وہ شرما گئیں سیدہ اسماء رضی اللہ عنہا کہتی ہیں میں نے انہیں ڈانٹا اور میں نے ان سے کہا: تم اللہ کے رسول کے ہاتھ سے اسے لے لو سیدہ اسماء رضی اللہ عنہا بیان کرتی ہیں ۔ انہوں نے لے لیا اور کچھ پیا پھر نبی اکرم صلی اللہ علیہ وسلم نے فرمایا : اپنی سہیلی کو بھی کچھ دو سیدہ اسماء رضی اللہ عنہا کہتی ہیں میں نے عرض کی : یا رسول اللہ بلکہ آپ لے کر آپ اس میں سے پیئیں اور پھر اپنے دست مبارک کے ذریعے یہ مجھے پکڑائیں نبی اکرم صلی اللہ علیہ وسلم نے اسے لے کر اس میں سے پیا پھر آپ نے وہ مجھے پکڑایا سیدہ اسماء رضی اللہ عنہا بیان کرتی ہیں میں بیٹھی اور میں نے اسے اپنے گھٹنے پر رکھا اور پھر اسے گھمایا اور اپنے ہونٹ اس جگہ پر رکھے جہاں پر سے نبی اکرم صلی اللہ علیہ وسلم نے پیا تھا پھر نبی اکرم صلی اللہ علیہ وسلم نے میرے پاس موجود خواتین کے بارے میں فرمایا کہ انہیں بھی دو ! ان خواتین نے کہا: ہمیں اس کی خواہش نہیں ہے ۔ نبی اکرم صلی اللہ علیہ وسلم نے فرمایا : تم بھوک اور غلط بیانی کو جمع نہ کرو ۔
یہ روایت بیان کرنے کے بعد سیدہ اسماء رضی اللہ عنہا نے شہر بن حوشب سے کہا: ) تو کیا تم یہ کہنے سے باز آتے ہو کہ ہمیں اس کی خواہش نہیں ہے ؟ میں نے کہا: اے امی جان اب میں دوبارہ کبھی ایسا نہیں کروں گا ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت کا کچھ حصہ نقل کیا ہے ۔
یہ روایت امام أحمد نے نقل کی ہے امام طبرانی نے معجم کبیر میں اس کی مانند روایت نقل کی ہے اور یہ الفاظ زائد نقل کیے ہیں : نبی اکرم صلی اللہ علیہ وسلم نے ان خواتین میں سے ایک کے ہاتھ میں سونے کا کنگن دیکھا تو آپ نے ارشاد فرمایا : اے خاتون ! کیا تم اس بات کو پسند کرتی ہو کہ اس کی جگہ اللہ تعالیٰ تمہیں آگ کا بنا ہوا کنگن پہنائے ؟ راوی خاتون کہتی ہیں تو ہم نے اپنے زیور اتار دیے اور انہیں رکھ دیا اور اس وقت تک ہمیں نہیں معلوم کہ وہ کہاں ہیں ؟ پھر نبی اکرم صلی اللہ علیہ وسلم نے ارشاد فرمایا : تم خواتین میں سے کسی ایک کے لئے یہ کافی ہے کہ وہ چاندی کا کڑا بنوائے پھر تھوڑا زعفران لے کر اسے گیلا کر کے اس پر لگا دے تو وہ سونے کی مانند ہو جائے گا ۔ امام ابوداؤد نے کنگن والا واقعہ بہت زیادہ اختصار کے ساتھ نقل کیا ہے شہر نامی راوی کے بارے میں بہت زیادہ کلام کیا گیا ہے اور اس کی نقل کردہ حدیث حسن ہے ۔

سیدہ اسماء بنت عمیس رضی اللہ عنہا بیان کرتی ہیں میں سیدہ عائشہ رضی اللہ عنہا کے ساتھ والی ان خواتین میں سے ایک تھی جنہوں نے انہیں تیار کیا تھا اور نبی اکرم صلی اللہ علیہ وسلم کے ساتھ ان کی رخصتی کروائی تھی میرے ساتھ کچھ اور خواتین بھی تھیں سیدہ اسماء رضی اللہ عنہا بیان کرتی ہیں ۔ اللہ کی قسم ہم نے آپ کی مہمان نوازی کے لئے صرف دودھ کا ایک پیالہ پایا نبی اکرم صلی اللہ علیہ وسلم نے اس میں سے پی لیا پھر وہ آپ نے سیدہ عائشہ رضی اللہ عنہا کی طرف بڑھایا تو وہ شرما گئیں ہم نے کہا: تم اللہ کے رسول کے ہاتھ کو واپس نہ کرو اور اسے لے لو تو انہوں نے شرماتے ہوئے وہ لے لیا اور اس میں سے وہ پی لیا پھر نبی اکرم صلی اللہ علیہ وسلم نے فرمایا : اپنی سہیلیوں کو بھی دو ہم نے کہا: ہمیں اس کی خواہش نہیں ہے ۔ نبی اکرم صلی اللہ علیہ وسلم نے فرمایا : تم بھوک اور غلط بیانی کو جمع نہ کرو سیدہ اسماء رضی اللہ عنہا بیان کرتی ہیں میں نے عرض کی : یا رسول اللہ ! اگر ہم میں سے کوئی ایک عورت کسی چیز کی خواہش مند ہو ، اور پھر وہ یہ کہے کہ مجھے اس کی خواہش نہیں ہے ، تو یہ چیز بھی جھوٹ شمار ہو گی ؟ نبی اکرم صلی اللہ علیہ وسلم نے فرمایا : جھوٹ کو جھوٹ لکھا جائے گا یہاں تک کہ چھوٹے جھوٹ کو چھوٹا جھوٹ نوٹ کیا جائے گا ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ابوشداد ہے اس نے مجاہد کے حوالے سے اسے نقل کیا ہے ان سے یہ روایت ابن جریج اور یونس بن یزید نے نقل کی ہے اور اس کے بقیہ رجال صحیح کے رجال ہیں البتہ یہ بات ہے کہ سیدہ اسماء بنت عمیس رضی اللہ عنہا نبی اکرم صلی اللہ علیہ وسلم کی سیدہ عائشہ رضی اللہ عنہا کی شادی کے وقت اپنے شوہر اور سیدنا جعفر رضی اللہ عنہ کے ساتھ حبشہ کی سرزمین پر موجود تھیں درست یہ ہے کہ حدیث سیدہ اسماء بنت یزید رضی اللہ عنہا سے منقول ہے باقی اللہ بہتر ہے ۔
یہ روایت امام طبرانی نے معجم صغیر میں نقل کی ہے اور اس کی سند ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے ابوہریرہ ! تم ولیمہ کرو خواہ ایک بکری ( ذبح کر کے دعوت کرو ) “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عبداللہ بن مؤمل ہے ، جسے ابن حبان نے ثقہ قرار دیا ہے وہ فرماتے ہیں : یہ غلطی کر جاتا ہے یحیی بن معین سے اس کے بارے میں دو روایات منقول ہیں ائمہ نے اسے ضعیف کہا: ہے اس کے بقیہ رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : سیدنا عبدالرحمن بن عوف رضی اللہ عنہ نبی اکرم صلی اللہ علیہ وسلم کے پاس آئے ۔ انہوں نے زرد رنگ کا خضاب لگایا ہوا تھا نی اکرم صلی اللہ علیہ وسلم نے ان سے دریافت کیا : یہ خضاب کس وجہ سے ہے ؟ کیا تم نے شادی کر لی ہے ؟ انہوں نے عرض کی : جی ہاں ! نبی اکرم صلی اللہ علیہ وسلم نے فرمایا : کیا تم نے ولیمہ کر لیا ہے ؟ انہوں نے عرض کی : جی نہیں ! تو نبی اکرم صلی اللہ علیہ وسلم نے سونے کی ایک گٹھلی ان کی طرف بڑھائی اور فرمایا : تم ولیمہ کرو خواہ ایک بکری ( ذبح کر کے دعوت کرو ) ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عبدالرحمن بن ابوبکر بن ابوملیکہ ہے اور وہ ضعیف ہے ۔

سیدنا انس بن مالک رضی اللہ عنہ بیان کرتے ہیں : سیدنا عبدالرحمن بن عوف رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے ۔ انہوں نے زرد لباس پہنا ہوا تھا نبی اکرم صلی اللہ علیہ وسلم نے ان سے دریافت کیا : میہم ؟ ( راوی بیان کرتے ہیں : ) یہ ایک ایسا کلمہ ہے کہ جب کسی چیز کے بارے میں دریافت کیا جائے تو یہ استعمال ہوتا ہے ۔ انہوں نے عرض کی : یا رسول اللہ ! میں نے شادی کر لی ہے ۔ نبی اکرم صلی اللہ علیہ وسلم نے دریافت کیا : کتنے ( مہر ) کے عوض میں ؟ انہوں نے عرض کی : ایک گٹھلی کے وزن جتنے سونے کے عوض ، میں نبی اکرم صلی اللہ علیہ وسلم نے فرمایا : تم ولیمہ کرو خواہ ایک بکری ( ذبح کر کے دعوت کرو ) ۔ سیدنا انس رضی اللہ عنہ بیان کرتے ہیں : ہم نے ایک چوتھائی دینار کے عوض میں اسے آزاد کیا تھا ( یعنی اس سونے کو ایک چوتھائی دینار کے عوض میں فروخت کیا تھا ) ۔ ( علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں مذکور ہے تا ہم اس میں گٹھلی کی قیمت کا ذکر نہیں ہے ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی قاسم بن معن ہے میں نے کسی کو اس کے حالات بیان کرتے ہوئے نہیں پایا ہے ۔