مجمع الزوائد ومنبع الفوائد

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دعوت دینے والے کی دعوت قبول کرو اور تحفے کو واپس نہ کرو اور مسلمانوں کو مارو نہیں“ ۔
یہ روایت امام أحمد نے اور امام بزار نے نقل کی ہے امام بزار کی ایک روایت میں یہ الفاظ ہیں : ” دعوت دینے والے کی دعوت قبول کرو جب تمہیں بلایا جائے “ ۔
یہ روایت امام طبرانی نے معجم کبیر میں نقل کی ہے امام أحمد کے رجال صحیح کے رجال ہیں ۔

سیدنا ابوہریرہ رضی اللہ عنہ فرماتے ہیں : ولیمہ حق اور سنت ہے ، جس شخص کو اس کی دعوت دی جائے اور وہ اس کو قبول نہ کرے تو وہ اللہ اور اس کے رسول کی نافرمانی کا مرتکب ہوتا ہے جبکہ خرس اعزار اور توکیر کے بارے میں تمہیں اختیار ہے ( کہ تم چاہو ، تو چلے جاؤ ، چاہو ، تو نہ جاؤ ) ۔ راوی کہتے ہیں : میں نے کہا: اللہ کی قسم ! مجھے نہیں معلوم کہ خرس ، اعزار اور توکیر کا مطلب کیا ہوتا ہے ؟ تو انہوں نے ( یعنی میرے استاد نے ) بتایا خرس سے مراد ( بچے کی ) پیدائش کی دعوت ہے اعزار سے مراد ختنے کے وقت کی دعوت ہے اور توکیر سے مراد یہ ہے کہ جب آدمی کوئی گھر بناتا ہے ، تو اس میں لوگوں کو بلاتا ہے اور کھانا تیار کر کے ان کی دعوت کرتا ہے ، تو ان کے بارے میں لوگوں کو اختیار ہے کہ اگر وہ چاہیں تو چلے جائیں اور اگر چاہیں تو نہ جائیں ۔ ( علامہ ہیثمی فرماتے ہیں : ) میں یہ کہتا ہوں ” صحیح “ میں اس کا ایک حصہ منقول ہے ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی یحیی بن عثمان تیمی ہے ، جسے ابوحاتم رازی اور ابن حبان نے ثقہ قرار دیا ہے جبکہ امام بخاری رحمہ اللہ اور دیگر حضرات نے اسے ضعیف کہا: ہے اس روایت کے بقیہ رجال ثقہ ہیں ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص تمہاری دعوت کرے تم اسے جواب دو ! ( یعنی دعوت قبول کرو ) “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی محمد بن عبیداللہ عرزمی ہے اور وہ ضعیف ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب تم میں سے کسی ایک کو کھانے کی دعوت دی جائے تو اسے جانا چاہیے اگر اس نے روزہ نہ رکھا ہوا ہو ، تو کھانا کھا لینا چاہیے اور اگر روزہ رکھا ہوا ہو تو برکت کی دعا دینی چاہیے “ ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدنا یعلی بن مرہ رضی اللہ عنہ کے بارے میں یہ بات منقول ہے کہ انہیں کھانے کی دعوت دی گئی وہ بیٹھ گئے ۔ انہوں نے روزہ رکھا ہوا تھا لوگوں نے کھانا شروع کیا لیکن انہوں نے نہیں کھایا انہیں اس بارے میں کہا: گیا : اللہ کی قسم ! اگر ہمیں پتہ ہوتا کہ آپ نے روزہ رکھا ہوا ہے ، تو ہم آپ کو بلاتے ہی نہیں ، تو سیدنا یعلی رضی اللہ عنہ نے فرمایا : تم یہ نہ کہو ! کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے ” اپنے بھائی کی دعوت قبول کرو کیونکہ تم اس کے حوالے سے دو چیزیں حاصل کر لو گے یا تو وہاں بھلائی ہو گی ، تو وہ اس بات کی زیادہ حقدار ہے کہ تم وہاں موجود ہو ، یا اس کے علاوہ ہو گا ، تو تم اُسے منع کر دو گے اور اسے بھلائی کے بارے میں حکم دو گے “ ۔

یہ روایت امام طبرانی نے معجم کبیر میں نقل کی ہے اس کی سند میں ایک راوی عمر بن عبداللہ بن یعلی ہے اور وہ ضعیف ہے ۔

سیدنا ابوسعید خدری رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم اور آپ کے اصحاب کے لئے کھانا تیار کیا ۔ انہوں نے ان لوگوں کو بلایا جب یہ حضرات آئے تو انہوں نے کھانا رکھا حاضرین میں سے ایک صاحب نے کہا: میں نے روزہ رکھا ہوا ہے ۔ نبی اکرم صلی اللہ علیہ وسلم نے فرمایا : تمہارے بھائی نے تمہیں بلایا ہے اور تمہارے لئے اہتمام کیا ہے اور تم کہہ رہے ہو میں نے روزہ رکھا ہوا ہے روزہ ختم کر دو اور پھر اس کی جگہ اگر تم چاہو ، تو روزہ رکھ لینا ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی حماد بن ابوحمید ہے اور وہ ضعیف ہے اس روایت کے بقیہ رجال ثقہ ہیں ۔

قیس بن ابوحازم فرماتے ہیں : جب کسی شخص کو کھانے یا مشروب کی پیش کش کی جائے اور اس نے روزہ رکھا ہوا ہو ، تو اسے کہہ دینا چاہیے کہ میں نے روزہ رکھا ہوا ہے ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما فرماتے ہیں : اگر نواحی علاقے کا رہنے والا کوئی شخص اگر نصف رات کے وقت نبی اکرم صلی اللہ علیہ وسلم کو جو کی روٹی کھانے کے لئے بلاتا تھا تو آپ اس کی دعوت قبول کر لیتے تھے ۔
یہ روایت امام طبرانی نے معجم صغیر اور معجم اوسط میں نقل کی ہے اس کی سند میں ایک راوی ابومسلم ہے ، جو اعمش کو ساتھ لے کے چلا کرتا تھا ابن حبان نے اس کو ثقہ قرار دیا ہے وہ فرماتے ہیں : یہ غلطی کر جاتا ہے ایک جماعت نے اسے ضعیف قرار دیا ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر مجھے ایک پائے کی دعوت دی جائے تو میں وہ قبول کر لوں گا“ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عبداللہ بن مؤمل ہے ، جسے ابن سعد اور ابن حبان نے ثقہ قرار دیا ہے وہ فرماتے ہیں : یہ غلطی کر جاتا ہے ابن حبان سے اس بارے میں دو روایات منقول ہیں ۔ ایک جماعت نے اس راوی کو ضعیف کہا: ہے ۔