مجمع الزوائد ومنبع الفوائد

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم نے گھروں میں رہنے والے سانپوں کو مارنے سے منع کیا ہے البتہ جو دو دھاری والا ہو یا دم کٹا ہو اس کا حکم مختلف ہے کیونکہ وہ دونوں بینائی کو زائل کر دیتے ہیں اور خواتین کا حمل ان کی وجہ سے ضائع ہو جاتا ہے “ ۔
یہ روایت امام أحمد نے اور امام طبرانی نے معجم کبیر میں نقل کی ہے اس کی سند میں ایک راوی فرج بن فضالہ اس کے ضعیف ہونے کے باوجود اس کی توثیق کی گئی ہے ۔

سیدہ عائشہ صدیقہ رضی اللہ عنہا بیان کرتی ہیں نبی اکرم صلی اللہ علیہ وسلم نے گھر میں موجود سانپوں کو مارنے سے منع کیا ہے البتہ دم کٹے کا اور دو دھاری والے کا معاملہ مختلف ہے کیونکہ وہ دونوں بینائی کو ضائع کر دیتے ہیں اور خواتین کے پیٹ میں موجود حمل کو ضائع کر دیتے ہیں ( نبی اکرم صلی اللہ علیہ وسلم نے یہ فرمایا ہے : ) جو شخص ان دونوں کو چھوڑ دے گا وہ ہم میں سے نہیں ہے “ ۔
یہ روایت امام أحمد اور ابویعلیٰ نے نقل کی ہے امام أحمد کے رجال صحیح کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ منقول ہے ۔

سیدنا سہل بن سعد رضی اللہ عنہ بیان کرتے ہیں : انصار سے تعلق رکھنے والے ایک صاحب کی نئی نئی شادی ہوئی تھی وہ نبی اکرم صلی اللہ علیہ وسلم کے ساتھ ایک جنگ میں حصہ لینے کے لئے نکلا راستے سے وہ واپس آیا اس نے اپنی بیوی کا جائزہ لینا تھا تو اس کی بیوی گھر کے دروازے پر کھڑی ہوئی تھی اس نے نیزہ اس کی طرف بڑھایا تو اس عورت نے کہا: اندر تو آؤ اور دیکھو کہ گھر میں کیا صورت حال ہے ؟ وہ اندر گیا تو گھر میں ایک سانپ اس کے بستر پر لیٹا ہوا تھا اس شخص نے نیزے میں اس سانپ کو پرو دیا اور پھر محلے میں لا کے وہ نیزہ گاڑ دیا اس سانپ نے حملہ کیا اور اس آدمی نے بھی حملہ کیا ، تو سانپ بھی مر گیا اور وہ آدمی بھی مر گیا ، اس بات کا ذکر نبی اکرم صلی اللہ علیہ وسلم سے کیا گیا تو آپ نے ارشاد فرمایا : مدینہ میں کچھ مسلمان جنات آئے ہوئے تھے ( راوی کو شک ہے شاید یہ الفاظ ہیں : ) آپ نے فرمایا : ان گھروں میں کچھ رہنے والے ہیں جب ان میں سے کسی کو تم دیکھو تو اس سے پناہ مانگو اگر وہ دوبارہ آئے تو اسے مار دو “ ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : ایک نوجوان کی نئی نئی شادی ہوئی تھی نبی اکرم صلی اللہ علیہ وسلم نے ایک جنگی مہم روانہ کی نبی اکرم صلی اللہ علیہ وسلم نے اس مہم میں اس شخص کو بھی بھیجوایا جب وہ شخص واپس آیا تو وہ جلدی سے اپنے گھر کی طرف گیا تو وہاں اس کی بیوی گھر کے دروازے پر کھڑی ہوئی تھی اس شخص کو بڑا غصہ آیا اس نے نیزہ اس عورت کی طرف بڑھایا تاکہ اسے مار دے اس عورت نے کہا: جلدی نہ کرو اس بات کا جائزہ لو کہ گھر میں کیا ہے ؟ وہ گھر کے اندر گیا تو وہاں ایک سانپ اس کے بستر پر پڑا ہوا تھا اس نے اس سانپ کو نیزہ مارا تو وہ سانپ مر گیا اور وہ شخص بھی مر گیا نبی اکرم صلی اللہ علیہ وسلم کو اس بات کی اطلاع ملی تو نبی اکرم صلی اللہ علیہ وسلم نے ارشاد فرمایا : ان گھروں میں کچھ جنات رہتے ہیں پھر نبی اکرم صلی اللہ علیہ وسلم نے انہیں قتل کرنے سے منع کر دیا ۔
یہ روایت امام طبرانی نے معجم صغیر اور معجم اوسط میں نقل کی ہے معجم اوسط کے رجال صحیح کے رجال ہیں ۔

سیدنا عبداللہ بن جعفر رضی اللہ عنہ بیان کرتے ہیں : انہیں مارنے سے منع کیا گیا ہے ۔ راوی کہتے ہیں : یعنی وہ سانپ جو گھروں میں موجود ہوتے ہیں ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں صرف ابراہیم بن صالح شیرازی کا معاملہ مختلف ہے ، جو امام طبرانی کا استاد ہے میں اس سے واقف نہیں ہوں ۔