مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : یہودی اور عیسائیوں کے ذبیحہ کو حلال قرار دیا گیا ہے کیونکہ وہ لوگ توراۃ اور انجیل پر ایمان رکھتے ہیں ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی اسماعیل بن عمر بجلی ہے ، جسے ابن حبان اور دیگر حضرات نے ثقہ قرار دیا ہے جبکہ امام دارقطنی رحمہ اللہ اور دیگر حضرات نے اسے ضعیف کہا: ہے ۔

سیدنا عرباض بن ساریہ رضی اللہ عنہ بیان کرتے ہیں : نبی اکرم صلی اللہ علیہ وسلم سے عیسائیوں کے ذبیحہ ان کے گرجا گھروں اور ان کی عید کے بارے میں دریافت کیا گیا تو آپ نے ارشاد فرمایا : اگر تم اسے نہیں کھاتے ہو ، تو مجھے کھلا دو ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ابوبکر بن ابومریم ہے اور وہ ضعیف ہے ۔