مجمع الزوائد ومنبع الفوائد

سیدنا ابودرداء رضی اللہ عنہ اور سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” ( جانور کے ) پیٹ میں موجود بچے کو ذبح کرنا اس کی ماں کو ذبح کرنا ہی ہو گا “ ۔
یہ روایت امام بزار نے اور امام طبرانی نے معجم کبیر میں نقل کی ہے اس کی سند میں ایک راوی بشر بن عمارہ ہے اس کی توثیق کی گئی ہے اور اس میں ضعف پایا جاتا ہے ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ( جانور کے ) پیٹ میں موجود بچے کی ماں کو ذبح کرنا ہی اسے ذبح کرنا شمار ہو گا جبکہ اس بچے کے بال آ چکے ہوں“ ۔ ( علامہ ہیثمی فرماتے ہیں : ) میں یہ کہتا ہوں : یہ روایت امام ابوداؤد نے بھی نقل کی ہے تاہم انہوں نے یہ الفاظ نقل نہیں کیے ہیں ” جبکہ اس کے بال آ چکے ہوں“ ۔
یہ روایت امام ابویعلیٰ نے نقل کی ہے اس کی سند میں ایک راوی حماد بن شعیب ہے اور وہ ضعیف ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ( جانور کے ) پیٹ میں موجود بچے کی ماں کو ذبح کرنا ہی اس بچے کو ذبح کرنا شمار ہو گا جبکہ اس کے بال آ چکے ہوں “ ۔
یہ روایت امام طبرانی نے معجم اوسط میں نقل کی ہے اور معجم صغیر میں ۔ انہوں نے یہ الفاظ نقل نہیں کیے ہیں : ” جبکہ اس کے بال آ چکے ہوں “ اس کی سند میں ایک راوی ابن اسحاق ہے وہ ثقہ ہے لیکن تدلیس کرنے والا ہے معجم اوسط کے بقیہ رجال ثقہ ہیں ۔

سیدنا کعب بن مالک رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں کہ جانور کے پیٹ میں موجود بچے کے ذبح کرنے کے بارے میں آپ نے یہ فرمایا ہے کہ اس کی ماں کو ذبح کرنا ہی اسے ذبح کرنا شمار ہو گا ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی اسماعیل بن مسلم ہے اور وہ ضعیف ہے ۔

سیدنا ابوایوب انصاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ( جانور کے ) پیٹ میں بچے کی ماں کو ذبح کرنا ہی اسے ذبح کرنا شمار ہو گا“ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی محمد بن بن ابولیلی ہے وہ خراب حافظے کا مالک ہے لیکن وہ ثقہ ہے ۔

سیدنا ابولیلی رضی اللہ عنہ بیان کرتے ہیں : نبی اکرم صلی اللہ علیہ وسلم سے جانور کے پیٹ میں موجود بچے کو ذبح کرنے کے بارے میں دریافت کیا گیا تو آپ نے فرمایا : اس کی ماں کو ذبح کرنا ہی اسے ذبح کرنا شمار ہو گا ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی حلبس بن محمد ہے اور وہ متروک ہے ۔