مجمع الزوائد ومنبع الفوائد

سیدنا سفینہ رضی اللہ عنہ بیان کرتے ہیں : ایک شخص نے درخت کی جڑ ( یعنی لکڑی ) کے ذریعے اپنی اونٹنی کو ذبح کر دیا ، اس نے نبی اکرم صلی اللہ علیہ وسلم سے اس بارے میں دریافت کیا ، تو نبی اکرم صلی اللہ علیہ وسلم نے ان لوگوں کو اس کا گوشت کھانے کا حکم دیا ۔
یہ روایت امام أحمد نے نقل کی ہے ۔

سیدنا سفینہ رضی اللہ عنہ کے حوالے سے امام بزار نے یہ بات نقل کی ہے ۔ انہوں نے درخت کے تنے کے ذریعے ایک اونٹ کو ذبح کیا انہوں نے نبی اکرم صلی اللہ علیہ وسلم سے اس بارے میں دریافت کیا ، تو آپ نے دریافت کیا : کیا اس نے خون بہا دیا تھا اس نے جواب دیا : جی ہاں ! تو نبی اکرم صلی اللہ علیہ وسلم نے اس صاحب کو اس کے کھانے کا حکم دیا ( یعنی اجازت دی ) ۔ امام أحمد کے رجال صحیح کے رجال ہیں البتہ یہ یحیی بن ابوکثیر کی سیدنا سفینہ رضی اللہ عنہ سے نقل کردہ روایت ہے ۔

سیدنا عبداللہ بن عمر رضی اللہ عنہما بیان کرتے ہیں : ایک عورت ” سلع “ پہاڑ کے پاس آل کعب بن مالک کی بکریاں چرا رہی تھی اسے ایک بکری کے حوالے سے مرنے کا اندیشہ ہوا تو اس نے پتھر کے ذریعے اسے ذبح کر دیا اس بات کا تذکرہ نبی اکرم صلی اللہ علیہ وسلم سے کیا گیا تو آپ نے ان لوگوں کو اس کا گوشت کھانے کا حکم دیا ۔
یہ روایت امام أحمد اور امام بزار نے اور امام طبرانی نے معجم اوسط میں نقل کی ہے تاہم انہوں نے یہ الفاظ نقل کیے ہیں : سیدنا عبداللہ بن عمر رضی اللہ عنہما کے حوالے سے یہ بات منقول ہے سیدنا کعب بن مالک رضی اللہ عنہ نے نبی اکرم صلی اللہ علیہ وسلم سے کنیز کے بارے میں دریافت کیا : جس نے پتھر کے ذریعے جانور کو ذبح کیا تھا تو نبی اکرم صلی اللہ علیہ وسلم نے ارشاد فرمایا : تم اس کو کھا لو ۔ امام أحمد اور امام بزار کے رجال صحیح کے رجال ہیں ۔

سیدنا ابورافع رضی اللہ عنہ بیان کرتے ہیں : میں نے کیل کے ذریعے بکری ذبح کر دی میں نبی اکرم صلی اللہ علیہ وسلم کی خدمت میں حاضر ہوا میں نے عرض کی : یا رسول اللہ ! میں نے کیل کے ذریعے بکری ذبح کر لی ہے ۔ نبی اکرم صلی اللہ علیہ وسلم نے فرمایا : تم اسے کھا لو ۔
یہ روایت امام بزار نے اور امام طبرانی نے معجم کبیر میں نقل کی ہے اس کے رجال ثقہ ہیں معجم کبیر کی ایک روایت میں یہ الفاظ ہیں : نبی اکرم صلی اللہ علیہ وسلم نے اس بکری کا گوشت کھایا تھا ۔

سیدنا حذیفہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” ہر اس چیز کے ذریعے ذبح کر لو جو رگوں کو کاٹ دیتی ہے البتہ سن اور ظفر کا معاملہ مختلف ہے “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عبداللہ بن خراش ہے ، جسے ابن حبان نے ثقہ قرار دیا ہے وہ فرماتے ہیں : یہ بعض اوقات غلطی کر جاتا ہے جمہور نے اسے ضعیف کہا: ہے ۔

سیدنا ابوامامہ رضی اللہ عنہ بیان کرتے ہیں : سیدنا ابومسعود عقبہ بن عمرو رضی اللہ عنہ کی کنیز بکریاں چرا رہی تھی ان میں سے ایک بکری مرنے لگی تو اس کنیز نے ایک پتھر توڑا اور اس کے ذریعے بکری کو ذبح کر لیا پھر وہ اس کو لے کے سیدنا عقبہ بن عامر رضی اللہ عنہ کے پاس آئی اور انہیں اس بارے میں بتایا تو انہوں نے فرمایا : تم اسے لے کر نبی اکرم صلی اللہ علیہ وسلم کے پاس جاؤ اسی حالت میں جس طرح تم ہو ، نبی اکرم صلی اللہ علیہ وسلم نے اس خاتون سے دریافت کیا : کیا تم نے رگوں کو کاٹ دیا تھا ؟ اس نے جواب دیا : جی ہاں ! نبی اکرم صلی اللہ علیہ وسلم نے فرمایا : ہر وہ چیز جو رگوں کو کاٹ دے بشرطیکہ وہ ہڈی (سن) یا ناخن (ظفر) نہ ہو۔ ( تو وہ جائز ہے ) ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی علی بن یزید ہے اور وہ ضعیف ہے ویسے اس کی توثیق کی گئی ہے ۔

زربن حبیش بیان کرتے ہیں : اہل مدینہ ایک جنگ کے سلسلے میں نکلے میں نے ایک شخص کو دیکھا جو آگے سے گنجا تھا اور لمبا تڑنگا تھا ، وہ لوگوں سے ایک بالشت لمبا محسوس ہوتا تھا ، اس نے تہبند باندھا ہوا تھا اور چادر لی ہوئی تھی وہ یہ کہہ رہا تھا : اے لوگو ! روانہ ہو جاؤ اور تم کوئی غلط بات نہ کہنا اور کوئی شخص لاٹھی یا پتھر کے ذریعے خرگوش کو نہ مارے کہ پھر اس کو کھا لے بلکہ چھوٹے یا بڑے نیزے کے ذریعے ذبح کرنا ، میں نے دریافت کیا : یہ کون صاحب ہیں ؟ تو لوگوں نے بتایا : یہ سیدنا عمر بن خطاب ہیں ۔
یہ روایت امام طبرانی نے معجم کبیر میں نقل کی ہے اور اس کے رجال کی توثیق کی گئی ہے ۔