مجمع الزوائد ومنبع الفوائد

سیدنا سہل بن سعد رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں دو آدمیوں کے درمیان اس مسجد کے بارے میں اختلاف ہو گیا جس کی بنیاد تقویٰ پر رکھی گئی ہے ان دونوں میں سے ایک کا یہ کہنا تھا کہ اس سے مراد مسجد نبوی ہے اور دوسرے کا یہ کہنا تھا اس سے مراد مسجد قباء ہے وہ دونوں نبی اکرم صلی اللہ علیہ وسلم کی خدمت میں حاضر ہوئے اور انہوں نے نبی اکرم صلی اللہ علیہ وسلم سے اس کے بارے میں دریافت کیا ، تو نبی اکرم صلی اللہ علیہ وسلم نے ارشاد فرمایا : اس سے مراد میری یہ مسجد ہے ۔

ایک روایت میں یہ الفاظ ہیں : جب نبی اکرم صلی اللہ علیہ وسلم سے اس مسجد کے بارے میں دریافت کیا گیا جس کی بنیاد تقوی پر رکھی گئی ہے ، تو نبی اکرم صلی اللہ علیہ وسلم نے فرمایا : اس سے مراد میری مسجد ہے “ ۔ یہ تمام روایات امام أحمد نے نقل کی ہیں اور امام طبرانی نے اختصار کے ساتھ نقل کی ہیں اور ان دونوں کے رجال صحیح کے رجال ہیں ۔

سیدنا ابی بن کعب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” وہ مسجد جس کی بنیاد تقوی پر رکھی گئی ہے اس سے مراد میری یہ مسجد ہے “ ۔
یہ روایت امام أحمد نے نقل کی ہے اور اس کی سند میں ایک راوی عبداللہ بن عامر اسلمی ہے اور وہ ضعیف ہے ۔

سیدنا ابوہریرہ رضی اللہ عنہ بیان کرتے ہیں : میں ، سیدنا عبداللہ بن عمر رضی اللہ عنہما اور سیدنا سمرہ بن جندب رضی اللہ عنہ مسجد تقویٰ کی طرف چل پڑے ، ہم نبی اکرم صلی اللہ علیہ وسلم کی خدمت میں حاضر ہوئے ، آپ نے ہم سے فرمایا تم لوگ مسجد تقویٰ کی طرف چلو ! تو ہم لوگ اس کی طرف چل پڑے ، جب نبی اکرم صلی اللہ علیہ وسلم ہمارے سامنے آئے آپ کا ایک ہاتھ سیدنا ابوبکر رضی اللہ عنہ کے کندھے پر تھا اور دوسرا سیدنا عمر رضی اللہ عنہ کے کندھے پر تھا ، ہمیں آپ کا چہرہ مبارک چمکتا ہوا نظر آیا ، آپ نے دریافت کیا : یہ کون لوگ ہیں ؟ انہوں نے بتایا : عبداللہ بن عمر ہے ، ابوہریرہ ہے اور سمرہ ہے ۔
یہ روایت امام أحمد نے ابوامین کی نقل کردہ حدیث کے طور پر نقل کی ہے میں نے کسی کو اس کے حالات بیان کرتے ہوئے نہیں پایا ہے ۔
( علامہ ہیثمی فرماتے ہیں : ) میں یہ کہتا ہوں : اس باب سے متعلق بقیہ احادیث سورت براءت کی تفسیر سے متعلق باب میں آئیں گی اگر اللہ نے چاہا ۔