مجمع الزوائد ومنبع الفوائد

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے اللہ تعالیٰ کے اس فرمان کے بارے میں ارشاد فرمایا : ” حج کے متعین مہینے ہیں“ نبی اکرم صلی اللہ علیہ وسلم نے فرمایا : وہ شوال ذوالقعدہ اور ذوالج ہیں ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی حصین بن مخارق ہے ۔ امام طبرانی کہتے ہیں : یہ کوفی ہے ، اور ثقہ ہے ۔ امام دارقطنی رحمہ اللہ نے اسے ” ضعیف “ قرار دیا ہے ، اور اس کے بقیہ رجال کی توثیق کی گئی ہے ۔

سیدنا عبداللہ بن عباس رضی اللہ عنہما اللہ تعالی کے اس فرمان کے بارے میں بیان کرتے ہیں : ( ارشاد باری تعالیٰ ہے : ) ” حج کے متعین مہینے ہیں “ ۔ سیدنا عبداللہ بن عباس رضی اللہ عنہما فرماتے ہیں : وہ شوال ذوالقعدہ اور ذوالج ہیں حج صرف ان مہینوں میں فرض ہے ( یعنی ان مہینوں میں حج کا احرام باندھا جا سکتا ہے ) ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی مفضل بن صدقہ ہے ، اور وہ متروک ہے ۔

سیدنا عبداللہ بن عباس رضی اللہ عنہما بیان کرتے ہیں : سنت یہ ہے کہ حج کا احرام صرف حج والے مہینوں میں باندھا جائے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی حجاج بن ارطاۃ ہے ، اور اس کے بارے میں کلام کیا گیا ہے ویسے اس کی توثیق کی گئی ہے ۔