مجمع الزوائد ومنبع الفوائد

سیدہ ام سلمہ رضی اللہ عنہا بیان کرتی ہیں نبی اکرم صلی اللہ علیہ وسلم سیدہ ضباعہ بنت زبیر بن عبدالمطلب رضی اللہ عنہا کے پاس تشریف لائے جو بیمار تھیں نبی اکرم صلی اللہ علیہ وسلم نے فرمایا : کیا تم اس سفر میں ہمارے ساتھ روانہ نہیں ہو گی ؟ نبی اکرم صلی اللہ علیہ وسلم کا حجتہ الوداع کا ارادہ تھا انہوں نے عرض کی : یا رسول اللہ ! میں بیمار ہوں اور مجھے یہ اندیشہ ہے کہ میں بیماری کی وجہ سے سفر نہیں کر سکوں گی نبی اکرم صلی اللہ علیہ وسلم نے ارشاد فرمایا : تم حج کا احرام باندھ لو اور تم یہ کہو : اے اللہ ! جہاں تو نے مجھے روک لیا ( یعنی میں آگے جانے کے قابل نہ رہی ) وہیں میں احرام کھول دوں گی ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ ابن اسحاق نے اس میں سماع کی صراحت کی ہے اس کے بقیہ رجال ” صحیح “ کے رجال ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ ضباعہ رضی اللہ عنہا سے فرمایا تم حج کرو اور یہ شرط رکھو : جہاں تو نے مجھے روک لیا وہیں میں احرام کھول دوں گی ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی حجاج بن نصیر ہے ، جسے امام ابن حبان رحمہ اللہ نے ” ثقہ قرار دیا ہے وہ کہتے ہیں : یہ وہم کا شکار ہو جاتا ہے ، اور اس کے بارے میں کلام کیا گیا ہے ۔

سیدنا عبداللہ بن عمر رضی اللہ عنہما بیان کرتے ہیں : سیدہ ضباعہ بنت زبیر رضی اللہ عنہ نے حج کا ارادہ کیا ، تو نبی اکرم صلی اللہ علیہ وسلم نے ان سے فرمایا تم حج کر لو ( یعنی احرام باندھ لو ) اور یہ کہہ دو کہ جہاں تم نے مجھے روک دیا وہیں میں احرام کھول دوں گی ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی علی بن عاصم ہے اس کے بارے میں اس کے حافظے کی خرابی کی وجہ سے اور مستقل غلطی کرنے اور علماء کو حقیر سمجھنے کی وجہ سے اس کے بارے میں کلام کیا گیا ہے ۔