مجمع الزوائد ومنبع الفوائد

سیدنا واثلہ رضی اللہ عنہ کے بارے میں یہ بات منقول ہے : وہ پیر اور جمعرات کے دن روزہ رکھا کرتے تھے ۔ وہ یہ بات بیان کرتے تھے ۔ نبی اکرم صلی اللہ علیہ وسلم یہ روزے رکھتے تھے ، اور ارشاد فرماتے تھے : ان دنوں میں اعمال اللہ تعالیٰ کی بارگاہ میں پیش کیے جاتے ہیں ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی محمد بن عبدالرحمن قشیری ہے ، اور وہ متروک ہے ۔

سیدنا عبداللہ بن مسعود رضی اللہ عنہ فرماتے ہیں : نبی اکرم صلی اللہ علیہ وسلم پیر اور جمعرات کے دن روزہ رکھا کرتے تھے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ابوبلال اشعری اور وہ ضعیف ہے ۔

سیدنا ابورافع رضی اللہ عنہ بیان کرتے ہیں : نبی اکرم صلی اللہ علیہ وسلم پیر اور جمعرات کے دن روزہ رکھا کرتے تھے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی یحیی حمانی ہے ، اور اس کے بارے میں کلام کیا گیا ہے ۔