مجمع الزوائد ومنبع الفوائد

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم ہفتے کے دن روزہ نہ رکھو البتہ فرض کا معاملہ مختلف ہے اگر تمہیں ( ہفتے کے دن ) صرف کسی درخت کی چھال ملتی ہے ، تو تم اس کے ذریعے ہی افطار کرو ( یعنی روزہ نہ رکھو ) “ ۔
یہ روایت امام طبرانی نے معجم کبیر میں اسماعیل بن عیاش کے حوالے سے اہل حجاز سے نقل کی ہے ، اور اہل حجاز کے بارے میں یہ راوی ضعیف ہے ۔

کریب بیان کرتے ہیں : کچھ لوگوں نے مجھے سیدہ ام سلمہ رضی اللہ عنہا کے پاس بھیجا تاکہ میں ان سے یہ دریافت کروں کہ نبی اکرم صلی اللہ علیہ وسلم کون سے دن زیادہ روزے رکھا کرتے تھے ؟ تو سیدہ ام سلمہ رضی اللہ عنہا نے بتایا : ہفتے اور اتوار کے دن آپ یہ فرماتے تھے : یہ دونوں دن مشرکین کی عید ( کے دن ہیں ) ، تو مجھے یہ پسند ہے کہ میں ان کے برخلاف کروں ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ابن حبان نے اسے ” صحیح “ قرار دیا ہے ۔

عبید اعرج بیان کرتے ہیں : میری دادی نے مجھے یہ بات بتائی ہے کہ وہ نبی اکرم صلی اللہ علیہ وسلم کی خدمت میں حاضر ہوئیں نبی اکرم صلی اللہ علیہ وسلم اس وقت ناشتہ کر رہے تھے یہ ہفتے کے دن کی بات ہے نبی اکرم صلی اللہ علیہ وسلم نے ان خاتون سے فرمایا تم آگے آؤ اور کھانا کھاؤ اس نے عرض کی : میں نے روزہ رکھا ہوا ہے نبی اکرم صلی اللہ علیہ وسلم نے فرمایا : کیا تم نے گزشتہ کل روزہ رکھا تھا اس نے جواب دیا : جی نہیں نبی اکرم صلی اللہ علیہ وسلم نے ارشاد فرمایا : پھر تم کھا لو کیونکہ ہفتے کے دن کا روزہ نہ تمہارے حق میں ہو گا ، اور نہ تمہارے خلاف ہو گا ( یعنی نہ گناہ ہو گا ، اور نہ ہی ثواب ملے گا ) ۔
( علامہ ہیثمی فرماتے ہیں : ) میں یہ کہتا ہوں ، اس خاتون کے حوالے سے ہفتے کے دن روزہ رکھنے کے بارے میں ایک حدیث ” سنن “ میں منقول ہے ، جو اس کے علاوہ ہے ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

عمیر بن جبیر ، جو خارجہ کے غلام ہیں وہ بیان کرتے ہیں : وہ خاتون جس نے نبی اکرم صلی اللہ علیہ وسلم سے ہفتے کے دن روزہ رکھنے کے بارے میں سوال کیا تھا اس نے انہیں یہ بات بتائی کہ اس نے نبی اکرم صلی اللہ علیہ وسلم سے اس بارے میں سوال کیا ، تو نبی اکرم صلی اللہ علیہ وسلم نے ارشاد فرمایا : نہ تمہیں اس بارے میں کچھ ملے گا نہ تمہارے خلاف کچھ ہو گا ( یعنی نہ تمہیں ثواب ملے گا ، اور نہ ہی تمہیں گناہ ہو گا ) “ ۔
یہ روایت امام أحمد نے نقل کی ہے ۔ عمیر نامی اس شخص سے میں واقف نہیں ہوں ۔