مجمع الزوائد ومنبع الفوائد

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” شب قدر کو آخری عشرے میں تلاش کرو اگر تم مغلوب ہو جاؤ تو باقی رہ جانے والی سات راتوں کے حوالے سے مغلوب نہ ہونا “ ۔
یہ روایت امام أحمد نے نقل کی ہے ۔ اس کی سند میں ایک راوی عبدالحمید بن حسن ہلالی ہے ، جسے یحییٰ بن معین اور دیگر حضرات نے ” ثقہ “ قرار دیا ہے ، اور اس کے بارے میں کلام کیا گیا ہے ۔

سیدنا علی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” شب قدر میں ، میں نے چاند کو دیکھا وہ یوں تھا ، جیسے وہ نصف پیالہ ہوں“ ۔
یہ روایت امام ابویعلیٰ نے نقل کی ہے ۔

سیدنا علی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں اس وقت نکلا جب چاند نکلا تو وہ پیالے کے ٹکڑے کی طرح تھا ، آپ نے ارشاد فرمایا : آج کی رات شب قدر ہے “ ۔
یہ روایت عبداللہ بن أحمد نے اپنی زیادات میں نقل کی ہے ، اور امام ابویعلیٰ نے نقل کی ہے ۔ جیسا کہ پہلے گزر چکا ہے ۔ اس کی سند میں ایک راوی خدیج بن معاویہ ہے ، جسے امام أحمد اور دیگر حضرات نے ” ثقہ “ قرار دیا ہے ، اور اس کے بارے میں کلام کیا گیا ہے ۔

سیدنا عمر بن خطاب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اسے ( یعنی شب قدر کو ) آخری عشرے کی طاق راتوں میں تلاش کرو “ ۔
یہ روایت امام ابویعلیٰ اور امام بزار نے نقل کی ہے ۔ امام ابویعلیٰ کے رجال ثقہ ہیں ۔

ابوعقرب بیان کرتے ہیں : میں سیدنا عبداللہ بن مسعود رضی اللہ عنہ کے پاس رمضان کے مہینے میں ایک صبح آیا تو میں نے انہیں گھر کی چھت پر بیٹھے ہوئے پایا میں نے ان کی آواز سنی وہ یہ کہہ رہے تھے اللہ نے سچ فرمایا ہے ، اور اس کے رسول نے تبلیغ کر دی ہے ہم نے کہا: ہم نے آپ کو یہ کہتے ہوئے سنا ہے اللہ نے سچ فرمایا ہے ، اور اس کے رسول نے تبلیغ کر دی ہے ، تو انہوں نے بتایا : نبی اکرم صلی اللہ علیہ وسلم نے ارشاد فرمایا : ” شب قدر رمضان کی آخری سات راتوں کے نصف میں ہوتی ہے ، اور اس سے اگلے دن جب سورج نکلتا ہے ، تو وہ صاف ہوتا ہے ، اس کی شعاع نہیں ہوتی“ ۔ میں نے اس ( سورج ) کی طرف دیکھا تو میں نے اسے اسی طرح پایا جس طرح نبی اکرم صلی اللہ علیہ وسلم نے ارشاد فرمایا تھا :
یہ روایت امام أحمد اور امام ابویعلیٰ نے نقل کی ہے ۔ ابوعقرب نامی راوی کے حالات بیان کرتے ہوئے میں نے کسی کو نہیں پایا ہے ۔ اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا آپ نے دریافت کیا : تم میں سے کس شخص کو صهباوات والی رات یاد ہے ؟ تو سیدنا عبداللہ رضی اللہ عنہ نے عرض کی : میرے ماں باپ آپ پر قربان ہوں مجھے ، اس وقت میرے ہاتھ میں کچھ کھجوریں تھیں میں ان کے ذریعے سحری کر رہا تھا اور پالان کے پچھلے حصے کے ذریعے پردہ کر رہا تھا جو صبح صادق کی چمک کی وجہ سے تھا یہ اس وقت ہوا تھا جب چاند نکلا تھا “ ۔
یہ روایت امام أحمد اور امام ابویعلیٰ نے اور امام طبرانی نے معجم کبیر میں نقل کی ہے ۔ انہوں نے یہ الفاظ نقل کیے ہیں : ” وہ ستائیسویں رات تھی “ ۔ ابوعبیدہ نامی راوی نے اپنے والد ( یعنی سیدنا عبداللہ بن مسعود رضی اللہ عنہ ) سے سماع نہیں کیا ہے ۔

سیدنا جابر بن سمرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” شب قدر کو آخری عشرے میں تلاش کرو “ ۔
یہ روایت امام أحمد نے نقل کی ہے ، اور ان کے صاحبزادے نے یہ الفاظ نقل کیے ہیں : ” رمضان کے آخری عشرے کی طاق راتوں میں تلاش کرو کیونکہ میں نے اسے دیکھا تھا پھر میں اس کو بھول گیا وہ بارش اور ہوا والی رات ہو گی“ ۔ ( یہاں بارش کے لئے ایک لفظ مختلف نقل ہوا ہے ) ۔
یہ روایت امام بزار نے اور امام طبرانی نے معجم کبیر میں نقل کی ہے ، اور یہ الفاظ زائد نقل کیے ہیں : ” اور کڑک والی ہو گی“ ۔ امام أحمد کے رجال ” صحیح“ کے رجال ہیں ۔

سیدنا معاذ بن جبل رضی اللہ عنہ بیان کرتے ہیں : اللہ کے رسول صلی اللہ علیہ وسلم سے شب قدر کے بارے میں سوال کیا گیا تو آپ نے ارشاد فرمایا : یہ آخری عشرے میں ہو گی تم تیسری یا پانچویں رات میں قیام کرنا “ ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدنا جابر رضی اللہ عنہ بیان کرتے ہیں : لشکر کے امیر سیدنا غالب لیثی رضی اللہ عنہ تھے ، اور سیدنا قطبہ بن عامر رضی اللہ عنہ تھے جو نبی اکرم صلی اللہ علیہ وسلم کی خدمت میں کھجور کے باغ میں داخل ہوئے تھے ، اس وقت آپ نے احرام باندھا ہوا تھا اور آپ اس وقت دروازے سے باہر نکل گئے تھے انہوں نے دیوار والی سمت میں فصیل بنائی ہوئی تھی ، اور سیدنا عبداللہ بن انیس رضی اللہ عنہ تھے جنہوں نے نبی اکرم صلی اللہ علیہ وسلم سے شب قدر کے بارے میں سوال کیا تھا اس وقت بائیس راتیں گزر چکی تھیں تو نبی اکرم صلی اللہ علیہ وسلم نے ارشاد فرمایا تھا : اس مہینے جو سات راتیں باقی رہ گئیں ان میں اسے تلاش کرو ۔
یہ روایت امام أحمد نے نقل کی ہے ، اور اصل میں یہ اسی طرح ہے ، جس طرح آپ دیکھ رہے ہیں اس کی سند حسن ہے ۔

سیدنا عبادہ بن صامت رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم سے شب قدر کے بارے میں سوال کیا ، تو نبی اکرم صلی اللہ علیہ وسلم نے ارشاد فرمایا : ” یہ رمضان میں ہو گی تم اسے آخری عشرے میں تلاش کرو کیونکہ یہ طاق رات ہو گی اکیسویں ہو گی یا تئیسویں ہو گی یا پچیسویں ہو گی یا ستائیسویں ہو گی یا انتیسویں ہو گی یا آخری ہو گی جو شخص اس میں نوافل ادا کرے گا وہ ایمان کی حالت میں ثواب کی امید رکھتے ہوئے اس کو تلاش کرے گا ، اور پھر اسے اس رات کی ، توفیق مل جائے تو اس شخص کے گزشتہ اور آئندہ گناہوں کی مغفرت ہو جائے گی “ ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ اس کی سند میں ایک راوی عبداللہ بن محمد بن عقیل ہے ، اور اس کے بارے میں کلام کیا گیا ہے ویسے اس کی توثیق کی گئی ہے ۔

سیدنا عبادہ بن صامت رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” شب قدر باقی رہ جانے والے عشرے میں ہو گی جو شخص ان راتوں میں ثواب کی امید رکھتے ہوئے نوافل ادا کرے گا ، تو اللہ تعالیٰ اس شخص کے گزشتہ اور آئندہ گناہوں کی بخشش کر دے گا یہ طاق رات ہوتی ہے نویں یا ساتویں یا پانچویں یا تیسری یا آخری رات ہو گی نبی اکرم صلی اللہ علیہ وسلم نے ارشاد فرمایا : ” شب قدر کی مخصوص نشانی یہ ہے کہ وہ صاف اور روشن ہو گی ، اس میں چاند چمک رہا ہو گا ، وہ رات ساکن اور معتدل ہو گی ، اس رات میں نہ ٹھنڈک ہو گی ، اور نہ گرمی ہو گی ، اور اس رات میں ستارہ نہیں ٹوٹے گا یہاں تک کہ صبح ہو جائے اور اس کی مخصوص نشانی یہ ہے کہ اس سے اگلی صبح جب سورج نکلتا ہے ، تو وہ بالکل برابر ہوتا ہے اس میں شعاع نہیں ہوتی وہ چودھویں رات کے چاند کی طرح ہوتا ہے اس دن شیطان کے لئے یہ حلال نہیں ہے کہ وہ سورج کے ہمراہ نکلے “ ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے شب قدر کے بارے میں ارشاد فرمایا : ” یہ ستائیسویں یا انتیسویں رات ہوتی ہے ، اور اس رات میں فرشتے زمین میں بے شمار تعداد میں ہوتے ہیں “ ۔
یہ روایت امام أحمد نے امام بزار نے اور امام طبرانی نے معجم اوسط میں نقل کی ہے ، اور اس کے رجال ثقہ ہیں ۔

سیدنا ابوہریرہ رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” شب قدر کو ، سترہویں انیسویں ، اکیسویں ، تیئسویں ، پچیسویں ، ستائیسویں ، یا انتیسویں رات میں تلاش کرو “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابومہزم ہے ، اور وہ ضعیف ہے ۔

سیدنا بلال رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” شب قدر ، جو بیسویں رات ہوتی ہے “ ۔
( علامہ ہیثمی فرماتے ہیں : ) میں یہ کہتا ہوں : سیدنا بلال رضی اللہ عنہ کے حوالے سے ” صحیح “ میں یہ حدیث منقول ہے ( یعنی شب قدر ) آخری عشرے میں ہوتی ہے ۔
یہ روایت امام أحمد نے نقل کی ہے ، اور اس کی سند حسن ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اس کو تلاش کرنا چاہتا ہو وہ ستائیسویں رات میں تلاش کر یا آپ نے فرمایا : تم لوگ اسے ستائیسویں میں رات میں تلاش کرو ! راوی کہتے ہیں : نبی اکرم صلی اللہ علیہ وسلم کی مراد شب قدر تھی “ ۔
( علامہ ہیثمی فرماتے ہیں : ) میں یہ کہتا ہوں : سیدنا عبداللہ بن عمر رضی اللہ عننہما کے حوالے سے ” صحیح “ میں ایک حدیث منقول ہے ، جو اس کے علاوہ ہے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : میں رمضان کے مہینے میں سویا ہوا تھا میرے خواب میں کوئی آیا اور مجھے کہا: گیا کہ آج رات شب قدر ہے سیدنا عبداللہ بن عباس رضی اللہ عنہما بیان کرتے ہیں : میں اٹھا میں اونگھ رہا تھا ۔ میں نے خیمے کی ایک رسی کو پکڑا جو نبی اکرم صلی اللہ علیہ وسلم کا خیمہ تھا پھر میں نبی اکرم صلی اللہ علیہ وسلم کے پاس آیا تو نبی اکرم صلی اللہ علیہ وسلم نماز ادا کر رہے تھے ، میں نے اس رات کا جائزہ لیا تو وہ تئیسویں رات تھی ۔
یہ روایت امام أحمد نے اور امام طبرانی نے معجم کبیر میں نقل کی ہے ، اور امام أحمد کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : اے اللہ کے نبی ! میں بوڑھا عمر رسیدہ بیمار شخص ہوں آپ مجھے کسی ایک رات کے بارے میں ہدایت کیجئے تاکہ اللہ تعالی مجھے اس رات شب قدر نصیب کر دے تو نبی اکرم صلی اللہ علیہ وسلم نے ارشاد فرمایا : ” تم پر ساتویں رات لازم ہے “ ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔

سیدنا انس بن مالک رضی اللہ عنہ بیان کرتے ہیں : جہنی شخص نے عرض کی : یا رسول اللہ ! جیسا کہ آپ جانتے ہیں ہماری جو حالت ہے ، تو ہم اس مہینے میں ( پورا مہینہ ) حاضر نہیں ہو سکتے ہیں آپ ہمیں شب قدر کے بارے میں بتا دیجیے نبی اکرم صلی اللہ علیہ وسلم نے ارشاد فرمایا : تم آخری سات راتوں میں حاضر ہو جانا اس نے عرض کی : میں اس کی استطاعت نہیں رکھتا نبی اکرم صلی اللہ علیہ وسلم نے ارشاد فرمایا : تم اسے اس رات میں تلاش کرنا جو ساتویں رات باقی رہ گئی ہو ، اور وہ آج کی رات ہے راوی کہتے ہیں : میں نے عرض کی : یا رسول اللہ ! آج تو تیئسویں رات ہے ابھی تو آٹھ راتیں باقی ہیں ۔ نبی اکرم صلی اللہ علیہ وسلم نے فرمایا : اس طرح بھی ہوتا ہے مہینہ بھی کم ہو جاتا ہے ، تو پھر یہ سات راتیں باقی رہ جائیں گی “ ۔
یہ روایت امام ابویعلیٰ نے نقل کی ہے ۔ اس کی سند میں ایسا راوی ہے ، جس سے میں واقف نہیں ہوں ۔

سیدنا انس رضی اللہ عنہ بیان کرتے ہیں : ایک رات نبی اکرم صلی اللہ علیہ وسلم تشریف لائے آپ کا ارادہ یہ تھا کہ ہمیں شب قدر کے بارے میں بتائیں گے آپ کو اس کے بارے میں بتایا گیا تھا آپ نے اس کے بارے میں بحث و تمحیص کی آواز سنی تو آپ سے اس کا علم لے لیا تھا ۔
یہ روایت امام ابویعلیٰ نے امام طبرانی نے معجم اوسط میں نقل کی ہے ۔ اس میں تابعی ساقط ہے ، اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم سے شب قدر کے بارے میں دریافت کیا گیا ، تو آپ نے ارشاد فرمایا : مجھے اس کے بارے میں علم دیا گیا تھا پھر وہ مجھ سے چلا گیا تو تم اسے باقی رہ جانے والی سات یا باقی رہ جانے والی تین راتوں میں تلاش کرو ۔
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم اسے آخری عشرے میں نویں ساتویں اور پانچویں رات میں تلاش کرو “ ۔
یہ روایت امام بزار نے نقل کی ہے ، اور اس کے رجال ” صحیح“ کے رجال ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” شب قدر معتدل رات ہوتی ہے نہ گرم ہوتی ہے نہ ٹھنڈی ہوتی ہے “ ۔
یہ روایت امام بزار نے نقل کی ہے ، اور اس کی سند میں ایک راوی سلمہ بن وہرام ہے ۔ امام ابن حبان رحمہ اللہ اور دیگر حضرات نے اسے ” ثقہ “ قرار دیا ہے ، اور اس کے بارے میں کلام کیا گیا ہے ۔

مرشد بیان کرتے ہیں : درمیانی جمرہ کے قریب میری ملاقات سیدنا ابوذر غفاری رضی اللہ عنہ سے ہوئی میں نے ان سے شب قدر کے بارے میں دریافت کیا ، تو انہوں نے فرمایا : اس کے بارے میں مجھ سے زیادہ کسی اور نے سوال نہیں کیا انہوں نے بتایا میں نے عرض کی : یا رسول اللہ ! کیا یہ رات انبیاء پر وحی کے ذریعے ان کی طرف نازل ہوئی تھی اور پھر اٹھا لی گئی نبی اکرم صلی اللہ علیہ وسلم نے ارشاد فرمایا : جی نہیں ۔ بلکہ یہ قیامت کے دن تک رہے گی میں نے عرض کی : یا رسول اللہ ! یہ کون سی رات کو ہوتی ہے نبی اکرم صلی اللہ علیہ وسلم نے ارشاد فرمایا : اگر مجھے اجازت ملی تو میں تمہیں اس کے بارے میں بتا دوں گا ، لیکن تم اسے نویں یا ساتویں رات میں تلاش کرو اور اس کے بعد تم مجھ سے سوال نہ کرنا پھر نبی اکرم صلی اللہ علیہ وسلم دوسری طرف متوجہ ہوئے اور بات چیت کرنے لگے میں نے عرض کی : یا رسول اللہ ! سات راتوں میں سے یہ کون سی ہوتی ہے ، تو نبی اکرم صلی اللہ علیہ وسلم مجھ پر اتنے غضبناک ہوئے کہ آپ اس سے پہلے اور اس کے بعد مجھ پر کبھی اتنے غضبناک نہیں ہوئے تھے پھر آپ نے ارشاد فرمایا : کیا میں نے تمہیں منع نہیں کیا کہ اگر مجھے اس کے بارے میں اجازت دی گئی تو میں تمہیں اس کے بارے میں بتا دوں گا البتہ ( اس کے بعد راوی نے ایک کلمہ ذکر کیا ہے ، جو عبارت میں ذکر نہیں ہوا ) یہ آخری سات راتوں میں ہو سکتی ہے “ ۔
یہ روایت امام بزار نے نقل کی ہے ، اور مرثد نامی اس راوی سے اس کے باپ مالک کے علاوہ اور کسی نے روایت نقل نہیں کی ہے اس کے بقیہ رجال ثقہ ہیں ۔

سیدنا عقبہ بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کھڑے ہوئے آپ نے رمضان کے مہینے میں منبر پر خطبہ ارشاد فرمایا آپ نے فرمایا : جب میں اس منبر پر کھڑا ہوا اس وقت مجھے شب قدر کا علم تھا تم اسے آخری عشرے کی طاق راتوں میں تلاش کرو ۔
یہ روایت امام طبرانی نے معجم اوسط اور معجم کبیر میں نقل کی ہے ۔ اس کی سند میں ایک راوی عبدالعزیز بن یحیی مدنی ہے ، اور وہ متروک ہے ۔

سیدنا کعب بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کھڑے ہوئے آپ نے رمضان کے مہینے میں منبر پر خطبہ دیتے ہوئے ارشاد فرمایا : ” جب میں منبر پر کھڑا ہوا تھا ، تو مجھے شب قدر کے بارے میں علم تھا ، تو تم اسے آخری عشرے کی طاق راتوں میں تلاش کرو “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عبدالعزیز بن یحیی مدنی ہے ، اور وہ متروک ہے ۔

سیدنا کعب بن عجرہ رضی اللہ عنہ بیان کرتے ہیں : نبی اکرم صلی اللہ علیہ وسلم منبر پر چڑھے آپ نے ارشاد فرمایا : ” جب میں ( منبر پر ) چڑھا تھا ، تو میں علم رکھتا تھا اور مجھے شب قدر کے بارے میں علم تھا ، تو تم اسے آخری عشرے کی طاق راتوں میں تلاش کرو “ ۔
یہ روایت امام طبرانی نے معجم اوسط اور معجم کبیر میں حمدہ بنت عبید کے حوالے سے ان کی والدہ سے نقل کی ہے ، اور ان کی والدہ سے میں واقف نہیں ہوں ، اس روایت کے بقیہ رجال ثقہ ہیں ۔

سیدنا جابر بن سمرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” شب قدر کو ستائیسویں رات میں تلاش کرو “ ۔
یہ روایت امام طبرانی نے معجم اوسط میں ابوبکر بن ابوشیبہ کے حوالے سے ” وجادہ “ کے طور پر ان کے والد کی تحریر سے نقل کی ہے ، اور اس کے رجال ثقہ ہیں ۔

خارجہ بن زید بن ثابت اپنے والد کے حوالے سے یہ بات نقل کرتے ہیں : وہ رمضان کے مہینے کی تیئسویں رات اور ستائیسویں رات میں رات بھر عبادت کیا کرتے تھے ، لیکن جس طرح وہ ستر ہوئیں رات میں عبادت کرتے تھے اس طرح نہیں کرتے تھے ان سے کہا: گیا آپ سترہویں رات اہتمام کے ساتھ کیوں عبادت کرتے ہیں انہوں نے فرمایا : یہ وہ رات ہے ، جس میں قرآن نازل ہوا جس کی اگلی صبح حق اور باطل کے درمیان فرق ہو گیا ( یعنی غزوہ بدر ہوا ) راوی کہتے ہیں : اس رات میں ان کی حالت یہ ہوتی تھی ، کہ ان کا چہرہ چمکدار ہوتا تھا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ابوبلال اشعری ہے ، اور وہ ضعیف ہے ۔

حوط عبدی بیان کرتے ہیں : میں نے سیدنا زید بن ارقم رضی اللہ عنہ سے شب قدر کے بارے میں سوال کیا ، تو انہوں نے فرمایا : مجھے اس بارے میں کوئی شک اور کوئی شبہ نہیں ہے کہ یہ سترہویں رات ہوتی ہے ، جس میں قرآن نازل ہوا اور جب دو گروہ ایک دوسرے کے سامنے آئے تھے ۔
یہ روایت امام طبرانی نے معجم کبیر میں نقل کی ہے ۔ حوط نامی راوی کے بارے میں امام بخاری رحمہ اللہ نے یہ کہا: ہے : اس کی نقل کردہ یہ حدیث منکر ہے ۔

سیدنا فلتان بن عاصم رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ہم لوگ بیٹھے ہوئے آپ کا انتظار کر رہے تھے اسی دوران آپ ہمارے پاس تشریف لائے آپ کے چہرے پر غضب کے آثار تھے آپ کافی دیر بیٹھے رہے آپ نے اس دوران کوئی بات چیت نہیں کی پھر آپ کی یہ کیفیت ختم ہوئی تو آپ نے ارشاد فرمایا : میں نکل کر تمہاری طرف آیا تو میرے لئے شب قدر واضح تھی اور گمراہی والا مسیح ( یعنی دجال ) واضح تھا میں تمہاری طرف نکل کر اس لئے آیا تھا تاکہ تمہیں اس کے بارے میں بتا دوں اور اس کے حوالے سے تمہیں اطلاع دے دوں ۔ مسجد میں دو آدمیوں سے میری ملاقات ہوئی جو ایک دوسرے کے ساتھ جھگڑا کر رہے تھے اور ان کے درمیان شیطان موجود تھا ۔ میں نے ان دونوں کے درمیان جھگڑا ختم کروانا چاہا تو اس دوران مجھ سے وہ علم رخصت ہو گیا یہ ( شب قدر ) آخری عشرے میں ہو گی جہاں تک دجال کا تعلق ہے ، اور تو اس کی پیشانی کے بال اڑے ہوئے ہوں گے ، اس کی آنکھ پر ہاتھ پھیرا گیا ہو گا ( یعنی وہ کانا ہو گا ) اس کی گردن چوڑی ہو گی ، اور اس میں ابن عزی ( راوی کو شک ہے ، شاید یہ الفاظ ہیں : ) عبدالعزی بن فلاں کا خون ( یعنی جھلک ) ہو گی ۔ ایک روایت میں یہ الفاظ ہیں : ” جہاں تک شب قدر کا تعلق ہے ، تو تم اسے آخری عشرے میں تلاش کرو “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح“ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم تیزی سے چلتے ہوئے آئے ہم بیٹھے ہوئے تھے ۔ آپ کی تیزی نے ہمیں پریشان کر دیا جب آپ ہمارے پاس آئے ، تو آپ نے ہمیں سلام کیا ، پھر آپ نے ارشاد فرمایا : میں تم لوگوں کی طرف اس لئے آیا تھا تاکہ تمہیں شب قدر کے بارے میں بتاؤں پھر تمہارے پاس پہنچنے تک اسے بھول گیا “ ۔ ۔ ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی قابوس بن ابوظبیان ہے اس کے بارے میں کلام کیا گیا ہے ، اور اس کی توثیق بھی کی گئی ہے ۔

سیدنا عبداللہ بن انیس رضی اللہ عنہ کے بارے میں یہ بات منقول ہے : انہوں نے عرض کی : یا رسول اللہ ! آپ مجھے بتائیے کہ کون سی رات میں شب قدر کو تلاش کیا جانا چاہیے ؟ نبی اکرم صلی اللہ علیہ وسلم نے ارشاد فرمایا : اگر اس بات کا اندیشہ نہ ہوتا کہ لوگ نماز پڑھنا ہی ترک کر دیں گے اور صرف اسی رات میں پڑھیں گے تو میں تمہیں بتا دیتا ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

عبداللہ بن جحش اپنے والد کا یہ بیان نقل کرتے ہیں : میں نے عرض کی : یا رسول اللہ میں ویرانے میں رہتا ہوں اور وہاں نماز ادا کرتا ہوں آپ مجھے کسی مخصوص رات کے بارے میں ہدایت کر دیجیے تاکہ میں اس رات میں مسجد میں آ جاؤں گا ، اور وہاں نماز ادا کروں گا ، تو نبی اکرم صلی اللہ علیہ وسلم نے ارشاد فرمایا : تم تئیسویں رات میں آ جانا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ابن اسحاق ہے ، اور وہ ثقہ ہے لیکن وہ تدلیس کرنے والا ہے ۔

سیدنا عوف بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم رمضان کے آخری عشرے میں اعتکاف کیے ہوئے تھے ، جب تیئسویں رات آئی تو آپ نے ارشاد فرمایا : جو شخص آج رات ہمارے ساتھ نوافل ادا کرنا چاہے وہ ادا کر لے پھر نبی اکرم صلی اللہ علیہ وسلم نے ہمیں نوافل پڑھائے یہاں تک کہ ایک تہائی رات گزر گئی پھر آپ نے نماز ختم کی میں آپ کے ساتھ چلتا ہوا آپ کے خیمے تک آیا ہم نے عرض کی : یا رسول اللہ ! اگر آپ ہمیں اس رات میں نوافل پڑھاتے رہتے تو یہ مناسب تھا نبی اکرم صلی اللہ علیہ وسلم نے ارشاد فرمایا : آدمی کے لئے اتنا ہی مناسب ہے کہ وہ امام کے ساتھ نوافل ادا کرے یہاں تک کہ جب امام نماز ختم کر دے ( تو آدمی بھی ختم کر دے ) تو یہ اس کے لئے پوری رات کے نوافل نوٹ کیے جائیں گے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عثمان بن عطاء خراسانی ہے ، جسے دحیم نے ” ثقہ “ قرار دیا ہے ، اور ائمہ نے اسے ضعیف کہا: ہے ۔

سیدنا واثلہ بن اسقع رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” شب قدر معتدل رات ہوتی ہے نہ گرم ہوتی ہے نہ ٹھنڈی ہوتی ہے نہ اس میں بادل ہوتا ہے نہ بارش ہوتی ہے ، اور نہ ہوا ہوتی ہے اس میں ستارہ نہیں ٹوٹتا اور اس کے اگلے دن کی نشانی یہ ہے کہ جب سورج نکلتا ہے ، تو اس میں شعاع نہیں ہوتی “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی بشر بن عون ہے اس نے بکار بن تمیم سے
یہ روایت نقل کی ہے ، اور یہ دونوں ضعیف ہیں ۔