مجمع الزوائد ومنبع الفوائد

سیدنا عبداللہ بن ثعلبہ بن صعیر رضی اللہ عنہ ، جن کی پیشانی پر نبی اکرم صلی اللہ علیہ وسلم نے دست مبارک پھیرا تھا اور انہوں نے صحابہ کرام کا زمانہ پایا ہے ، وہ بیان کرتے ہیں : لوگ مجھے بوسہ دینے سے منع کرتے تھے اس اندیشے کے تحت کہ میں اس سے آگے بڑھ جاؤں گا پھر آج بھی مسلمان مجھے اس سے منع کرتے ہیں اور ان میں سے کوئی شخص یہ کہتا ہے نبی اکرم صلی اللہ علیہ وسلم کو اللہ تعال کی طرف سے جو حفاظت حاصل تھی وہ کسی اور کو حاصل نہیں ہے ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔

سیدنا عمر بن خطاب رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو خواب میں دیکھا میں نے آپ کو دیکھا کہ آپ میری طرف نہیں دیکھ رہے ہیں میں نے عرض کی : یا رسول اللہ ! کیا وجہ ہے ؟ آپ نے ارشاد فرمایا : کیا تم نے روزے کی حالت میں بوسہ نہیں لیا تھا ۔ میں نے عرض کی : اس ذات کی قسم جس کے دست قدرت میں عمر کی جان ہے اب میں کبھی بھی روزے کی حالت میں بوسہ نہیں لوں گا ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں امام بزار بیان کرتے ہیں : سیدنا عمر رضی اللہ عنہ کے حوالے سے نبی اکرم صلی اللہ علیہ وسلم سے اس کے برخلاف بھی روایت کیا گیا ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے اس بات سے منع کیا ہے کہ آدمی روزے کی حالت میں بوسہ لے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حارث بن نبھان ہے ۔ ابن عدی کہتے ہیں : اس کے حوالے سے حسن احادیث منقول ہیں اور یہ ان افراد میں سے ایک ہے ، جن کی حدیث کو نوٹ کیا جائے گا ائمہ نے اس کو ” ضعیف “ قرار دیا ہے ۔

سیدنا عمر بن خطاب رضی اللہ عنہ کے بارے میں یہ بات منقول ہے : وہ روزہ دار کو بوسہ لینے سے منع کرتے تھے وہ یہ فرماتے تھے : تم میں سے کسی کو بھی وہ عصمت حاصل نہیں ہے ، جو نبی اکرم صلی اللہ علیہ وسلم کو حاصل تھی ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی زید بن حبان رقی ہے ، جسے ابن حبان اور دیگر حضرات نے ” ثقہ “ قرار دیا ہے ، اور اس کے بارے میں کلام کیا گیا ہے ۔

سیدنا عبداللہ بن مسعود رضی اللہ عنہ ایسے شخص کے بارے میں فرماتے ہیں : جو روزے کی حالت میں بوسہ لیتا ہے وہ فرماتے ہیں : وہ اس کی جگہ ایک دن کی قضاء کرے گا سفیان ثوری بیان کرتے ہیں : اس کے مطابق فتویٰ نہیں دیا جاتا ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : ہم نبی اکرم صلی اللہ علیہ وسلم کے پاس موجود تھے ایک شخص آیا اور اس نے عرض کی : یا رسول اللہ ! کیا میں روزے کی حالت میں بوسہ لے لیا کروں ۔ نبی اکرم صلی اللہ علیہ وسلم نے ارشاد فرمایا : جی نہیں راوی کہتے ہیں : پھر ایک عمر رسیدہ شخص آیا اور اس نے عرض کی : کیا میں روزے کی حالت میں بوسہ لے لیا کروں ۔ نبی اکرم صلی اللہ علیہ وسلم نے ارشاد فرمایا : جی ہاں ۔ راوی کہتے ہیں : تو ہم نے ایک دوسرے کی طرف دیکھنا شروع کیا ، تو نبی اکرم صلی اللہ علیہ وسلم نے ارشاد فرمایا : مجھے پتہ ہے تم کیوں ایک دوسرے کی طرف دیکھ رہے ہو ؟ بوڑھا شخص اپنے آپ پر ق ابورکھتا ہے ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ اس کی سند میں ایک راوی ابن لہیعہ ہے ، اور اس کی نقل کردہ حدیث حسن ہے ، اور اس کے بارے میں کلام کیا گیا ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم سے جب کوئی نوجوان شخص بوسہ لینے کے بارے میں دریافت کرتا تو آپ اسے منع کر دیتے تھے ، اور جب کوئی بوڑھا شخص آپ سے اس بارے میں دریافت کرتا تھا ، تو آپ صلی اللہ علیہ وسلم اسے رخصت دے دیتے تھے ۔ آپ یہ ارشاد فرماتے تھے : ” نوجوان شخص بوڑھے کی مانند نہیں ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عباد بن صہیب ہے ، اور وہ متروک ہے ۔

سیدنا عبداللہ بن عباس رضی اللہ عنہما کے بارے میں یہ بات منقول ہے : وہ بوڑھے شخص کو روزے کی حالت میں بوسہ لینے کی رخصت دیتے تھے ۔ اور نوجوان کو منع کرتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

عطیہ بیان کرتے ہیں : ایک شخص نے سیدنا عبداللہ بن عباس رضی اللہ عنہما سے سوال کیا : کیا وہ روزے کی حالت میں بوسہ لے سکتا ہے ۔ انہوں نے جواب دیا : جی نہیں پھر ایک بوڑھا شخص آیا اس نے دریافت کیا : میں روزے کی حالت میں بوسہ لے سکتا ہوں ؟ تو انہوں نے جواب دیا : جی ہاں ۔ تو نوجوان نے کہا: میں نے آپ سے سوال کیا کہ روزے کی حالت میں بوسہ لے سکتا ہوں تو آپ نے جواب دیا : جی نہیں اس نے آپ سے یہ سوال کیا کہ کیا یہ روزے کی حالت میں بوسہ لے سکتا ہے ، تو آپ نے جواب دیا : جی ہاں ۔ اس شخص کے لئے وہ چیز کیسے حلال ہو سکتی ہے ، جو مجھ پر حرام ہے ، جبکہ میں اور یہ ایک ہی دین کے پیروکار ہیں ؟ سیدنا عبداللہ بن عباس رضی اللہ عنہما نے اس شخص سے فرمایا : خصیوں کے اندر ایک رگ ہوتی ہے ، جو ناک سے متعلق ہوتی ہے ، جب ناک چیز سونگھتی ، تو شرمگاہ حرکت کرتی ہے ، اور جب شرمگاہ حرکت کرتی ہے ، تو یہ اس سے زیادہ بڑی چیز کی طرف لے جاتی ہے ، اور بوڑھا شخص اپنے آپ پر ق ابورکھتا ہے راوی کہتے ہیں : یہ سیدنا عبداللہ رضی اللہ عنہ کی بینائی رخصت ہو جانے کے بعد کی بات ہے ان کے پیچھے ایک خاتون موجود تھیں تو ( بوڑھے شخص نے ) یہ کہا: اللہ تعالیٰ نے تمہیں قوم کے ہم محفل کی طرف سے ذلت کا شکار کیا ہے ۔
یہ روایت امام طبرانی نے معجم کبیر میں نقل کی ہے ۔ عطیہ نامی راوی کے بارے میں کلام کیا گیا ہے اس کی توثیق بھی کی گئی ہے ۔

عطاء بن سائب نے انصار سے تعلق رکھنے والے ایک شخص کے حوالے سے یہ بات نقل کی ہے ۔ کہ انصاری نے عطاء کو یہ بتایا : نبی اکرم صلی اللہ علیہ وسلم کے زمانہ اقدس میں انہوں نے اپنی اہلیہ کا بوسہ لے لیا جبکہ وہ روزے کی حالت میں تھے انہوں نے اپنی اہلیہ کو یہ ہدایت کی وہ نبی اکرم صلی اللہ علیہ وسلم سے اس بارے میں دریافت کریں تو نبی اکرم صلی اللہ علیہ وسلم نے فرمایا : اللہ کے رسول بھی ایسا کرتے ہیں ان کی اہلیہ نے ان صاحب کو آ کر بتایا تو انہوں نے کہا: نبی اکرم صلی اللہ علیہ وسلم کو کچھ امور کے بارے میں رخصت عطا کی گئی ہے تم واپس نبی اکرم صلی اللہ علیہ وسلم کے پاس جاؤ اور آپ کی خدمت میں گزارش کرو وہ خاتون نبی اکرم صلی اللہ علیہ وسلم کے پاس گئی اور عرض کی : نبی اکرم صلی اللہ علیہ وسلم کو تو کچھ چیزوں کے بارے میں رخصت دی گئی ہو گی تو نبی اکرم صلی اللہ علیہ وسلم نے ارشاد فرمایا : ” میں تم سب سے زیادہ اللہ تعالیٰ سے ڈرنے والا ہوں اور اُس کی حدود کا سب سے زیادہ علم رکھنے والا ہوں “ ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم روزے کی حالت میں سر کا بوسہ لے لیتے تھے ۔
یہ روایت امام أحمد ، امام بزار نے اور امام طبرانی نے معجم کبیر میں نقل کی ہے ۔ وہ فرماتے ہیں اس سے مراد یہ ہے کہ سر کا بوسہ لے لیتے تھے امام أحمد کے رجال ” صحیح“ کے رجال ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم سے سوال کیا گیا : کیا روزہ دار شخص بوسہ لے سکتا ہے ؟ نبی اکرم صلی اللہ علیہ وسلم نے ارشاد فرمایا : اس میں کیا حرج ہے ؟ ایک پھول کو اس نے سونگھ لیا ہے ۔
یہ روایت امام طبرانی نے معجم صغیر اور معجم اوسط میں نقل کی ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم روزے کی حالت میں بوسہ لے لیا کرتے تھے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن صالح ہے عبدالملک بن لیث کہتے ہیں : وہ ثقہ اور مامون ہے ائمہ یعنی امام أحمد اور دیگر حضرات نے اسے ” ثقہ “ قرار دیا ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم گھر تشریف لائے اور دریافت کیا : اے عائشہ ! کھانے کے لئے کچھ ہے ؟ میں نے روٹی کا ایک ٹکڑا پیش کیا نبی اکرم صلی اللہ علیہ وسلم نے وہ اپنے منہ میں رکھ لیا پھر آپ نے ارشاد فرمایا : اے عائشہ ! کیا میرے پیٹ میں اس سے کچھ داخل ہوا ہے ؟ روزہ دار کے بوسہ کا حکم بھی اسی طرح ہے روزہ اس چیز کی وجہ سے ختم ہوتا ہے ، جو اندر جاتی ہے اس چیز کی وجہ سے ختم نہیں ہوتا جو باہر نکلتی ہے ۔
یہ روایت امام ابویعلیٰ نے نقل کی ہے ، اور اس کی سند میں ایک ایسا راوی ہے ، جس سے میں واقف نہیں ہوں ۔