مجمع الزوائد ومنبع الفوائد

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم سفر کے دوران روزہ رکھ بھی لیتے تھے ، اور روزہ ترک بھی کر دیتے تھے ، اور آپ دو رکعات ادا کیا کرتے تھے وہ ترک نہیں کرتے تھے ۔ راوی کہتے ہیں : نبی اکرم صلی اللہ علیہ وسلم اس پر اضافہ نہیں کرتے تھے یعنی فرض پر اضافہ نہیں کرتے تھے ۔
یہ روایت امام أحمد اور امام ابویعلیٰ نے نقل کی ہے ، اور امام بزار نے اس کی مانند نقل کی ہے ۔ امام أحمد کے رجال ” صحیح “ کے رجال ہیں ۔

سیدنا عبداللہ بن عمرو رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو جوتا پہنے بغیر اور جوتے سمیت نماز پڑھتے ہوئے دیکھا ہے ، اور سفر کے دوران روزہ رکھتے ہوئے بھی دیکھا ہے ، اور نہ رکھتے ہوئے بھی دیکھا ہے ۔ ( علامہ ہیثمی فرماتے ہیں : ) میں یہ کہتا ہوں : جوتا پہنے بغیر یا جوتا پہن کر نماز ادا کرنے والا حصہ امام نسائی رحمہ اللہ نے بھی نقل کیا ہے ۔
یہ روایت امام أحمد نے اور امام طبرانی نے معجم اوسط میں نقل کی ہے ۔ امام أحمد کے رجال ثقہ ہیں ۔

بشر بن حرب بیان کرتے ہیں : میں نے سیدنا عبداللہ بن عمر رضی اللہ عنہما سے سوال کیا سفر کے دوران روزہ رکھنے کے بارے میں آپ کیا کہتے ہیں ؟ انہوں نے فرمایا : اگر میں تمہیں حدیث بیان کروں تو کیا تم اسے اختیار کر لو گے ؟ میں نے جواب جی ہاں تو انہوں نے بتایا : نبی اکرم صلی اللہ علیہ وسلم جب اس مدینہ سے نکلتے تھے تو نماز قصر کرتے تھے ، اور روزہ نہیں رکھتے تھے ، جب تک واپس تشریف نہیں لے آتے تھے ۔
یہ روایت امام أحمد نے نقل کی ہے ۔ بشر نامی راوی کے بارے میں کلام کیا گیا ہے ، اور اس کی توثیق بھی کی گئی ہے ۔

سیدنا عمران بن حصین رضی اللہ عنہ بیان کرتے ہیں : نبی اکرم صلی اللہ علیہ وسلم جوتا پہنے بغیر اور جوتا پہن کر ( دونوں طرح ) چل لیتے تھے کھڑے ہو کر ، اور بیٹھ کر ( دونوں طرح سے ) پی لیتے تھے ، اور نماز سے فارغ ہونے کے بعد دائیں طرف سے بھی اٹھ جاتے تھے ، اور بائیں طرف سے بھی اٹھ جاتے تھے ، اور سفر کے دوران آپ روزہ رکھ بھی لیتے تھے ، اور ترک بھی کر دیتے تھے ۔
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا عبداللہ بن عمرو رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ہمراہ ( سفر پر ) روانہ ہوئے ، ہم میں سے کچھ لوگوں نے روزہ رکھا ہوا تھا ، اور کچھ لوگوں نے روزہ نہیں رکھا تھا ، تو روزہ رکھنے والا روزہ نہ رکھنے والے پر کوئی اعتراض نہیں کر رہا تھا اور نہ رکھنے والا روزہ رکھنے والے پر کوئی اعتراض نہیں کرتا تھا ۔
یہ روایت امام بزار نے نقل کی ہے ، اور اس کی سند حسن ہے ۔

سیدنا ابوموسی اشعری رضی اللہ عنہ بیان کرتے ہیں : ہم نبی اکرم صلی اللہ علیہ وسلم کے ساتھ تھے ہم میں سے کچھ لوگوں نے روزہ رکھا ہوا تھا اور کچھ نے روزہ نہیں رکھا ہوا تھا روزہ دار شخص روزہ نہ رکھنے والے پر اور روزہ نہ رکھنے والا روزہ دار پر کوئی اعتراض نہیں کرتا تھا ۔
یہ روایت امام بزار نے اور امام طبرانی نے معجم اوسط میں نقل کی ہے ۔ اس کی سند میں ایک راوی ولید بن مروان ہے ، اور وہ مجہول ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم سفر کے دوران روزہ رکھ بھی لیتے تھے ، اور روزہ ترک بھی کر دیتے تھے ، اور میں بھی ( سفر کے دوران ) روزہ رکھ بھی لیتا ہوں اور ترک بھی کر دیتا ہوں ۔
یہ روایت امام طبرانی نے معجم کبیر میں نقل کی ہے ۔ اس کی ایک اور سند بھی ہے ، جس کے تمام رجال ثقہ ہیں ۔

سیدنا مشعب رضی اللہ عنہ بیان کرتے ہیں : وہ ایک جنگ میں نبی اکرم صلی اللہ علیہ وسلم کے ساتھ شریک تھے ان میں سے ہر ایک شخص کے پاس سواری کا جانور موجود تھا جس پر وہ سوار تھا صرف میرے پاس نہیں تھا نبی اکرم صلی اللہ علیہ وسلم سواری سے نیچے اترے اور آپ نے مجھ سے فرمایا : تم سوار ہو جاؤ میں نے عرض کی : میرے اندر قوت موجود ہے ایسا دو یا شاید تین مرتبہ ہوا یہاں تک کہ نبی اکرم صلی اللہ علیہ وسلم نے ارشاد فرمایا : تم مشعب ( شاید یہاں مراد مضبوط ہونا ہے ) ہو ، راوی کہتے ہیں : تو یہ نام میرے نزدیک سب سے زیادہ پسندیدہ ہے راوی بیان کرتے ہیں : میں نبی اکرم صلی اللہ علیہ وسلم اور اصحاب کے درمیان سفر کر رہا تھا ، تو ان میں سے بعض لوگوں نے روزہ رکھا ہوا تھا اور بعض نے روزہ نہیں رکھا ہوا تھا ، تو روزہ رکھنے والوں نے نہ رکھنے والوں پر اور روزہ نہ رکھنے والا روزہ رکھنے والے پر کوئی اعتراض نہیں کر رہا تھا ۔
یہ روایت امام طبرانی نے معجم کبیر میں نقل کی ہے ۔ اس کے رجال کی توثیق کی گئی ہے ، البتہ یہ ہے کہ اشعث بن ابوشعثاء نامی نے کسی بھی راوی سے سماع نہیں کیا ہے باقی اللہ بہتر جانتا ہے ۔

ابواشعث عطار نے سیدنا حمزہ بن عمرو اسلمی رضی اللہ عنہ کے بارے میں یہ بات نقل کی ہے : میں نے ان سے سفر کے دوران روزہ رکھنے کے بارے میں دریافت کیا ، تو انہوں نے ارشاد فرمایا : ہم روزہ رکھ بھی لیتے تھے ، اور ترک بھی کر دیتے تھے ، روزہ نہ رکھنے والا روزہ رکھنے والے پر اور روزہ رکھنے والا روزہ نہ رکھنے والے پر کوئی اعتراض نہیں کرتا تھا ۔
یہ روایت امام طبرانی نے معجم کبیر میں نقل کی ہے ۔ ابواشعث عطار نامی راوی سے میں واقف نہیں ہوں ۔

سیدنا ابوامامہ رضی اللہ عنہ بیان کرتے ہیں : غزوہ خیبر کے موقع پر نبی اکرم صلی اللہ علیہ وسلم نے ارشاد فرمایا : ” اگلی صبح ہم نے حملہ کرنا ہے ، تو تم لوگ روزہ ترک کر دو اور قوت حاصل کرو “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی بشر بن نمیر ہے ، اور وہ ضعیف ہے ۔

سیدنا عتبہ بن عبد سلمی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اللہ کی راہ میں ایک دن کا فرض روزہ رکھتا ہے ، تو اللہ تعالیٰ اس شخص سے جہنم کو اتنی دور کر دیتا ہے جتنا آسمان اور زمین کے درمیان فاصلہ ہے ، اور جو شخص ایک دن کا نفلی روزہ رکھتا ہے ، تو اللہ تعالیٰ اس شخص کو جہنم سے اتنی دور کر دیتا ہے جتنی زمین اور آسمان کے درمیان مسافت ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی واقدی ہے ، جس کے بارے میں بہت زیادہ کلام کیا گیا ہے اس کی توثیق کی گئی ہے ۔

سیدنا انس بن مالک رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ہمراہ رمضان میں روانہ ہوئے نبی اکرم صلی اللہ علیہ وسلم نے روزہ رکھا ہوا تھا اور آپ کے ساتھ آپ کے اصحاب نے بھی روزہ رکھا ہوا تھا پھر نبی اکرم صلی اللہ علیہ وسلم نے روزہ ختم کر دیا تو آپ کے ساتھ آپ کے اصحاب نے بھی روزہ ختم کر دیا تو اس وقت روزہ دار ، روزہ نہ رکھنے والے سے افضل ہو گیا ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں منقول ہے ، تا ہم اس میں ان کے یہ الفاظ نہیں ہیں : ” روزہ رکھنے والا شخص روزہ نہ رکھنے والے سے افضل ہو گیا“ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی یوسف بن خالد سمتی ہے ، اور وہ ضعیف ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم رمضان میں سفر کر رہے تھے ۔ آپ کے پاس برتن لایا گیا وہ آپ نے اپنے دست مبارک میں لیا جب لوگوں نے آپ کو دیکھا تو انہوں نے بھی روزہ ختم کر دیا ۔
یہ روایت امام أحمد نے نقل کی ہے ۔

امام طبرانی نے معجم اوسط میں سیدنا انس رضی اللہ عنہ کے حوالے سے یہ بات نقل کی ہے : غزوہ حنین کے موقع پر نبی اکرم صلی اللہ علیہ وسلم رمضان کے اٹھارہ دن گزرنے کے بعد روانہ ہوئے آپ نے روزہ رکھا ہوا تھا لوگوں کا گزر ایک نہر کے پاس سے ہوا لوگ اس کی طرف دیکھنے لگے نبی اکرم صلی اللہ علیہ وسلم نے ان سے دریافت کیا : تم پینا چاہتے ہو ؟ لوگوں نے عرض کی : کیا ہم پیئیں گے جبکہ آپ نے روزہ رکھا ہوا ہے ، تو نبی اکرم صلی اللہ علیہ وسلم نے برتن منگوا کر ( پانی ) پی لیا جب نبی اکرم صلی اللہ علیہ وسلم غزوہ حنین اور غزوہ طائف سے فارغ ہوئے تو آپ جعرانہ تشریف لائے وہاں آپ نے مال غنیمت تقسیم کیا ، اور وہاں سے عمرہ کیا ۔
یہ روایت امام أحمد نے نقل کی ہے ۔ امام أحمد کے رجال ” صحیح “ کے رجال ہیں اور امام طبرانی کے رجال میں ایک راوی سعید بن بشیر ہے ، جس کے بارے میں کلام کیا گیا ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم رمضان کی چودہ تاریخ گزرنے کے بعد روانہ ہوئے آپ نے اپنی اونٹنی کو بٹھایا آپ نے ایک پاؤں اس کے رکاب میں رکھا اور دوسرا زمین پر تھا پھر آپ نے دودھ منگوایا اور اسے پی لیا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ایسا ہے ۔ جس سے میں واقف نہیں ہوں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے رمضان میں سفر کیا ، تو ایک دن آپ نے عصر تک روزہ رکھا پھر آپ نے افطاری کر لی پھر آپ نے روزہ رکھا اور رات تک روزے کو مکمل کیا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی مسلم ملائی ہے ، اور وہ ضعیف ہے ۔

سیدنا جابر رضی اللہ بیان کرتے ہیں : نبی اکرم صلی اللہ علیہ وسلم نے رمضان میں سفر کیا آپ کے اصحاب میں سے ایک شخص کے لئے روزہ رکھنا دشوار ہو گیا اس نے اپنی اونٹنی کو تیزی سے چلایا اور درخت کے سائے میں آ گیا ۔ نبی اکرم صلی اللہ علیہ وسلم کو اس بارے میں اطلاع دی گئی تو آپ نے اسے حکم دیا ، تو اس نے روزہ ختم کر دیا پھر بی اکرم صلی اللہ علیہ وسلم نے ایک برتن منگوایا جس میں پانی موجود تھا آپ نے اسے ہاتھ میں لیا جب لوگوں نے دیکھا کہ آپ نے پانی پی لیا ہے ، تو انہوں نے بھی پی لیا ۔ علامہ ہیثمی فرماتے ہیں : ) میں یہ کہتا ہوں : سیدنا جابر رضی اللہ عنہ کے حوالے سے ایک حدیث ” صحیح “ میں بھی منقول ہے ، لیکن وہ اس کے علاوہ ہے ۔
یہ روایت امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ۔

سیدنا ابوبرزہ اسلمی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سفر کے دوران روزہ رکھنا نیکی نہیں ہے “ ۔
یہ روایت امام أحمد امام بزار اور امام طبرانی نے معجم اوسط میں نقل کی ہے ، اور اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا کعب بن عاصم اشعری رضی اللہ عنہ جو اہل سقیفہ میں سے ہیں وہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” سفر کے دوران روزہ رکھنا نیکی نہیں ہے “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام نسائی رحمہ اللہ اور امام بن ماجہ نے ان صحابی کی نقل کردہ روایت کے طور پر نقل کی ہے ۔ جس میں یہ الفاظ ہیں : ” سفر کے دوران روزہ رکھنا نیکی نہیں ہے “ ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ امام أحمد کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” سفر کے دوران روزہ رکھنا نیکی نہیں ہے “ ۔
یہ روایت امام بزار نے اور امام طبرانی نے معجم کبیر میں نقل کی ہے ۔ امام بزار کے رجال ” صحیح “ کے رجال ہیں ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم سفر کر رہے تھے ۔ آپ نے اپنے ساتھیوں کے ساتھ پڑاؤ کیا اسی دوران آپ کے ایک ساتھی پر سایہ کر دیا گیا اس شخص نے روزہ رکھا ہوا تھا نبی اکرم صلی اللہ علیہ وسلم کا گزر ان لوگوں کے پاس سے ہوا آپ نے دریافت کیا : تمہارے ساتھی کا کیا معاملہ ہے کیا اسے کوئی تکلیف ہے ؟ لوگوں نے عرض کی : جی نہیں ، یا رسول اللہ ! اس نے روزہ رکھا ہوا ہے راوی کہتے ہیں : وہ ایک گرم دن تھا نبی اکرم صلی اللہ علیہ وسلم نے ارشاد فرمایا : یہ نیکی نہیں ہے کہ سفر کے دوران روزہ رکھا جائے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا عمار بن یاسر رضی اللہ عنہ بیان کرتے ہیں ہم نبی اکرم صلی اللہ علیہ وسلم کے ساتھ ایک غزوہ سے آ رہے تھے ایک شدید گرم دن میں ہم سفر کرتے رہے ہم نے راستے میں پڑاؤ کیا ہم میں سے ایک شخص گیا اور ایک درخت کے سائے میں آ گیا اس کے ساتھیوں نے اسے سہارا دیا ہوا تھا وہ لیٹا ہوا تھا اور اس کو تکلیف محسوس ہو رہی تھی جب نبی اکرم صلی اللہ علیہ وسلم نے ملاحظہ کیا ، تو دریافت کیا : تمہارے ساتھی کا کیا معاملہ ہے ۔ لوگوں نے بتایا : اس نے روزہ رکھا ہوا ہے نبی اکرم صلی اللہ علیہ وسلم نے ارشاد فرمایا : یہ چیز نیکی نہیں ہے کہ تم لوگ سفر کے دوران روزہ رکھو تم پر رخصت کو اختیار کرنا لازم ہے جو ( رخصت ) اللہ تعالیٰ نے تمہیں عطا کی ہے تم اسے قبول کرو “ ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیده ام درداء رضی اللہ عنہ بیان کرتی ہیں : عبدالواحد نامی راوی کہتے ہیں : میرے خیال میں انہوں نے سیدنا ابودرداء رضی اللہ عنہ کے حوالے سے یہ بات نقل کی ہے ۔ وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” سفر کے دوران روزہ رکھنا نیکی نہیں ہے “ ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

سیدنا معاویہ رضی اللہ عنہ فرماتے ہیں : سفر کے دوران روزہ رکھنا سنت نہیں ہے ۔
یہ روایت امام طبرانی نے معجم کبیر میں نقل کی ہے ، اور اس کی سند میں ایسا راوی ہے ، جس سے میں واقف نہیں ہوں ۔

زرارہ بن اوفی ایک صاحب کے بارے میں بیان کرتے ہیں : وہ صاحب نبی اکرم صلی اللہ علیہ وسلم کی بارگاہ میں حاضر ہوئے نبی اکرم صلی اللہ علیہ وسلم اس وقت کھانا کھا رہے تھے ۔ آپ نے فرمایا : آگے آ جاؤ ! اس شخص نے کہا: میں نے روزہ رکھا ہوا ہے نبی اکرم صلی اللہ علیہ وسلم نے ارشاد فرمایا : آگے آ جاؤ ! میں تمہیں بتاتا ہوں اللہ تعالیٰ نے مسافر شخص سے روزے اور نصف نماز کو معاف کر دیا ہے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عباد بن سری ہے میں نے کسی کو اس کے حالات بیان کرتے ہوئے نہیں پایا ہے ۔

ابوالفیض بیان کرتے ہیں : مسلمہ بن عبدالملک نے ہمیں خطبہ دیتے ہوئے یہ کہا: تم سفر کے دوران رمضان میں ، روزے نہ رکھو جو شخص روزہ رکھے گا اسے اس کی قضاء کر لینی چاہیے ، ابوالفیض کہتے ہیں : بعد میں میری ملاقات سیدنا ابوقرصافہ واثلہ بن اسقع رضی اللہ عنہ سے ہوئی میں نے ان سے دریافت کیا ، تو انہوں نے فرمایا : اگر تم روزہ رکھ لیا اور پھر رکھ لیا تو تم نے اس کی قضاء نہیں کی ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

سیدنا عثمان بن ابوالعاص رضی اللہ عنہ فرماتے ہیں : سفر کے دوران روزہ نہ رکھنا رخصت ہے ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال ثقہ ہیں ۔

سیدنا عثمان بن ابوالعاص رضی اللہ عنہ کے بارے میں یہ بات منقول ہے : وہ سفر کے دوران روزہ رکھنے کو مستحب قرار دیتے تھے ، اور یہ کہتے تھے : یہ چیز رخصت تھی ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی أحمد بن عبداللہ بن حسن عنبری ہے میں نے کسی کو اس کے حالات بیان کرتے ہوئے نہیں پایا ہے ۔

ابوطعمہ بیان کرتے ہیں : میں سیدنا عبداللہ بن عمر رضی اللہ عنہما کے پاس موجود تھا ۔ ایک شخص ان کے پاس آیا اور بولا: اے ابوعبدالرحمن میں سفر کے دوران روزہ رکھنے کی قوت رکھتا ہوں تو سیدنا عبداللہ بن عمر رضی اللہ عنہما نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اللہ تعالیٰ کی رخصت کو قبول نہیں کرتا ہے اسے عرفہ کے پہاڑوں جتنا گناہ ہوتا ہے “ ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ امام أحمد کی سند حسن ہے ۔

سیدنا عقبہ بن عامر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اللہ تعالیٰ کی رخصت قبول نہیں کرتا اسے اتنا گناہ ہوتا ہے ، جو عرفہ کے پہاڑوں کی مانند ہوتا ہے “ ۔
یہ روایت امام أحمد نے اور امام طبرانی نے معجم اوسط میں نقل کی ہے ۔ اس کی سند میں ایک راوی رزیق ثقفی ہے میں نے کسی کو اس پر جرح کرتے یا اس کی توثیق کرتے ہوئے نہیں پایا ہے اس کے بقیہ رجال ثقہ ہیں ۔

سیدنا عمرو بن حزم رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اللہ تعالیٰ کی رخصت کو قبول نہیں کرتا ہے ، تو اسے اُحد کے پہاڑوں جتنا گناہ ہوتا ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی سلیمان بن عمرو بن ابراہیم انصاری ہے ، جس کا ذکر ابن ابوحاتم نے کیا ہے ، اور انہوں نے اس کے بارے میں کوئی جرح یا تعدیل ذکر نہیں کی ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ اس بات کو پسند کرتا ہے کہ اس کی رخصت پر عمل کیا جائے جس طرح وہ اس بات کو ناپسند کرتا ہے کہ اس کی معصیت کا ارتکاب کیا جائے “ ۔
یہ روایت امام أحمد نے نقل کی ہے ۔ اس کے رجال ” صحیح “ کے رجال ہیں یہ امام بزار نے اور امام طبرانی نے معجم اوسط میں نقل کی ہے ، اور اس کی سند حسن ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ اس بات کو پسند کرتا ہے کہ اس کی رخصت پر عمل کیا جائے جس طرح وہ اس بات کو پسند کرتا ہے کہ اس کی عزیمت پر عمل کیا جائے “ ۔
یہ روایت امام طبرانی نے معجم کبیر میں اور امام بزار نے نقل کی ہے ۔ امام بزار کے رجال ثقہ ہیں امام طبرانی کے رجال بھی ثقہ ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ اس بات کو پسند کرتا ہے کہ اس کی رخصت کو قبول کیا جائے جس طرح وہ اس بات کو پسند کرتا ہے کہ اس کی عزیمت پر عمل کیا جائے “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی معمر بن عبداللہ انصاری ہے عقیلی بیان کرتے ہیں : اس روایت کے ” مرفوع “ ہونے میں ، اس کی متابعت نہیں کی گئی ہے ۔

عبداللہ بن یزید بن آدم بیان کرتے ہیں : سیدنا ابودرداء رضی اللہ عنہ سیدنا واثلہ بن اسقع رضی اللہ عنہ سیدنا ابوامامہ رضی اللہ عنہ اور سیدنا انس بن مالک رضی اللہ عنہ نے مجھے یہ حدیث بیان کی ہے نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ اس بات کو پسند کرتا ہے کہ اس کی رخصت کو قبول کیا جائے جس طرح بندہ اس کی مغفرت کو پسند کرتا ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ عبداللہ بن یزید نامی راوی کو امام أحمد اور دیگر حضرات نے ” ضعیف“ قرار دیا ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ اس بات کو پسند کرتا ہے کہ اس کی رخصت کو اختیار کیا جائے جس طرح وہ اس بات کو پسند کرتا ہے اس کے لازمی حکم کو اختیار کیا جائے “ ۔ راوی کہتے ہیں : میں نے دریافت کیا : اس کے لازمی حکم سے مراد کیا ہے ؟ انہوں نے جواب دیا : اس کے مقرر کردہ فرائض ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عمر بن عبید ہے ، جو صاحب الحمر ہے ، اور وہ ضعیف ہے ۔