مجمع الزوائد ومنبع الفوائد

سیدنا علی بن ابوطالب رضی اللہ عنہ بیان کرتے ہیں : نبی اکرم صلی اللہ علیہ وسلم سحری تک صوم وصال رکھا کرتے تھے ۔
یہ روایت امام أحمد نے نقل کی ہے ، اور امام طبرانی نے معجم کبیر میں نقل کی ہے ۔ اس کے رجال ” صحیح “ کے رجال ہیں ۔

سیدنا بشیر رضی اللہ عنہ کی اہلیہ سیدہ لیلی رضی اللہ عنہا بیان کرتی ہیں : میں نے دو دنوں کو ملا کر صوم وصال رکھنے کا ارادہ کیا تو سیدنا بشیر رضی اللہ عنہ نے مجھے منع کر دیا اور یہ بات بیان کی کہ نبی اکرم صلی اللہ علیہ وسلم نے اس سے منع کیا ہے ۔ آپ نے یہ فرمایا ہے : عیسائی ایسا کرتے تھے ، تم لوگ اس طرح روزہ رکھو ، جس طرح اللہ تعالیٰ نے تمہیں حکم دیا ہے ، اور وہ یہ کہ تم روزے کو رات تک مکمل کرو اور جب رات ہو جائے ، تو تم افطاری کر لو ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ لیلی نامی خاتون پر جرح کرتے ہوئے میں نے کسی کو نہیں پایا ہے اس کے بقیہ رجال ” صحیح“ کے رجال ہیں ۔

سیدنا سمرہ بن جندب رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں صوم وصال رکھنے سے منع کیا ہے ، اور یہ عزیمت نہیں ہے ۔
یہ روایت امام بزار نے نقل کی ہے ، اور امام طبرانی نے معجم کبیر میں نقل کی ہے ، اور اس کی سند حسن ہے ۔

ابوملیح نے اپنے والد کا یہ بیان نقل کیا ہے نبی اکرم صلی اللہ علیہ وسلم نے ارشاد فرمایا : ” وضح ( یعنی روشنی ، یعنی سحری ) سے لے کر ، وضح ( یعنی سحری ) تک روزہ رکھو “ ۔
یہ روایت امام بزار اور امام طبرانی نے معجم اوسط میں نقل کی ہے ۔ اس کی سند میں ایک راوی سالم بن عبیداللہ بن سالم ہے میں نے کسی کو اس کے حالات بیان کرتے ہوئے نہیں پایا ہے ، اور اس کے رجال کی توثیق کی گئی ہے ۔

سیدنا جابر بن عبداللہ رضی اللہ عنہما بیان کرتے ہیں : نبی اکرم صلی اللہ علیہ وسلم سحری سے لے کر اگلی سحری تک صوم وصال رکھتے تھے ( یعنی افطاری میں کچھ نہیں کھاتے پیتے تھے ) ۔
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے تین دن کے صوم وصال رکھنے سے منع کیا ہے لوگوں نے عرض کی : آپ بھی تو صوم وصال رکھتے ہیں ۔ نبی اکرم صلی اللہ علیہ وسلم نے ارشاد فرمایا : میں ایسی حالت میں وقت گزارتا ہوں کہ میرا پروردگار مجھے کھلا دیتا ہے ، اور وہ مجھے پلا دیتا ہے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی سہل بن سنان نہر تیری ہے میں نے کسی کو اس کے حالات بیان کرتے ہوئے نہیں پایا ہے ۔

سیدنا ابوذر غفاری رضی اللہ عنہ بیان کرتے ہیں : نبی اکرم صلی اللہ علیہ وسلم نے دو دنوں اور ایک رات کو ملا کر صوم وصال رکھا سیدنا جبرائیل علیہ السلام آئے اور بولے : بے شک اللہ تعالیٰ نے آپ کے صوم وصال کو قبول کر لیا ہے ، اور یہ آپ کے بعد کسی کے لئے حلال نہیں ہے اس کی وجہ یہ ہے کہ اللہ تعالیٰ نے ارشاد فرمایا ہے : ” پھر تم لوگ روزے کو رات تک مکمل کر لو“ ۔ تو رات ہو جانے کے بعد روزہ نہیں رہے گا ، اور جبرائیل نے مجھے فجر ( صبح صادق ) ہو جانے کے بعد وتر ادا کرنے کا حکم دیا ۔
یہ روایت امام طبرانی نے معجم اوسط میں عبدالملک کے حوالے سے سیدنا ابوغفاری رضی اللہ عنہ سے نقل کی ہے ۔ میں عبدالملک سے واقف نہیں ہوں ، اس روایت کے بقیہ رجال ” صحیح“ کے رجال ہیں ۔