مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” ایک شخص پاکیزہ کمائی میں سے صدقہ کرتا ہے ویسے اللہ تعالیٰ صرف پاکیزہ چیز کو ہی قبول کرتا ہے ، تو رحمان اس چیز کو اپنے ہاتھ میں لے لیتا ہے ، اور اسے یوں پالنا پوسنا شروع کر دیتا ہے ، جس طرح کوئی شخص جانور کے بچے کو پالتا پوستا ہے “ ۔ ( یہاں ایک لفظ کے بارے میں راوی کو شک ہے کہ وہ مختلف ہے ، لیکن مفہوم یہی ہے ) ۔
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ ” مرفوع “ حدیث کے طور پر یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا : ) خبیث چیز خبیث چیز کا کفارہ نہیں بنتی ہے پاکیزہ چیز خبیث چیز کا کفارہ بنتی ہے “ ۔
یہ روایت امام بزار نے اور امام طبرانی نے معجم اوسط میں نقل کی ہے ۔ اس کی سند میں ایک راوی قیس بن ربیع ہے ، اور اس کے بارے میں کلام کیا گیا ہے شعبہ اور ثوری نے اسے ” ثقہ “ قرار دیا ہے ۔