مجمع الزوائد ومنبع الفوائد

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے اس بات سے منع کیا ہے کہ قبر پر عمارت تعمیر کی جائے ، یا اس پر چونا لگایا جائے ۔
یہ روایت امام أحمد نے نقل کی ہے ۔ ایک ” مرسل “ روایت میں انہوں نے یہ الفاظ زائد نقل کیے ہیں : ” یا اُس پر بیٹھا جائے “ ۔ دونوں سندوں میں ایک راوی ابن لہیعہ ہے ، اور اس کے بارے میں کلام کیا گیا ہے ، اور اس کی توثیق بھی کی گئی ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے اس بات سے منع کیا ہے کہ قبروں پر عمارت تعمیر کی جائے ، یا اُن پر بیٹھا جائے یا ان پر نماز ادا کی جائے ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے صرف قبر پر عمارت تعمیر کی ممانعت والا حصہ نقل کیا ہے ۔
یہ روایت امام ابویعلیٰ نے نقل کی ہے ، اور اس کے رجال ثقہ ہیں ۔

سیدنا عمارہ بن حزم رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے قبر پر بیٹھے دیکھا ، تو ارشاد فرمایا : ” اے قبر پر بیٹھنے والے ! قبر پر سے نیچے اتر آؤ ، اور قبر والے کو اذیت نہ پہنچاؤ ، اور نہ ہی وہ تمہیں اذیت پہنچائے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، اس کے بارے میں کلام کیا گیا ہے ، اور اس کی توثیق بھی کی گئی ہے ۔