مجمع الزوائد ومنبع الفوائد

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ فرماتا ہے : جب میں اپنے بندے کی دونوں آنکھوں کی بینائی لے لوں تو میں اس کے لئے جنت سے کم ثواب پر راضی نہیں ہوتا راوی کہتے ہیں : میں نے عرض کی : یا رسول اللہ ! اگر ایک ( آنکھ کی بینائی رخصت ہوئی ہو ، تو بھی یہ اجر و ثواب حاصل ہو گا ؟ ) نبی اکرم صلی اللہ علیہ وسلم نے ارشاد فرمایا : اگر ایک کی ہوئی ہو ، تو بھی ( یہی اجر و ثواب حاصل ہو گا ) “ ۔ ( علامہ ہیثمی فرماتے ہیں : ) میں یہ کہتا ہوں : یہ حدیث ” صحیح “ میں مذکور ہے ، تاہم اس میں یہ الفاظ نہیں ہیں : ” اگر ایک ہو “ ۔
یہ روایت ابویعلیٰ نے نقل کی ہے ۔ اس کی سند میں ایک راوی سعید بن سلیم ضبی جسے ازدی نے ” ضعیف“ قرار دیا ہے ۔ ابن حبان نے اس کا ذکر کتاب ” الثقات “ میں کیا ہے ، اور یہ بات بیان کی ہے : یہ غلطی کرتا ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تمہارا پروردگار فرماتا ہے ، جب میں اپنے بندے کی بینائی قبض کر لوں اور وہ اس بینائی کو چاہتا ہو ، اور پھر بھی وہ اس بات پر میری حمد بیان کرے تو میں اس کے لئے جنت سے کم ثواب پر راضی نہیں ہوؤں گا“ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی سفر بن نسیر ہے ۔ ابن حبان نے اس کا ذکر کتاب ” الثقات “ میں کیا ہے ۔ امام دارقطنی رحمہ اللہ نے اسے ” ضعیف “ قرار دیا ہے ۔