مجمع الزوائد ومنبع الفوائد

سیدنا انس بن مالک رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ سیدنا زید بن ارقم رضی اللہ عنہ کی عیادت کرنے کے لئے داخل ہوا ان کی آنکھوں میں تکلیف تھی ۔ نبی اکرم صلی اللہ علیہ وسلم نے ان سے فرمایا : اے زید اگر تمہاری بینائی رخصت ہو جائے ، تو پھر تم کیا کرو گے ؟ انہوں نے عرض کی : ایسی صورت میں ، میں صبر سے کام لوں گا ، اور ثواب کی امید رکھوں گا ، نبی اکرم صلی اللہ علیہ وسلم نے ارشاد فرمایا : اگر تمہاری بینائی رخصت ہو جائے اور تم صبر سے کام لو اور ثواب کی امید رکھو ، تو جب تم اللہ تعالیٰ کی بارگاہ میں حاضر ہو گے ، تو تم پر کوئی گناہ نہیں ہو گا ۔
( علامہ ہیثمی فرماتے ہیں : ) میں یہ کہتا ہوں : سیدنا انس رضی اللہ عنہ کے حوالے سے منقول ایک حدیث ” صحیح “ میں مذکور ہے ، جو اس کے علاوہ ہے ۔
یہ روایت امام أحمد نے نقل کی ہے ۔ اس کی سند میں ایک راوی جعفی ہے ، جس کے بارے میں بہت زیادہ کلام کیا گیا ہے ثوری اور شعبہ نے اسے ” ثقہ “ قرار دیا ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ فرماتا ہے : اے انسان ! جب میں تمہاری دو محبوب چیزیں ( یعنی دونوں آنکھوں کی بینائی ) لے لوں اور تم پہلے صدمے کے وقت صبر سے کام لو اور ثواب کی امید رکھو تو میں تمہارے لئے جنت سے کم ثواب پر راضی نہیں ہوؤں گا “ ۔
( علامہ ہیثمی فرماتے ہیں : ) میں یہ کہتا ہوں : یہ روایت امام ابن ماجہ نے اختصار کے ساتھ نقل کی ہے ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ اس کی سند میں ایک راوی اسماعیل بن عیاش ہے ، اور اس کے بارے میں کلام کیا گیا ہے ۔

سیدہ عائشہ بنت قدامہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ کی ذات اس سے بلند و برتر ہے کہ وہ کسی مؤمن کی دو محبوب چیزوں کو لے اور پھر اسے جہنم میں داخل کرے “ یونس کہتے ہیں : اس سے مراد اس کی دونوں آنکھیں ہیں ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ اس کی سند میں ایک راوی عبدالرحمن بن عثمان حاطبی ہے ، جسے ابوحاتم نے ” ضعیف“ قرار دیا ہے ، اور ابن حبان نے اس کا تذکرہ کتاب ” الثقات “ میں کیا ہے ۔

سیدنا عبداللہ بن عباس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ فرماتا ہے : جب میں اپنے کسی بندے کی دونوں آنکھوں کی بینائی لے لوں اور وہ صبر سے کام لے اور ثواب کی امید رکھے تو میں اس کے لئے جنت سے کم ثواب پر راضی نہیں ہوتا“ ۔
یہ روایت ابویعلیٰ نے اور امام طبرانی نے معجم کبیر اور معجم اوسط میں نقل کی ہے ۔ امام ابویعلیٰ کے رجال ثقہ ہیں ۔

سیدنا بریدہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بندے کو کسی بھی ایسی آزمائش کا شکار نہیں کیا جاتا جو اس کے لئے کسی کو اللہ کا شریک قرار دینے سے زیادہ سخت ہو ، اور بندے کو کسی بھی ایسی چیز کے ہمراہ آزمائش کا شکار نہیں کیا جاتا جو بینائی کے رخصت ہونے سے زیادہ سخت ہو ، اور جب بھی کسی بندے کو بینائی کی رخصتی کی آزمائش کا شکار کیا جائے اور وہ شخص صبر سے کام لے تو اس کی مغفرت ہو جاتی ہے “ ۔
یہ روایت امام بزار نے نقل کی ہے ۔ اس کی سند میں ایک راوی جابر جعفی ہے اس کے بارے میں بہت زیادہ کلام کیا گیا ہے اس کی توثیق بھی کی گئی ہے ۔

سیدنا زید بن ارقم رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” دین کے رخصت ہو جانے کے بعد بندے کو ایسی کسی آزمائش کا شکار نہیں کیا گیا جو بینائی کی رخصتی سے زیادہ شدید ہو جس شخص کو بینائی کے حوالے سے آزمائش کا شکار کیا جائے اور وہ اللہ تعالیٰ کی بارگاہ میں حاضر ہونے ( یعنی فوت ہونے ) تک صبر سے کام لے ، تو جب وہ اللہ تعالیٰ کی بارگاہ میں حاضر ہو گا ، تو اسے کوئی حساب نہیں دینا ہو گا “ ۔
یہ روایت امام بزار نے نقل کی ہے ۔ اس کی سند میں ایک راوی جابر جعفی ہے ، جس کے بارے میں بہت زیادہ کلام کیا گیا ہے ، اور اس کی توثیق بھی کی گئی ہے ۔

سیدنا عرباض بن ساریہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : جو آپ صلی اللہ علیہ وسلم ( اپنے پروردگار سے ) روایت کرتے ہیں ( کہ پروردگار نے یہ ارشاد فرمایا ہے : ) ” جب میں اپنے کسی بندے کی دونوں آنکھوں کی بینائی لے لوں ، اور وہ اس ( بینائی ) کی خواہش رکھتا ہو تو میں اس بندے کے لئے جنت سے کم ثواب پر راضی نہیں ہوؤں گا“ ۔
یہ روایت امام بزار نے اور امام طبرانی نے معجم کبیر میں نقل کی ہے ۔ اس کی سند میں ایک راوی ابوبکر بن ابومریم ہے ، اور وہ ضعیف ہے ۔

سیدنا جریر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ فرماتا ہے : جس کی دونوں آنکھوں کی بینائی میں سلب کر لوں تو ان دونوں کے عوض میں ، میں اسے جنت دوں گا “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی حصین بن عمر ہے ، جسے امام أحمد اور دیگر حضرات نے ” ضعیف “ قرار دیا ہے ، اور عجلی نے اسے ” ثقہ “ قرار دیا ہے ۔

انیسہ بنت زید بن ارقم اپنے والد کے حوالے سے یہ بات نقل کرتی ہیں : نبی اکرم صلی اللہ علیہ وسلم سیدنا زید بن ارقم رضی اللہ عنہ کے ہاں تشریف لائے آپ ان کی بیماری کے دوران ان کی عیادت کرنے کے لئے تشریف لائے تھے ۔ نبی اکرم صلی اللہ علیہ وسلم نے ارشاد فرمایا : تمہاری بیماری کے حوالے سے تم پر کوئی حرج نہیں ہو گا ، لیکن اس وقت تمہارا کیا بنے گا کہ جب تمہیں میرے بعد مزید عمر نصیب ہو گی ، اور تم نابینا ہو جاؤ گے انہوں نے عرض کی : پھر میں صبر سے کام لوں گا ، اور ثواب کی امید رکھوں گا نبی اکرم صلی اللہ علیہ وسلم نے ارشاد فرمایا : ایسی صورت میں تم کسی حساب کے بغیر جنت میں داخل ہو گے ۔ راوی بیان کرتے ہیں : نبی اکرم صلی اللہ علیہ وسلم کے وصال کے بعد سیدنا زید بن ارقم رضی اللہ عنہ نابینا ہو گئے تھے پھر اللہ تعالیٰ نے ان کی بینائی لوٹا دی تھی پھر ان کا انتقال ہوا تھا اللہ تعالیٰ ان پر رحم کرے ۔ ( علامہ ہیثمی فرماتے ہیں : ) میں یہ کہتا ہوں : امام ابوداؤد نے اس روایت کا ایک حصہ نقل کیا ہے ، جو ان کی عیادت کرنے کے بارے میں ہے ۔
یہ روایت امام طبرانی نے معجم کبیر میں نقل کی ہے ۔ نباتہ بنت بریر بن حماد کا ذکر کرتے ہوئے میں نے کسی کو نہیں پایا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ جس شخص کی بینائی رخصت کر دے اور وہ شخص صبر سے کام لے اور ثواب کی امید رکھے تو اللہ تعالی کے ذمہ یہ بات لازم ہو گی کہ اس کی آنکھیں آگ ( یا جہنم ) کو نہ دیکھیں “ ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی وہب بن حفص حوانی ہے ، اور وہ ضعیف ہے ۔

ابوظلال قسملی بیان کرتے ہیں : وہ سیدنا انس بن مالک رضی اللہ عنہ کی خدمت میں حاضر ہوئے سیدنا انس رضی اللہ عنہ نے ان سے دریافت کیا : اے ابوظلال ! تمہاری بینائی کب رخصت ہوئی تھی انہوں نے جواب دیا : مجھے یاد نہیں ہے سیدنا انس نے فرمایا : کیا میں تمہیں ایک حدیث بیان کروں جو نبی اکرم صلی اللہ علیہ وسلم نے سیدنا جبرائیل کے حوالے سے اپنے پروردگار کے حوالے سے ہمیں بیان کی تھی آپ نے بتایا تھا پروردگار نے فرمایا : ” اے جبرائیل ! میرا وہ بندہ جس کی میں نے بینائی رخصت کر دی ہو اس کا ثواب صرف میری ذات کا دیدار اور میرے پڑوس میں ٹھہرنا ہے “ ۔
راوی بیان کرتے ہیں : تو میں نے نبی اکرم صلی اللہ علیہ وسلم کے اصحاب کو دیکھا کہ جو آپ کے ارد گرد موجود تھے وہ رونے لگے اور ان کی یہ خواہش تھی کہ ان کی بینائی رخصت ہو جائے ( اور اس کا یہ اجر و ثواب انہیں حاصل ہو جائے ) ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی اشرس بن ربیع ہے میں نے کسی کو اس کا ذکر کرتے ہوئے نہیں پایا ہے ابوظلال نامی راوی کو امام ابوداؤد امام نسائی رحمہ اللہ نے ” ضعیف“ قرار دیا ہے ، جبکہ ابن حبان نے اسے ” ثقہ “ قرار دیا ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ( اللہ تعالیٰ فرماتا ہے : ) ” جس شخص کی بینائی میں رخصت کر دوں اور وہ صبر سے کام لے اور ثواب کی امید رکھے میں اس کے لئے جنت سے کم ثواب پر راضی نہیں ہوؤں گا“ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی مسلمہ بن صلت ہے ، اور وہ متروک ہے ۔ ابن حبان نے اسے ” ثقہ “ قرار دیا ہے ۔ امام أحمد بن حنبل نے اس سے روایت نقل کی ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب میں اپنے بندے کی دو محبوب چیزوں ( یعنی دونوں آنکھوں کی بینائی ) کو رخصت کر دوں اور وہ صبر سے کام لے اور ثواب کی امید رکھے تو میں ان دونوں کے عوض میں اس کے لئے جنت کو مقرر کر دوں گا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبیداللہ بن زحر ہے ، اور وہ ضعیف ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” دنیا میں جس شخص کی بینائی رخصت ہو جائے گی اللہ تعالیٰ قیامت کے دن اس شخص کے لئے نور مقرر کرے گا اگرچہ وہ نیک ہو “ ۔
یہ روایت امام طبرانی نے معجم اوسط میں نقل کی ہے ، اور اس کی سند میں ایک راوی بشر بن ابراہیم انصاری ہے ، اور وہ ضعیف ہے ۔