مجمع الزوائد ومنبع الفوائد

سیدنا علی بن ابوطالب رضی اللہ عنہ بیان کرتے ہیں : نبی اکرم صلی اللہ علیہ وسلم میرے پاس اور سیدہ فاطمہ رضی اللہ عنہا کے پاس تشریف لائے ، آپ نے ہمیں نماز کے لئے بیدار کیا ، پھر نبی اکرم صلی اللہ علیہ وسلم اپنے گھر چلے گئے ، آپ رات کا کچھ حصہ نماز ادا کرتے رہے ، لیکن آپ کو ہماری طرف سے کوئی آہٹ سنائی نہیں دی ، تو آپ ہمارے پاس واپس آئے اور آپ نے ہمیں بیدار کیا اور ارشاد فرمایا : تم دونوں اٹھ کر نماز ادا کر لو ! سیدنا علی رضی اللہ عنہ کہتے ہیں : میں آنکھیں مل کر بیٹھ گیا ، اور میں یہ کہہ رہا تھا : اللہ کی قسم ! بے شک ہم صرف وہ نماز ادا کریں گے ، جو اللہ تعالیٰ نے ہمارے نصیب میں لکھی ہے ، کیونکہ ہماری جانیں ، اللہ تعالیٰ کے ہاتھ میں ہیں ، جب وہ ہمیں دوبارہ زندہ کرنا چاہتا ہے ، ہمیں زندہ ( یعنی بیدار ) کر دیتا ہے ، سیدنا علی رضی اللہ عنہ بیان کرتے ہیں : تو نبی اکرم صلی اللہ علیہ وسلم مڑ گئے ، آپ صلی اللہ علیہ وسلم اپنے زانوں پر ہاتھ مارتے ہوئے یہ کہہ رہے تھے : ہم صرف وہ نماز ادا کریں گے ، جو ہمارے نصیب میں لکھی ہے ، ہم صرف وہ نماز ادا کریں گے ، جو ہمارے نصیب میں لکھی ہے ” بے شک انسان بہت زیادہ بحث کرنے والا ہے “ ۔
( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ منقول ہے ،
یہ روایت امام أحمد نے نقل کی ہے ، اس کی سند میں ایک راوی حکیم بن حکیم بن عبادہ ہے ، جسے ابن سعد نے ضعیف قرار دیا ہے ، اور ابن حبان نے اسے ” ثقہ “ قرار دیا ہے ۔

سیدنا ابومالک اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص رات کے وقت بیدار ہوتا ہے ، اور اپنی بیوی کو بھی بیدار کرتا ہے ، اور اگر اُس عورت پر نیند غالب ہو ، تو اُس کے چہرے پر پانی چھڑک دیتا ہے ، پھر وہ دونوں اُٹھ کر اپنے گھر میں نماز ادا کرتے ہیں ، اور اللہ تعالیٰ کا رات کی گھڑی میں ذکر کرتے ہیں ، تو ان دونوں کی مغفرت ہو جاتی ہے “ ۔
یہ روایت امام طبرانی نے نقل کی ہے ، اس کی سند میں ایک راوی محمد بن اسماعیل بن عیاش ہے ، اور وہ ” ضعیف “ ہے ۔