مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم جب بھی سوتے تھے ، تو مسواک آپ کے پاس موجود ہوتی تھی ، جب بھی آپ بیدار ہوتے تھے ، تو سب سے پہلے مسواک کرتے تھے ۔
یہ روایت امام أحمد نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم جب رات کے وقت بیدار ہوتے تھے ، تو استنجاء کرتے تھے ، پھر وضو کرتے تھے ، اور مسواک کرتے تھے ، پھر آپ صلی اللہ علیہ وسلم اپنی ازواج کے گھر میں خوشبو طلب کرتے تھے ۔
یہ روایت امام بزار نے نقل کی ہے ، اور اس کے رجال کی توثیق کی گئی ہے ۔

سیدنا عبداللہ بن مسعود رضی اللہ عنہ فرماتے ہیں : نبی اکرم صلی اللہ علیہ وسلم کے سامنے نیند کا ذکر کیا گیا ، تو آپ صلی اللہ علیہ وسلم نے ارشاد فرمایا : سو جاؤ ! اور جب تم بیدار ہو ، تو مسواک کرو ! “ ۔
یہ روایت امام بزار نے نقل کی ہے ، اس کی سند میں ایک راوی یحیی بن منذر ہے ، جسے امام دارقطنی رحمہ اللہ اور دیگر حضرات نے ضعیف قرار دیا ہے ۔

ربیعہ جرشی بیان کرتے ہیں : میں نے سیدہ عائشہ صدیقہ رضی اللہ عنہا سے سوال کیا : نبی اکرم صلی اللہ علیہ وسلم جب رات کے وقت بیدار ہوتے تھے ، تو آپ کیا پڑھتے تھے ؟ اور آپ کسی چیز کے ذریعے آغاز کرتے تھے ؟ تو انہوں نے بتایا : ” نبی اکرم صلی اللہ علیہ وسلم دس مرتبہ «الله اكبر» ، دس مرتبہ «الحمدلله» ، دس مرتبہ «لا اله الا الله» ، دس مرتبہ «استغفرالله» پڑھتے تھے ، پھر یہ پڑھتے تھے : ” اے اللہ ! تو میری مغفرت کر دے ، تو مجھے ہدایت پر ثابت قدم رکھ ، اور تو مجھے رزق عطا فرما “ ۔ ( یہ مذکورہ بالا کلمہ ) دس مرتبہ پڑھتے تھے : اور یہ ( درج ذیل کلمہ ) پڑھتے تھے : ” اے اللہ ! میں حساب کے دن تنگی سے ، تیری پناہ مانگتا ہوں “ ۔ یہ بھی دس مرتبہ پڑھتے تھے ۔
( علامہ ہیثمی فرماتے ہیں : ) میں یہ کہتا ہوں :
یہ روایت امام ابوداؤد نے اختصار کے ساتھ نقل کی ہے ۔
یہ روایت امام أحمد نے اور امام طبرانی نے معجم اوسط میں نقل کی ہے ، اور اس کے رجال ” ثقہ “ ہیں ۔

سیدنا سعد بن جنادہ رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ ” حنیف “ میں موجود تھا ، میں نے آپ صلی اللہ علیہ وسلم کو یہ بات ارشاد فرماتے ہوئے سنا : ” جو شخص رات کے وقت اٹھ کر وضو کرے اور اپنے منہ میں کلی کرے اور پھر یہ پڑھے : «سبحان الله» ایک سو مرتبہ ، «الحمدلله» ایک سو مرتبہ ، اللہ اکبر ایک سو مرتبہ ، ل «ا اله الا الله» ایک سو مرتبہ ، تو اُس شخص کے گناہوں کی مغفرت ہو جاتی ہے ، البتہ قتل ، یا مال ہتھیانے کا معاملہ مختلف ہے ، کیونکہ یہ کالعدم نہیں ہوتے ہیں “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی حسین بن حسن بن عطیہ عوفی ہے ، اور وہ ” ضعیف“ ہے ۔

سیدنا نعمان بن بشیر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب کوئی شخص رات کے وقت سونے لگے ، اور اُس کا ارادہ یہ ہو کہ وہ رات کے وقت نماز ادا کرے گا ، تو اُسے اپنے دائیں طرف مٹھی بھر مٹی رکھنی چاہیے ، اگر وہ بیدار ہو جائے ، تو پھر اپنے بائیں طرف کنکریاں رکھنی چاہیں “ ۔
یہ روایت امام طبرانی نے معجم اوسط اور معجم کبیر میں نقل کی ہے ، اسے امام بزار نے بھی نقل کیا ہے ، اس کی سند میں ایک راوی ایوب بن عتبہ ہے ، جسے امام أحمد نے ، ایک روایت کے مطابق ” ثقہ “ قرار دیا ہے ، یحیی بن معین نے ایسا ہی کیا ہے ، ایک روایت کے مطابق انہوں نے اسے ضعیف قرار دیا ہے ، امام بخاری رحمہ اللہ ، امام مسلم اور ایک جماعت نے اسے ضعیف کہا: ہے ۔

سیدنا عقبہ بن عامر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میری اُمت سے تعلق رکھنے والے دو قسم کے افراد ہیں ، اُن میں سے ایک رات کے وقت اٹھتا ہے ، اور اپنے آپ کو طہارت کے لئے تیار کرتا ہے ، اس پر گرہیں لگی ہوئی ہوتی ہیں ، وہ وضو کرتا ہے ، جب وہ اپنے ہاتھ دھوتا ہے ، تو ایک گرہ کھل جاتی ہے ، جب وہ اپنے چہرے کو دھوتا ہے ، تو ایک گرہ کھل جاتی ہے ، جب وہ اپنے سر پر مسح کرتا ہے ، تو ایک گرہ کھل جاتی ہے ، جب وہ اپنے پاؤں پر وضو کرتا ہے ، تو ایک گرہ کھل جاتی ہے ، تو حجاب کے پیچھے سے میرا پروردگار فرماتا ہے : میرے بندے کی طرف دیکھو ! جو اپنے آپ کو اس چیز کے لئے تیار کر رہا ہے ، میرا بندہ مجھ سے جو مانگے گا ، وہ اُس کو ملے گا “ ۔
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔