مجمع الزوائد ومنبع الفوائد

عمار بن ابوعمار ، جو بنوہاشم کے غلام ہیں ، وہ بیان کرتے ہیں : ایک مرتبہ اُن کا گزر سیدنا عبدالرحمن بن سمرہ رضی اللہ عنہ کے پاس سے ہوا ، جو ” نہر ام عبداللہ “ کے پاس موجود تھے ، وہ اپنے لڑکوں اور غلاموں پر پانی بہا رہے تھے ، عمار نے اُن سے دریافت کیا : اے ابوسعید ! آج جمعہ ہے ، تو سیدنا عبدالرحمن بن سمرہ رضی اللہ عنہ نے انہیں جواب دیا : نبی اکرم صلی اللہ علیہ وسلم نے ارشاد فرمایا ہے : ” جب تیز بارش ہو رہی ہو ، تو آدمی کو اپنی رہائشی جگہ پر نماز ادا کر لینی چاہیے “ ۔
یہ روایت عبداللہ نے اپنے والد ( امام أحمد ) کے حوالے سے ” وجادہ “ کے طور پر نقل کی ہے ، اس کی سند میں ایک راوی ناصح بن العلاء ہے ، جسے یحیی بن معین نے اور امام بخاری رحمہ اللہ نے ایک روایت کے مطابق اسے ضعیف قرار دیا ہے ، انہوں نے اس کے حوالے سے یہ حدیث ذکر کی ہے ، اور یہ بات بیان کی ہے ، اس کے حوالے سے اس روایت کے علاوہ اور کوئی حدیث منقول نہیں ہے ، یہ شخص ” ثقہ “ ہے ، امام ابوداؤد نے اسے ” ثقہ “ قرار دیا ہے ۔

سیدنا عبداللہ بن مسعود رضی اللہ عنہ فرماتے ہیں : ہماری عید صرف دن کے ابتدائی حصے میں ہوتی تھی ، مجھے اپنے بارے میں صرف یہ بات یاد ہے کہ ہم نبی اکرم صلی اللہ علیہ وسلم کی اقتداء میں ، حطیم کے سائے میں جمعہ ادا کرتے تھے ۔
یہ روایت امام طبرانی نے معجم کبیر میں نقل کی ہے ، اور ابوعبیدہ نامی راوی نے اپنے والد سے سماع نہیں کیا ہے ۔