مجمع الزوائد ومنبع الفوائد

سیدنا عبداللہ بن زبیر رضی اللہ عنہما بیان کرتے ہیں : نبی اکرم صلی اللہ علیہ وسلم چھڑی کے ذریعے ( ٹیک لگا کر ) خطبہ ارشاد فرماتے تھے
یہ روایت امام طبرانی نے معجم کبیر میں اور امام بزار نے نقل کی ہے ، اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم سفر کے دوران کمان کے ساتھ ٹیک لگا کر لوگوں کو خطبہ ارشاد فرماتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابوشیبہ ہے ، اور وہ ” ضعیف“ ہے ۔

سیدنا سعد القرظ رضی اللہ عنہ جو نبی اکرم صلی اللہ علیہ وسلم کے مؤذن ہیں وہ بیان کرتے ہیں : نبی اکرم صلی اللہ علیہ وسلم جب جمعہ کے دن خطبہ ارشاد فرماتے تھے تو عصا کے ساتھ ٹیک لگا کر خطبہ ارشاد فرماتے تھے ۔ ( علامہ ہیثمی فرماتے ہیں : ) میں یہ کہتا ہوں : انہوں نے یہ بات ایک طویل حدیث کے درمیان میں نقل کی ہے
یہ روایت امام طبرانی نے معجم کبیر میں نقل کی ہے ، اور اس کی سند ” ضعیف “ ہے ۔