مجمع الزوائد ومنبع الفوائد

سیدنا نعمان رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو خطبہ ارشاد فرماتے ہوئے سنا آپ نے فرمایا : میں تم لوگوں کو جہنم سے ڈراتا ہوں میں تم لوگوں کو جہنم سے ڈراتا ہوں یہاں تک کہ ایک شخص جو بازار میں موجود تھا اس نے یہ بات میرے اس جگہ پر کھڑے ہونے کے دوران سن لی راوی کہتے ہیں : یہاں تک کہ اس کے کندھے پر موجود چادر اس کے پاؤں میں گر گئی ایک روایت میں یہ الفاظ ہیں : اہل بازار نے آپ کی آواز سن لی اور آپ اس وقت منبر پر موجود تھے
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا علی رضی اللہ عنہ یا شاید سیدنا زبیر بیان کرتے ہیں ۔ نبی اکرم صلی اللہ علیہ وسلم ہمیں خطبہ دے رہے تھے ، اور ہمیں وعظ و نصیحت کر رہے تھے یہاں تک کہ اس کے اثرات آپ کے چہرے سے محسوس ہو رہے تھے یوں لگ رہا تھا جیسے آپ کسی قوم کو ڈرا رہے ہیں جنہیں کل جنگ کا سامنا کرنا پڑے گا نبی اکرم صلی اللہ علیہ وسلم کی کچھ دیر پہلے سیدنا جبرائیل سے ملاقات ہوئی تھی آپ ہنسے نہیں تھے یہاں تک کہ وہ اوپر چلے گئے ۔
یہ روایت امام أحمد اور امام بزار نے اور امام طبرانی نے معجم کبیر میں اور اوسط میں اس کی مانند نقل کی ہے امام ابویعلیٰ نے اسے صرف سیدنا زبیر کے حوالے سے نقل کیا ہے ، اور اس کے رجال ” صحیح “ کے رجال ہیں ۔

سیدنا بریدہ رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم نکلے آپ نے تین مرتبہ بلند آواز میں پکار کر کہا: اے لوگو کیا تم جانتے ہو میری اور تمہاری مثال کیا ہے ( ہماری مثال ) ایک ایسی قوم کی مانند ہے ، جسے دشمن کا خوف ہو کہ اس کے پاس وہ آ جائے گا ، اور پھر وہ لوگ ایک شخص کو بھیجتے ہیں جو ان کے لئے خبر گیری کرتا ہے وہ شخص اسی دوران دشمن کو دیکھ لیتا ہے ، اور آتا ہے تاکہ ان لوگوں کو ڈرائے اسے یہ اندیشہ ہوتا ہے کہ کہیں ایسا نہ ہو اس کے اپنی قوم کو ڈرانے سے پہلے دشمن اس تک پہنچ جائے تو وہ اپنے کپڑے کو لہرا کر کہتا ہے اے لوگو ( خطرہ ) تمہارے پاس پہنچ چکا ہے اے لوگو تمہارے پاس پہنچ چکا ہے یہ بات آپ نے تین مرتبہ ارشاد فرمائی ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔ ( علامہ ہیشمی فرماتے ہیں : ) میں یہ کہتا ہوں : اس موضوع سے متعلق دیگر احادیث مواعظ سے متعلق باب میں آئیں گی اگر اللہ نے چاہا ۔

سیدنا عبداللہ بن عباس رضی اللہ عنہما بیان کرتے ہیں : ضمام بن ثعلبہ نبی اکرم صلی اللہ علیہ وسلم کی خدمت میں حاضر ہوا اور بولا: اے سیدنا محمد صلی اللہ علیہ وسلم کیا میں آپ کو دم نہ کروں ؟ نبی اکرم صلی اللہ علیہ وسلم نے ارشاد فرمایا : ” ہر طرح کی حمد اللہ تعالیٰ کے لئے مخصوص ہے ہم اس کی حمد بیان کرتے ہیں ، اور اس سے مدد طلب کرتے ہیں ، اور ہم اپنی ذات کی شر سے اور اپنے اعمال کی برائیوں سے اللہ تعالی کی پناہ مانگتے ہیں جس اللہ تعالی ہدایت نصیب کر دے اسے کوئی گمراہ کرنے والا نہیں ہے ، اور جسے وہ گمراہ رہنے دے اسے کوئی ہدایت دینے والا نہیں ہے ، اور میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے ، اور سیدنا محمد صلی اللہ علیہ وسلم اس کے بندے اور اس کے رسول ہیں “ ۔ ( علامہ ہیثمی فرماتے ہیں : ) میں یہ کہتا ہوں : اس کے بعد انہوں نے یہ حدیث ذکر کی ہے ، جو پوری حدیث مناقب سے متعلق باب میں آئے گی اگر اللہ نے چاہا سیدنا عبداللہ بن عباس رضی اللہ عنہما کے حوالے سے منقول ایک حدیث ضماد کے واقعہ کے بارے میں بھی ہے ، جو ” صحیح “ میں مذکور ہے ، لیکن یہاں اس شخص کا نام ” م “ کے ساتھ یعنی ضمام ذکر ہوا ہے
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا کعب بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ہر وہ اہم کام جس کا آغاز الحمدللہ کے ذریعے نہ کیا جائے وہ جذام شدہ ہوتا ہے ( راوی کو شک ہے شاید یہ الفاظ ہیں : ) وہ منقطع ہوتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی صدقہ بن عبداللہ ہے ، جسے امام أحمد امام بخاری رحمہ اللہ امام مسلم اور دیگر حضرات نے ضعیف قرار دیا ہے ابوحاتم نے ، اور ایک روایت کے مطابق دحیم نے اسے ” ثقہ “ قرار دیا ہے ۔

سیدنا عبداللہ بن زبیر فرماتے ہیں : جمعہ کے دن منبر پر نبی اکرم صلی اللہ علیہ وسلم پر درود بھیجنا سنت نہیں ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی لیث بن ابوسلیم ہے ، اور وہ تدلیس کرنے والا ہے ۔

سیدنا عبداللہ بن مسعود رضی اللہ عنہ فرماتے ہیں : نبی اکرم صلی اللہ علیہ وسلم نے ہمیں خطبہ دیتے ہوئے ارشاد فرمایا : ” امابعد “ ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا شداد بن اوس رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” اے لوگو دنیا سامنے موجود سامان ہے ، جس میں سے نیک اور گناہگار ( یعنی ہر قسم کا فرد ) کھا لیتا ہے ، اور آخرت ایک سچا وعدہ ہے ، جس میں قدرت رکھنے والا بادشاہ فیصلہ دے گا وہ حق کو حق ظاہر کر دے گا ، اور باطل کو باطل طے کر دے گا ، اے لوگو ! آخرت والے بن جاؤ دنیا والے نہ بنو کیونکہ ہر ماں کا بچہ اس کے پیچھے جاتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابومہدی سعید بن سنان ہے ، اور وہ انتہائی ” ضعیف“ ہے ۔

نعیم بن محہ بیان کرتے ہیں : سیدنا ابوبکر کے خطبہ میں یہ کلمات تھے : ” کیا تم لوگ یہ بات نہیں جانتے ہو کہ تم صبح و شام ایک متعین مدت کی طرف بڑھ رہے ہو تم میں سے جو شخص یہ استطاعت رکھتا ہو کہ وہ آخری وقت تک اللہ تعالیٰ کے لئے عمل کرتا رہے ، تو اسے ایسا کرنا چاہیے تو تم اس منزل تک اللہ تعالٰی کی مدد کے بغیر نہیں پہنچ سکتے ہو کچھ لوگوں نے اپنی توقعات دوسروں کے لئے مقرر کی ہوئی ہیں تو اس نے تمہیں اس بات سے منع کیا ہے کہ تم ان کی مانند ہو جاؤ اور تم ان لوگوں کی مانند بھی نہ ہو جانا جو اللہ تعالیٰ کو بھول گئے تم اپنے جن بھائیوں سے واقف تھے وہ کہاں ہیں ؟ وہ اس چیز کی طرف چلے گئے ہیں جو انہوں نے آگے بھیجا تھا اور اب ان کے بارے میں بدنصیبی یا سعادت مندی طے ہو چکی ہے پہلے زمانے کے حکمران کہاں ہیں ؟ جنہوں نے بڑے شہر بنائے تھے ، اور انہیں دیواروں کے ذریعے محفوظ کر دیا تھا اور وہ سب چٹانوں کے نیچے اور کنوؤں کے نیچے ہیں یہ اللہ تعالیٰ کی کتاب ہے ، جس کے عجائبات کبھی ختم نہیں ہوں گے ، تو تم تاریکی کے دن کے لئے اس سے روشنی حاصل کرو اور اس کی شان اور اس کے بیان کے ذریعے وضاحت حاصل کرو بے شک اللہ تعالیٰ نے سیدنا ذکریا علیہ السلام اور ان کے اہلِ بیت کی تعریف کرتے ہوئے یہ بات ارشاد فرمائی ہے : ” وہ لوگ بھلائی کے کام میں جلدی کرنے والے تھے رغبت رکھتے ہوئے اور ڈرتے ہوئے ہم سے دعا کیا کرتے تھے ، اور وہ لوگ ہمارا خشوع رکھتے تھے “ ۔ ایسی کسی بھی بات میں کوئی بھلائی نہیں ہے ، جس کے ذریعے اللہ تعالی کی رضا کا ارادہ نہ کیا گیا ہو ایسے کسی مال میں کوئی بھلائی نہیں ہے ، جسے اللہ تعالی کی راہ میں خرچ نہ کیا جائے ایسے شخص میں کوئی بھلائی نہیں ہے ، جس کی بردباری اس کی جہالت پر غالب نہ آئے اور ایسے کسی شخص میں کوئی بھلائی نہیں ہے ، جو اللہ تعالیٰ کے بارے میں کسی ملامت کرنے والے کی علامت سے خوف زدہ ہو “ ۔
یہ روایت امام طبرانی نے معجم کبیر میں نقل کی ہے ، اور نعیم بن محہ نامی راوی کے حالات بیان کرتے ہوئے میں نے کسی کو نہیں پایا ہے ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے : وہ ہر جمعرات کے دن تشریف لاتے تھے ، اور کھڑے ہو جاتے تھے وہ اس دوران بیٹھتے نہیں تھے وہ یہ فرماتے تھے تم لوگوں کو آزمائش کا شکار نہ کرو کیونکہ لوگوں میں ضعیف عمر رسیدہ اور کام کاج والے لوگ ہوتے ہیں ، اور تمہاری توقعات طویل نہ ہو جائیں اور خواہشات تمہیں غافل نہ کر دیں کیونکہ جو چیز آنے والی ہے وہ قریب ہے ، اور جو چیز دور ہے وہ نہیں آئے گی لوگوں میں سے برے لوگ وہ ہیں جو دن کے وقت احمق ہوتے ہیں ، اور رات کو مردار ہوتے ہیں “ ۔
یہ روایت امام طبرانی نے معجم کبیر میں نقل کی ہے ، اور ابوعبیدہ نے اپنے والد ( سیدنا عبداللہ بن مسعود رضی اللہ عنہ ) سے سماع نہیں کیا ہے ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے ، جب وہ تشریف فرما ہوتے تھے تو یہ فرماتے تھے : تم لوگ ایک ایسی صورت حال میں ہو ، جس میں رات اور دن گزر رہے ہیں جو ایک مخصوص کے بعد ختم ہو جائیں گے اور اعمال کی حفاظت کی جا رہی ہے موت اچانک آ جائے گی ، جس شخص نے بھلائی بوئی ہو گی وہ عنقریب رغبت رکھتے ہوئے اسے کاشت کر لے گا ، اور جس شخص نے برائی بوئی ہو گی وہ عنقریب ندامت کا شکار ہو کر اسے کاشت کرے گا ہر بونے والے نے جو بویا ہے وہی ملے گا ، اور سستی والا اپنے حصے کے حوالے سے سبقت نہیں لے جا سکتا اور حرص رکھنے والا اپنے حرص کے ذریعے اس چیز تک نہیں پہنچ سکتا جو اس کے نصیب میں نہ ہو ، جس شخص کو بھلائی عطا کی گئی ہو گی تو اللہ تعالیٰ نے ہی اسے عطا کی ہو گی ، اور جو شخص برائی ہے بچایا گیا ہو گا ، تو اللہ تعالیٰ نے ہی اسے بچایا ہو گا پرہیز گار لوگ سردار ہیں فقہاء قیادت کرنے والے ہیں ، اور ان کی ہمنشینی ( علم میں ) اضافے کا باعث ہوتی ہے “ ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا ابی بن کعب رضی اللہ عنہ بیان کرتے ہیں : نبی اکرم صلی اللہ علیہ وسلم نے جمعہ کے دن سورت توبہ کی تلاوت کی آپ نے کھڑے ہونے کے دوران اللہ تعالیٰ کے ایام ( یعنی سابقہ حالات و واقعات ) کے حوالے سے وعظ و نصیحت کی ۔ ( علامہ ہیثمی فرماتے ہیں : ) میں یہ کہتا ہوں : یہ روایت امام ابن ماجہ نے نقل کی ہے ، تاہم انہوں نے یہ الفاظ نقل نہیں کیے ہیں : ” سورت توبہ “ ۔
یہ روایت عبداللہ بن أحمد نے اپنی زیادات میں نقل کی ہے ، اور اس کے رجال ” صحیح “ کے رجال ہیں ۔

سیدنا علی رضی اللہ عنہ کے بارے میں یہ بات منقول ہے : وہ منبر پر سورت الکافرون اور سورت الاخلاص کی تلاوت کرتے تھے ۔
یہ روایت امام طبرانی نے معجم کبیر اور معجم اوسط میں نقل کی ہے وہ بیان کرتے ہیں : اسحاق بن زریق اس روایت کو نقل کرنے میں منفرد ہیں ۔ ( علامہ ہیثمی فرماتے ہیں : ) میں یہ کہتا ہوں : میں نے کسی کو اس کے حالات بیان کرتے ہوئے نہیں پایا ہے ، اس روایت کے بقیہ رجال کی توثیق کی گئی ہے ۔

سیدنا جابر بیان کرتے ہیں : نبی اکرم صلی اللہ علیہ وسلم نے خطبہ دیتے ہوئے سورت زمر کا آخری حصہ خطبے میں تلاوت کیا تو منبر نے دو مرتبہ حرکت کی ۔
یہ روایت امام طبرانی نے معجم اوسط میں ابوبحر بکراوی کی عباد بن میسرہ منقری سے نقل کردہ روایت کے طور پر نقل کی ہے ، اور یہ دونوں ضعیف ہیں البتہ امام أحمد نے ابوبحر کے بارے میں یہ کہا: ہے ، اس میں کوئی حرج نہیں ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں : ( آپ نے ارشاد فرمایا ہے : ) ” خطبے کو مختصر دینا اور طویل نماز ادا کرنا آدمی کی سمجھ داری کی علامت ہے ، تو تم لوگ نماز طویل ادا کرو اور خطبہ مختصر دو ، کیونکہ بعض بیان جادو ہوتے ہیں عنقریب تمہارے بعد ایسے لوگ آئیں گے جو طویل خطبہ دیں گے اور مختصر نمازیں ادا کریں گے “ ۔
یہ روایت امام بزار نے نقل کی ہے امام طبرانی نے معجم کبیر میں اس روایت کا کچھ حصہ ” موقوف “ روایت کے طور پر نقل کیا ہے ، اور ” موقوف “ روایت کے رجال ” ثقہ “ ہیں امام بزار کے رجال میں قیس بن ربیع نامی راوی ہے ، جسے شعبہ اور ثوری نے ” ثقہ “ قرار دیا ہے ، جب کہ دیگر حضرات نے اسے ضعیف قرار دیا ہے ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم جب کوئی امیر بھیجتے تھے تو یہ ارشاد فرماتے تھے : خطبہ مختصر دینا کلام تھوڑا کرنا کیونکہ بعض کلام جادو ہوتے ہیں ۔
یہ روایت امام طبرانی نے معجم کبیر میں جمیع بن ثواب کے حوالے سے نقل کی ہے ، اور وہ متروک ہے ۔

سیدنا عبداللہ بن مسعود رضی اللہ عنہ فرماتے ہیں : تم لوگ ایک ایسے زمانے میں رہ رہے ہو ، جس میں خطیب کم ہیں ، اور علماء زیادہ ہیں وہ لوگ نماز طویل ادا کرتے ہیں ، اور خطبہ مختصر دیتے ہیں عنقریب تم لوگوں پر ایسا زمانہ آئے گا جس میں خطیب زیادہ ہوں گے اور علماء کم ہوں گے “ ۔ اس کے بعد راوی نے پوری حدیث ذکر کی ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا سمرہ بن جندب رضی اللہ عنہ بیان کرتے ہیں : نبی اکرم صلی اللہ علیہ وسلم ہر جمعہ کے دن مؤمن مردوں اور مومن خواتین مسلمان مردوں اور مسلمان خواتین کے لئے دعائے مغفرت کیا کرتے تھے ۔
یہ روایت امام بزار نے اور امام طبرانی نے معجم کبیر میں نقل کی ہے امام بزار فرماتے ہیں : اس روایت کے بارے میں ہمارے علم کے مطابق یہ صرف اسی سند کے ساتھ نبی اکرم صلی اللہ علیہ وسلم سے منقول ہے امام بزار کی سند میں ایک راوی یوسف بن خالد سمتی ہے ، اور وہ ” ضعیف “ ہے ۔

سیدنا معاویہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ان لوگوں پر لعنت کی ہے ، جو خطبہ دیتے ہوئے یوں کلام کرتے ہیں جس طرح شعر کو چبا چبا کر سنایا جاتا ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی جابر جعفی ہے ، اور اس پر ضعیف ہونا غالب ہے ۔

سیدنا بشیر بن عقربہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص خطبہ دینے کے لئے کھڑا ہوتا ہے ، اور اس کے ذریعے اس کا مقصد صرف ریاء کاری اور شہرت کا حصول ہوتا ہے ، تو اللہ تعالیٰ اسے ریاء کاری اور شہرت کے مقام پر ٹھہرائے گا “ ۔
یہ روایت امام طبرانی نے معجم کبیر میں نقل کی ہے ، اور امام أحمد نے نقل کی ہے ، اور اس کے رجال کی توثیق کی گئی ہے ۔ ( علامہ ہیثمی فرماتے ہیں : ) میں یہ کہتا ہوں : اس موضوع سے متعلق دیگر احادیث آگے چل کر ادب سے متعلق باب اور زہد سے متعلق باب میں آئیں گی ۔

سیدنا عبداللہ بن مسعود رضی اللہ عنہ فرماتے ہیں : جس شخص کو خطبہ مل جائے تو جمعہ کی دو رکعات ہوں گی ، اور جو شخص اس کو نہ پائے تو وہ چار رکعات ادا کرے اور جو شخص رکوع کو نہیں پاتا ہے ، تو وہ سجدے کے ذریعے رکعت کو شمار نہیں کرے گا جب تک وہ رکوع کو نہیں پا لیتا ۔
یہ روایت امام طبرانی نے معجم کبیر میں ” موقوف “ روایت کے طور پر نقل کی ہے ، اور اس کے رجال ” ثقہ “ ہیں ۔

مسلم بن عیاض بیان کرتے ہیں : میں نے سیدنا امام حسن بن علی رضی اللہ عنہما سے جمعہ کی دو رکعات کے بارے میں دریافت کیا : تو انہوں نے فرمایا : یہ دونوں ان کے علاوہ کے لئے قضا ہیں ( یعنی ان کے علاوہ نماز میں جو کمی کوتاہی رہ گئی ہو یہ اس کو پورا کر دیتی ہیں ) ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا ابوعتبہ خولانی نبی اکرم صلی اللہ علیہ وسلم کے بارے میں یہ بات نقل کرتے ہیں : آپ جمعہ کی نماز میں سورت جمعہ اور اس سورت کی تلاوت کرتے تھے جس میں منافقین کا ذکر کیا گیا ہے
یہ روایت امام بزار نے اور امام طبرانی نے معجم کبیر میں نقل کی ہے ، اور انہوں نے یہ الفاظ زائد نقل کیے ہیں : ” نبی اکرم صلی اللہ علیہ وسلم جب چلتے تھے تو قدم جما کر چلتے تھے “ ۔ اس روایت کی سند میں ایک راوی ابومہدی سعید بن سنان ہے ، اور وہ ” ضعیف “ ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم جمعہ کی نماز میں سورت جمعہ کی تلاوت کرتے تھے آپ اس کے ذریعے اہل ایمان کو ترغیب دیتے تھے ، اور دوسری رکعت میں سورت منافقین کی تلاوت کرتے تھے اس کے ذریعے آپ منافقین کو ڈراتے تھے ۔ ( علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں اختصار کے ساتھ منقول ہے
یہ روایت امام طبرانی نے معجم اوسط میں نقل کیا ہے ، اور اس کی سند حسن ہے محمد بن عمار نامی راوی وازعی ہے وہ اور اس کا استاد عبدالصمد ، اہل رائے سے تعلق رکھتے ہیں ، اور ان دونوں کو ابن حبان نے ” ثقہ “ قرار دیا ہے ۔