مجمع الزوائد ومنبع الفوائد

عباد بن عبداللہ بن زبیر بیان کرتے ہیں : جب سیدنا معاویہ حج کرنے کے لئے ہمارے پاس آئے اور ہم لوگ مکہ آ گئے تو انہوں نے ظہر کی نماز میں دو رکعات پڑھائیں پھر وہ نماز ختم کرنے کے بعد دارالندوہ کی طرف گئے انہوں نے بتایا : سیدنا عثمان غنی رضی اللہ عنہ نے جب مکہ آنے کے بعد مکمل نماز ادا کی تھی اور وہاں ظہر عصر اور عشاء کی نماز میں چار چار رکعات پڑھائی تھیں جب وہ منی اور عرفات کی طرف آئے تھے تو انہوں نے نماز مختصر ادا کی تھی جب وہ حج سے فارغ ہوئے اور منی میں مقیم ہوئے تو انہوں نے مکمل نماز ادا کی یہاں تک کہ وہ وہاں سے روانہ ہو گئے اور سیدنا معاویہ نے ہمیں دو رکعات پڑھائیں تو مروان بن حکم اور عمرو بن عثمان ان کی طرف گئے اور ان دونوں سے کہا: کسی نے بھی آپ کے چچازاد پر اس طرح اعتراض نہیں کیا جس طرح کا اعتراض آپ نے ان پر کیا ہے سیدنا معاویہ نے ان لوگوں سے دریافت کیا : تم دونوں کا ستیاناس ہو کیا میں نے جو کیا ہے ، اس کے علاوہ کرنا چاہیے تھا میں نے نبی اکرم صلی اللہ علیہ وسلم کی اقتداء میں سیدنا ابوبکر رضی اللہ عنہ سیدنا عمر رضی اللہ عنہ کی اقتداء میں دو رکعات ہی ادا کی ہیں تو ان دونوں صاحبان نے کہا: ( یعنی سیدنا عثمان غنی رضی اللہ عنہ ) تو نماز مکمل کرتے تھے ، اور آپ نے ان کے برخلاف کر کے ان پر اعتراض کر دیا ہے راوی بیان کرتے ہیں : تو سیدنا معاویہ عصر کی نماز کے لئے نکلے ، تو انہوں نے عصر کی نماز میں ہمیں چار رکعات پڑھائیں
یہ روایت امام أحمد نے نقل کی ہے امام طبرانی نے اس کا کچھ حصہ معجم کبیر میں نقل کیا ہے امام أحمد کے رجال کی توثیق کی گئی ہے ۔

ایک صاحب بیان کرتے ہیں : ہم سیدنا ابوذر غفاری کے لئے کوئی چیز اٹھا کر لائے ہمارا ارادہ یہ تھا کہ وہ چیز ہم انہیں دیں گے جب ہم ربذہ آئے اور ہم نے ان کے بارے میں دریافت کیا : تو ہم نے انہیں نہیں پایا یہ بات بتائی گئی کہ ان کا حج کے لئے جانے کا ارادہ ہے ، اور انہیں اجازت مل گئی ہے ، تو ہم ان کے پاس شہر میں آ گئے راوی کہتے ہیں اس سے مراد منی ہے ابھی ہم ان کے پاس موجود تھے کہ انہیں یہ بات بتائی گئی کہ سیدنا عثمان غنی رضی اللہ عنہ نے چار رکعات نماز پڑھا دی ہے سیدنا ابوذر غفاری کو یہ بات بہت گراں گزری اور انہوں نے اس بارے میں سخت غصے کا اظہار کیا اور انہوں نے یہ بات بیان کی کہ میں نے نبی اکرم صلی اللہ علیہ وسلم کی اقتداء میں نماز ادا کی ہے آپ نے دو رکعات پڑھائی تھیں سیدنا ابوبکر رضی اللہ عنہ اور سیدنا عمر رضی اللہ عنہ کی اقتداء میں نماز ادا کی ہے پھر سیدنا ابوذر غفاری اٹھے اور انہوں نے بھی چار رکعات ادا کر لیں ان سے کہا: گیا پہلے تو آپ نے امیرالمؤمنین پر اعتراض کیا تھا اور اب آپ خود یہی کام کر رہے تھے تو انہوں نے فرمایا : اختلاف کرنا زیادہ سخت ہے ، اس کے بعد راوی نے حسب سابق روایت ذکر کی ہے
یہ روایت مکمل روایت کے طور پر آگے آئے گی اگر اللہ نے چاہا یہ یا تو باغیوں سے جنگ کرنے سے متعلق باب میں آئے گی ، یا خلافت سے متعلق باب میں آئے گی ۔
یہ روایت امام أحمد نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ۔

سیدہ عائشہ رضی اللہ عنہا بیان کرتی ہیں : نبی اکرم صلی اللہ علیہ وسلم جب سفر کرتے تھے تو کبھی مکمل نماز ادا کر لیتے تھے ، اور کبھی قصر کرتے تھے ۔
یہ روایت امام بزار نے نقل کی ہے ، اس کی سند میں ایک راوی مغیرہ بن زیاد ہے ، جس سے استدلال کرنے کے بارے میں اختلاف کیا گیا ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” میری امت کے سب سے بہتر لوگ وہ ہیں جو اگر کوئی برائی کریں گے ، تو استغفار کریں اور جب کوئی اچھائی کریں گے ، تو خوشخبری حاصل کریں گے جب سفر کریں گے ، تو نماز کو قصر کر دیں گے اور روزہ ترک کر دیں گے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ۔