مجمع الزوائد ومنبع الفوائد

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جہاں تک میرا تعلق ہے ، تو میں سات ہڈیوں پر سجدہ کرتا ہوں ، اور بال اور کپڑے کو ( نماز کے دوران ) موڑتا نہیں ہوں “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی نوح بن ابراہیم ہے ، اور وہ متروک ہے ۔

سیدنا عبداللہ بن مسعود رضی اللہ عنہ فرماتے ہیں : ہمیں یہ حکم دیا گیا ہے کہ ہم سات ہڈیوں پر سجدہ کریں اور ہم ( نماز کے دوران ) بال یا کپڑے کو موڑیں نہیں ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی اسماعیل بن عمرو بجلی ہے ، جسے امام ابوحاتم اور دارقطنی نے ضعیف قرار دیا ہے ۔ ابن حبان نے اس کا تذکرہ کتاب الثقات میں کیا ہے ۔

سیدنا سعد بن ابووقاص فرماتے ہیں : بندے کو اس بات کا حکم دیا گیا ہے کہ وہ اپنے سات اعضاء پر سجدہ کرے اپنے چہرے پر دونوں ہتھیلیوں پر دونوں گھٹنوں پر اور دونوں قدموں پر جو بھی ان میں سے ( زمین پر ) نہیں رکھے گا ، تو اسی حساب سے کمی ہو گی “ ۔
یہ روایت امام ابویعلیٰ نے نقل کی ہے ، اس کی سند میں ایک راوی موسیٰ بن محمد بن حیان ہے ، جسے ابوزرعہ نے ضعیف قرار دیا ہے ذہبی نے اس کا نام ” ج“ کے ساتھ نقل کیا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” سجدہ سات اعضاء پر کیا جائے گا“ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابوامیہ بن یعلی ہے ، اور وہ ” ضعیف“ ہے ۔

سیدنا ابوسعید خدری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کے پہلو کی سفیدی دیکھی جب آپ سجدے میں تھے ۔
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ۔

سیدنا جابر بن عبداللہ رضی اللہ عنہما بیان کرتے ہیں : نبی اکرم صلی اللہ علیہ وسلم جب سجدے میں جاتے تھے تو اپنے بازو پہلو سے اتنے دور رکھتے تھے کہ آپ کی بغلوں کی سفیدی دکھائی دے جاتی تھی ۔
یہ روایت امام أحمد نے اور امام طبرانی نے تینوں کتابوں میں نقل کی ہے ، اور امام أحمد کے رجال ” صحیح “ کے رجال ہیں ۔

سیدنا براء رضی اللہ عنہ بیان کرتے ہیں : نبی اکرم صلی اللہ علیہ وسلم ہتھیلیوں پر سجدہ کرتے تھے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا ابوہریرہ رضی اللہ عنہ بیان کرتے ہیں : یہ منظر گویا آج بھی میری نگاہ میں ہے ، جب میں نے نبی اکرم صلی اللہ علیہ وسلم کی بغلوں کی سفیدی کو دیکھا جب آپ سجدے میں گئے تھے
یہ روایت امام طبرانی نے معجم اوسط میں نقل کی ہے ، اور اس کے رجال ” ثقہ “ ہیں ۔

سیدنا عدی بن عمیرہ حضرمی رضی اللہ عنہ بیان کرتے ہیں : نبی اکرم صلی اللہ علیہ وسلم جب سجدے میں جاتے تھے تو آپ کی بغلوں کی سفیدی دکھائی دے جاتی تھی جب آپ سلام پھیرتے تھے تو اپنا چہرہ مکمل طور پر دائیں طرف پھیرتے تھے یہاں تک کہ آپ کے رخسار کی سفیدی نظر آ جاتی تھی اور پھر بائیں طرف بھی ( اسی طرح سلام پھیرتے تھے ) “ ۔
یہ روایت امام طبرانی نے معجم اوسط میں طویل روایت کے طور پر اور معجم کبیر میں اختصار کے ساتھ نقل کی ہے ، جس میں سلام پھیرنے کا ذکر ہے اوسط کے رجال ” ثقہ “ ہیں ۔

سیدنا جابر بیان کرتے ہیں : نبی اکرم صلی اللہ علیہ وسلم کچھ بالوں کے ہمراہ پیشانی پر سجدہ کرتے تھے ۔
یہ روایت امام ابویعلیٰ نے اور امام طبرانی نے معجم اوسط میں نقل کی ہے ، تاہم انہوں نے یہ الفاظ نقل کیے ہیں : ” آپ کی پیشانی پر کچھ بال ہوتے تھے “ ۔ اس روایت کی سند میں ایک راوی ابوبکر بن عبداللہ بن ابومریم ہے ، اور وہ اختلاط کا شکار ہونے کی وجہ سے ” ضعیف“ ہے ۔

سیدنا عبداللہ بن ابواوفی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو عمامہ کے بیچ پر سجدہ کرتے ہوئے دیکھا ہے اس کی سند میں ایک راوی سعید بن عنبسہ ہے اگر تو راوی ہے ، تو پھر یہ ضعیف ہے ، اور اگر یہ اس کے علاوہ کوئی اور ہے تو پھر میں اس سے واقف نہیں ہوں ۔

عبیداللہ بن عبداللہ بن اقرم اپنے والد کے حوالے سے اپنے دادا کا یہ بیان نقل کرتے ہیں : میں نمرہ کے میدان میں بکریاں چرا رہا تھا میں نے نبی اکرم صلی اللہ علیہ وسلم کو دیکھا آپ نے وہاں پڑاؤ کیا آپ نے نماز کے لئے اقامت کہلوائی اور اپنے اصحاب کو نماز پڑھائی میں نے ان کے ہمراہ نماز ادا کی تو نبی اکرم صلی اللہ علیہ وسلم کے کندھے کے نیچے کی سرخی کا منظر آج بھی میری نگاہ میں ہے ۔ نبی اکرم صلی اللہ علیہ وسلم اس وقت سجدے کی حالت میں تھے
یہ روایت امام طبرانی نے معجم کبیر میں سیدنا اقرم کے حوالے سے نقل کی ہے ، اور اسی طرح نقل کی ہے ، جس طرح یہاں مذکور ہے ، جب کہ امام ابوداؤد اور دیگر حضرات نے اسے سیدنا عبداللہ بن اقرم کے حوالے سے نقل کیا ہے ، اور اس روایت کے رجال ” ثقہ “ ہیں ۔

یزید بن ابوزیاد بیان کرتے ہیں : مجھے اس شخص نے یہ حدیث بیان کی ہے ، جس نے سیدنا عبداللہ بن مسعود رضی اللہ عنہ کو دیکھا کہ انہوں نے یہ فرمایا گویا کہ میں اس وقت بھی ان کی طرف دیکھ رہا ہوں کہ جب وہ سجدے کی حالت میں تھے تو انہوں نے کہنیاں پہلو سے اتنی دور رکھی ہوئی تھیں کہ ان کی بغلوں کی سفیدی میں دیکھ سکتا تھا اس روایت کی سند میں ایک شخص ایسا ہے ، جس کا نام بیان نہیں کیا گیا ہے امام طبرانی نے۔
یہ روایت معجم کبیر میں اسی طرح نقل کی ہے ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے : وہ ایک ایسے شخص کے پاس سے گزرے جو سجدے کی حالت میں تھا اور اس نے بالوں کا جوڑا بنایا ہوا تھا سیدنا عبداللہ رضی اللہ عنہ نے اسے کھول دیا جب اس شخص نے نماز مکمل کی تو سیدنا عبداللہ رضی اللہ عنہ نے اس سے فرمایا تم جوڑا نہ بنایا کرو کیونکہ بال بھی سجدہ کرتے ہیں ، اور تمہیں ہر ایک بال کے عوض میں اجر ملے گا اس شخص نے کہا: میں نے یہ جوڑا اس لئے بنایا تھا تاکہ یہ بال خاک آلود نہ ہو جائیں سیدنا عبداللہ بن مسعود رضی اللہ عنہ نے فرمایا : اگر یہ خاک آلود ہو جائیں تو یہ تمہارے حق میں زیادہ بہتر ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

کثیر بن سلیم بیان کرتے ہیں : میں نے سیدنا انس بن مالک رضی اللہ عنہ کو اپنے عمامے پر سجدہ کرتے ہوئے دیکھا ہے ۔
یہ روایت امام طبرانی نے معجم کبیر میں نقل کی ہے کثیر بن سلیم نامی راوی ” ضعیف“ ہے ۔ ابن حبان نے کتاب ” التقات “ میں یہ بات بیان کی ہے کثیر بن سلیم نے ضحاک بن مزاحم سے روایات نقل کی ہیں ، اور اس سے ابوتمیلہ نے روایات نقل کی ہیں انہوں نے کتاب ” الضعفاء “ میں یہ بات بیان کی ہے کثیر بن سلیم وہ شخص ہے ، جسے کثیر بن عبداللہ کہا: جاتا ہے اس نے سیدنا انس رضی اللہ عنہ کے حوالے سے ایسی روایات نقل کی ہیں جو ان سے منقول نہیں ہیں یہ ان کی طرف جھوٹی باتیں منسوب کرتا ہے باقی اللہ بہتر جانتا ہے ۔ ابن حبان کے علاوہ اور کسی نے اس کی توثیق نہیں کی ہے ۔

سیدنا واثلہ بن اسقع رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” آدمی اپنی پیشانی کو اس وقت تک صاف نہ کرے جب تک وہ نماز سے فارغ نہیں ہو جاتا البتہ کنپٹیوں سے پسینہ پونچھنے میں کوئی حرج نہیں ہے فرشتے آدمی کے لئے دعائے رحمت کرتے رہتے ہیں جب تک سجدے کا نشان ( یعنی خاک وغیرہ ) اس کی دونوں آنکھوں کے درمیان ( یعنی پیشانی پر ) دکھائی دیتا رہتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ایوب بن مدرک ہے ، اور وہ کذاب ہے ۔

سیدنا عبداللہ بن عباس رضی اللہ عنہما نے نبی اکرم صلی اللہ علیہ وسلم کا یہ فرمان نقل کیا ہے : ” جو شخص سجدے میں جاتے ہوئے اپنی ناک کو پیشانی کے ساتھ زمین پر نہیں رکھتا ہے ، اس کی نماز درست نہیں ہوتی ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال کی توثیق کی گئی ہے اگرچہ اس کے بعض راویوں کے بارے میں اختلاف کیا گیا ہے کیونکہ وہ شیعہ ہیں ۔

سیدہ ام عطیہ رضی اللہ عنہما بیان کرتی ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ اس شخص کی نماز قبول نہیں کرتا جس کی ناک ( سجدے میں ) زمین سے نہیں لگتی ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی سلیمان بن محمد بن قافلانی ہے ، اور وہ متروک ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب کوئی شخص سجدے میں جائے تو وہ اپنی ہتھیلیاں زمین کے ساتھ ملائے تاکہ اللہ تعالی قیامت کے دن اسے نجات نصیب کرے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبید بن محمد محاربی ہے ۔ ابن عدی کہتے ہیں ۔ اس کے حوالے سے منکر روایات منقول ہیں جو اس نے ابوذئب سے نقل کی ہیں ( علامہ ہیثمی فرماتے ہیں : ) میں یہ کہتا ہوں : یہ روایت بھی ان میں سے ایک ہے ۔

سیدنا ابوہریرہ رضی اللہ عنہ بیان کرتے ہیں : ایک بارش والے دن نبی اکرم صلی اللہ علیہ وسلم سجدے میں گئے یہاں تک کہ میں نے کیچڑ کا نشان آپ کی پیشانی اور ناک پر دیکھا
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سوید بن عبدالعزیز ہے ، اور وہ ” ضعیف“ ہے ۔

سیدنا ابوحجیفہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا کہ آپ ( سجدہ کرتے ہوئے ) اپنی ناک کو زمین پر یوں جما کے رکھتے تھے جس طرح آپ اپنی پیشانی کو جما کے رکھتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی حجاج بن ارطاۃ ہے ، اور اس کے بارے میں کلام کیا گیا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب تم نماز ادا کرو تو اپنی کلائیاں یوں نہ بچھا لو جس طرح درندے بچھاتے ہیں تم اپنی سیرین کے بل بیٹھو اور اپنی کہنیاں پہلو سے دور رکھو “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں یہ حکم دیا تھا کہ ہم سجدے میں اعتدال سے کام لیں اور ( پاؤں کھڑا کر کے ) ایڑیوں کے بل نہ بیٹھیں ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی سعید بن بشیر ہے ، اور اس کے بارے میں کلام کیا گیا ہے ۔

سیدنا عبداللہ بن مسعود رضی اللہ عنہ فرماتے ہیں : جب کوئی شخص سجدے میں جائے تو وہ لیٹ کر ، یا تورک کے طور پر بیٹھ کر سجدہ نہ کرے کیونکہ جب وہ اچھے طریقے سے سجدہ کرے گا ، تو اس کا ہر عضو بھی وہ سجدہ کرے گا ( یا اس کا ہر عضو اس سجدے میں شریک ہو گا )
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

اعمش رضی اللہ عنہ بیان کرتے ہیں : میں نے سیدنا انس بن مالک رضی اللہ عنہ کو مکہ میں نماز ادا کرتے ہوئے دیکھا جب وہ سجدے میں گئے تو انہوں نے بازؤں کو پہلو سے الگ رکھا یہاں تک کہ مجھے ان کے پیٹ کی سلوٹیں دکھائی دے گئیں ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ۔