مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم عشاء کی نماز میں سورت بروج کی اور سورت الطارق کی تلاوت کرتے تھے ۔

ان کے حوالے سے یہ بھی منقول ہے کہ نبی اکرم صلی اللہ علیہ وسلم نے انہیں حکم دیا تھا کہ عشاء کی نماز میں سماوات کی تلاوت کی جائے ۔ یہ دونوں روایات امام أحمد نے نقل کی ہیں ۔ ان دونوں کی سند میں ایک راوی ابومہزم ہے ، جسے شعبہ علی بن مدینی ابوزرعہ ابوحاتم اور امام نسائی رحمہ اللہ نے ضعیف قرار دیا ہے امام أحمد فرماتے ہیں یہ کتنا مقارب الحدیث ہے ۔

سیدنا بریده رضی اللہ عنہ بیان کرتے ہیں : سیدنا معاذ نے اپنے اصحاب کو عشاء کی نماز پڑھائی تو اس میں سورت القمر کی تلاوت کی ان کے فارغ ہونے سے پہلے ایک شخص اٹھا اس نے تنہا نماز ادا کی اور چلا گیا سیدنا معاذ نے اس کے بارے میں سخت کلمات کے وہ شخص نبی اکرم صلی اللہ علیہ وسلم کی خدمت میں حاضر ہوا اور آپ کے سامنے عذر پیش کیا اس نے عرض کی میں نے کھجور کے باغ میں کام کرنا تھا مجھے پانی کے بارے میں اندیشہ تھا تو نبی اکرم صلی اللہ علیہ وسلم نے ( سیدنا معاذ رضی اللہ عنہ سے ) ارشاد فرمایا : تم سورت والشمس اور اس جیسی سورتوں کی تلاوت کر لیا کرو
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

عبدالرحمن بن یزید بیان کرتے ہیں : سیدنا عبداللہ بن مسعود رضی اللہ عنہ نے عشاء کی نماز پڑھتے ہوئے سورت انفال کی تلاوت شروع کی جب وہ اس آیت پر پہنچے فنِعْمَ المَولى ونعم النصیر تو وہ رکوع میں چلے گئے پھر انہوں نے دوسری رکعت میں مفصل سورتوں سے تعلق رکھنے والی دو سورتوں کی تلاوت کی ایک روایت میں یہ الفاظ ہیں : مفصل سورتوں سے تعلق رکھنے والی ایک سورت کی تلاوت کی : دونوں روایات امام طبرانی نے معجم کبیر میں نقل کی ہیں ، اور ان دونوں کے رجال کی توثیق کی گئی ہے ۔