مجمع الزوائد ومنبع الفوائد

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” نماز کی تکمیل میں صف قائم کرنا بھی شامل ہے “ ۔
یہ روایت امام أحمد امام ابویعلیٰ نے امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی عبداللہ بن محمد بن عقیل ہے ، جس سے استدلال کرنے کے بارے میں اختلاف کیا گیا ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” نماز میں صفیں اچھے طریقے سے قائم کرو “ ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” میں اپنے پیچھے بھی اسی طرح دیکھ لیتا ہوں جس طرح میں اپنے سامنے کی طرف دیکھتا ہوں ، اور تم اپنی صفوں کو درست رکھو اور رکوع و سجود اچھے طریقے سے کرو “ ۔
یہ روایت امام بزار نے نقل کی ہے ، اور اس کے رجال ” ثقہ “ ہیں ۔

سیدنا عبداللہ بن مسعود رضی اللہ عنہ فرماتے ہیں : مجھے اپنے ( یعنی صحابہ کرام کے ) بارے میں یہ بات یاد ہے کہ ( نبی اکرم صلی اللہ علیہ وسلم کے زمانہ اقدس میں ) نماز اس وقت تک شروع نہیں ہوتی تھی جب تک صفیں درست نہیں ہو جاتی تھیں ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” یا تو تم صفیں درست کرو گے یا پھر چہرے بجھ جائیں گے یا تو تم اپنی نگاہیں نیچے رکھو گے یا پھر تمہاری بینائی اچک لی جائے گی “ ۔
یہ روایت امام أحمد نے اور طبرانی نے معجم کبیر میں نقل کی ہے ، اس کی سند میں یہ بات مذکور ہے ، اسے عبداللہ بن زحر نے علی بن یزید سے روایت کیا ہے ، اور یہ دونوں راوی ” ضعیف “ ہیں ۔