مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جب کسی شخص کو نماز کے دوران گڑ بڑ محسوس ہو ، تو وہ نماز ختم کرے اور وضو کر لے “ ۔
یہ روایت امام طبرانی نے معجم اوسط اور معجم صغیر میں نقل کی ہے ، اور اس کے رجال کی توثیق کی گئی ہے ۔

سیدنا مسور بن مخرمہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” کوئی شخص ایسی حالت میں نماز ہرگز ادا نہ کرے کہ وہ گندگی میں سے کوئی چیز محسوس کر رہا ہو ( راوی کہتے ہیں : یعنی اسے پاخانہ یا پیشاب آ رہا ہو ) “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی واقدی ہے ، اور وہ ” ضعیف“ ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم اس وقت نماز ادا نہیں کرتے تھے جب آپ کو اذیٰ ( یعنی پیشاب یا پاخانہ ) میں سے کوئی چیز محسوس ہو رہی ہوتی تھی ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابومعشر سندی ہے ، جسے بہت سے لوگوں نے ضعیف قرار دیا ہے ، اور دوسرے لوگوں نے اسے ” ثقہ “ قرار دیا ہے میں یہ کہتا ہوں : اس بارے میں کچھ احادیث اس سے پہلے گزر چکی ہیں جن میں یہ ذکر ہوا ہے کہ جب امام کو یہ بات یاد آئے کہ وہ بے وضو ہے ، اسی طرح کچھ روایات طہارت سے متعلق باب میں گزر چکی ہیں ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اس بات کی گواہی دیتا ہو کہ میں اللہ کا رسول ہوں تو وہ ایسی حالت میں نماز میں شریک نہ ہو کہ وہ پیشاب یا پاخانہ کو روکے ہوئے ہو جب تک وہ اس حوالے سے ہلکا پھلکا نہیں ہو جاتا “ ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے یہ پوری روایت اجازت مانگنے کے متعلق باب میں آئے گی ۔
یہ روایت امام طبرانی نے معجم کبیر نقل کی ہے امام ابن ماجہ نے اس کا کچھ حصہ نقل کیا ہے ، اس کی سند میں ایک راوی سفر بن نسیر ہے ، اور ایک راوی عبداللہ بن صالح ہے ان دونوں کو ثقہ بھی قرار دیا گیا لیکن ان دونوں میں ضعف پایا جاتا ہے ، اس روایت کے بقیہ رجال کی توثیق کی گئی ہے ۔ اس سے پہلے ایک حدیث گزر چکی ہے ، جسے امام أحمد نے روایت کیا ہے وہ اس باب میں ہے ، جس میں اس بات کی ممانعت ہے کہ امام اپنی ذات کو دعا کے لئے مخصوص کرے ۔