مجمع الزوائد ومنبع الفوائد

سیدنا جابر بن عبداللہ رضی اللہ عنہما بیان کرتے ہیں : میں نے نبی اکرم صلی اللہ علیہ وسلم سے کنکریوں پر ہاتھ پھیرنے کے بارے میں دریافت کیا : تو آپ نے ارشاد فرمایا : ایک دفعہ ایسا کر لو اور اگر تم اس سے بھی باز رہو تو یہ ایک سو اونٹینوں سے زیادہ بہتر ہے ، جو سب سیاہ آنکھوں والی ہوں ۔
یہ روایت امام أحمد نے نقل کی ہے ، اس کی سند میں ایک راوی شرحبیل بن سعد ہے ، اور وہ ” ضعیف“ ہے ۔

سیدنا حذیفہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم سے ہر چیز کے بارے میں سوال کیا یہاں تک کہ کنکریوں پر ہاتھ پھیرنے کے بارے میں بھی سوال کیا تو نبی اکرم صلی اللہ علیہ وسلم نے فرمایا : ایک دفعہ ایسا کر لو یا اسے بھی ترک کر دو !
یہ روایت امام أحمد نے نقل کی ہے ، اس کی سند میں ایک راوی محمد بن ابولیلی ہے ، اور اس کے بارے میں کلام کیا گیا ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص کو دیکھا جو کنکریوں کو حرکت دے رہا تھا وہ شخص نماز ادا کر رہا تھا جب اس نے نماز مکمل کر لی تو نبی اکرم صلی اللہ علیہ وسلم نے اس شخص سے فرمایا : نماز میں سے تمہارا حصہ یہ ہے ۔
یہ روایت امام ابویعلیٰ نے اور امام بزار نے نقل کی ہے ، اس کی سند میں ایک راوی یوسف بن خالد سمتی ہے ، اور وہ ” ضعیف “ ہے ۔

سیدنا عبداللہ بن عمر رضی اللہ عنہما بیان کرتے ہیں : ہم لوگ نبی اکرم صلی اللہ علیہ وسلم کی اقتداء میں نماز ادا کر رہے تھے ایک شخص اپنے ہاتھ کے ذریعے کنکریاں پلٹنے لگا جب آپ نے نماز مکمل کی تو آپ نے ہماری طرف رخ کیا اور ارشاد فرمایا : تم میں سے کون شخص اپنے ہاتھ کے ذریعے کنکریاں الٹ پلٹ رہا تھا ؟ ایک شخص کھڑا ہوا اور بولا: یا رسول اللہ ! میں ، نبی اکرم صلی اللہ علیہ وسلم نے فرمایا : تمہاری نماز میں سے تمہارا حصہ یہی ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی وازع بن نافع ہے ، اور وہ ” ضعیف“ ہے ۔

سیدنا سائب بن یزید رضی اللہ عنہ بیان کرتے ہیں : نبی اکرم صلی اللہ علیہ وسلم نے اپنے پیچھے ایک شخص کو کنکریاں الٹتے پلٹتے ہوئے سنا آپ اس وقت نماز ادا کر رہے تھے ( نماز سے فارغ ہونے کے بعد ) نبی اکرم صلی اللہ علیہ وسلم نے دریافت کیا : کون شخص کنکریاں الٹ پلٹ رہا تھا ؟ ایک شخص نے عرض کی : یا رسول اللہ ! میں ، نبی اکرم صلی اللہ علیہ وسلم نے فرمایا : تمہاری نماز میں سے تمہارا حصہ یہی ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یزید بن عبدالملک نوفلی ہے ، جسے ائمہ نے ضعیف قرار دیا ہے ایک روایت کے مطابق یحیی بن معین نے اسے ” ثقہ “ کہا: ہے ، اور دوسری روایت کے مطابق انہوں نے اسے ضعیف قرار دیا ہے ۔

سیدنا ابوذر غفاری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم سے کنکریوں پر ہاتھ پھیرنے کے بارے میں دریافت کیا : ان کی مراد یہ تھی کہ نماز کے دوران ایسا کرنے کے بارے میں دریافت کیا : تو نبی اکرم صلی اللہ علیہ وسلم نے ارشاد فرمایا : ایک مرتبہ ہاتھ پھیرا جا سکتا ہے ۔ ( علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے ” سنن “ میں یہ حدیث منقول ہے ، جو کنکریوں پر ہاتھ پھیرنے کی ممانعت کے بارے میں ہے ۔
یہ روایت امام بزار نے نقل کی ہے ، اس کی سند میں ایک راوی محمد بن ابولیلی ہے ، اور اس کی نقل کردہ حدیث میں ضعف پایا جاتا ہے ۔