مجمع الزوائد ومنبع الفوائد

سیدنا جابر رضی اللہ عنہ بیان کرتے ہیں : پہلے ہم نبی اکرم صلی اللہ علیہ وسلم کی اقتداء میں نماز ادا کرتے تھے تو ہم نماز کے دوران رات اور اس کی تاریکی ( یعنی آسمان ) کی طرف دیکھ لیتے تھے ۔
یہ روایت امام بزار نے نقل کی ہے ، اس کی سند میں ایک راوی ابوبکر مدنی ہے ، اور وہ مجہول ہے ۔

سیدنا ابوسعید خدری رضی اللہ عنہ نے نبی اکرم صلی اللہ علیہ وسلم کا یہ فرمان نقل کیا ہے : ” جب کوئی شخص نماز ادا کر رہا ہو تو وہ اپنی نگاہ آسمان کی طرف نہ اٹھائے کہیں وہ ( یعنی بینائی ) رخصت نہ ہو جائے “ ۔
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی ابن لہیعہ ہے ، جس میں ضف پایا جاتا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اپنی نگاہیں آسمان کی طرف نہ بلند کرو کہیں وہ ضائع نہ ہو جائیں “ ۔ راوی کہتے ہیں : یعنی نماز کے دوران ایسا نہ کرو ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا کعب بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” یا تو لوگ ( نماز کے دوران ) اپنی نگاہیں آسمان کی طرف اٹھانے سے باز آ جائیں گے یا ان کی بینائی اچک لی جائے گی “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبدالعزیز بن عبیداللہ بن حمزہ ہے ، اور وہ ” ضعیف“ ہے ۔

ابراہیم نخعی بیان کرتے ہیں : سیدنا عبداللہ بن مسعود رضی اللہ عنہ نے ایک شخص کو نماز کے دوران دونوں ہاتھ آسمان کی طرف بلند کر کے نماز کے دوران دعا کرتے ہوئے دیکھا تو سیدنا عبداللہ رضی اللہ عنہ نے فرمایا : شاید اس کی بینائی اچک لی جائے گی اس سے پہلے کہ وہ اس کی طرف واپس آئے ۔
یہ روایت امام طبرانی نے معجم کبیر میں نقل کی ہے ابراہیم نخعی نے سیدنا عبداللہ بن مسعود رضی اللہ عنہ سے سماع نہیں کیا ہے ۔