مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم جب وضو کے لئے اُٹھتے تھے ، تو برتن انڈیل ( کر پہلے ہاتھ دھوتے ) تھے ، بسم اللہ پڑھتے تھے اور پھر اچھی طرح وضو کرتے تھے ۔ یہی روایت امام ابویعلیٰ نے نقل کی ہے ، امام بزار نے اس کا کچھ حصہ نقل کیا ہے ، کہ جب آپ صلی اللہ علیہ وسلم وضو کا آغاز کرتے ، تو پہلے بسم اللہ پڑھ لیتے تھے ۔ ان دونوں احادیث کا مدار حارثہ بن محمد نامی راوی پر ہے اور اس کے ضعیف ہونے پر محدثین کا اتفاق ہے ۔

سیدنا ابوہریرہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے ابوہریرہ ! جب تم وضو کرو ، تو «بسم الله والحمدلله» پڑھ لو ، تمہارے محافظ فرشتے اس وقت تک تمہارے لئے نیکیاں نوٹ کرتے رہیں گے ، جب تک تمہارا وہ وضو ختم نہیں ہوتا “ ۔
یہ روایت امام طبرانی نے معجم صغیر میں نقل کی ہے اور اس کی سند حسن ہے ۔