مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تم لوگ اپنے نسب کا علم حاصل کرو ، تاکہ اس کے ذریعے تم اپنے رشتہ داروں کے ساتھ اچھا سلوک کرو ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابواسباط بشر بن رافع ہے ، جس کے ضعیف ہونے پر محدثین کا اتفاق ہے ۔

سیدنا علاء بن خارجہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم لوگ اپنے انساب کا علم حاصل کرو ، تاکہ اس کے ذریعے اپنے رشتے داروں کے ساتھ اچھا سلوک کرو “ ۔ ۔ ۔ ۔ ۔ ۔ ۔ اس کے بعد انہوں نے پوری حدیث ذکر کی ہے ، یہ پوری روایت صلہ رحمی کرنے سے متعلق باب میں آئے گی ۔
یہ روایت امام طبرانی نے معجم کبیر میں نقل کی ہے اس کے رجال کی توثیق کی گئی ہے ۔

سیدنا معاویہ بن حکم رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے ، اُنہوں نے عرض کی : یا رسول اللہ ! میں آپ سے ایک چیز کے بارے میں سوال کرنے لگا ہوں ، آپ صلی اللہ علیہ وسلم کے بعد میں کسی سے اس بارے میں سوال نہیں کروں گا ، ہمارے باپ ( یعنی بنی نوع انسان کے جدامجد ) کون ہیں ؟ نبی اکرم صلی اللہ علیہ وسلم نے ارشاد فرمایا : سیدنا آدم علیہ السلام ، انہوں نے دریافت کیا : ہماری ماں کون ہیں ؟ نبی اکرم صلی اللہ علیہ وسلم نے فرمایا : سیدہ حواء رضی اللہ عنہا ، انہوں نے دریافت کیا : جنات کا جدامجد کون ہے ؟ نبی اکرم صلی اللہ علیہ وسلم نے فرمایا : ابلیس ، انہوں نے دریافت کیا : اُن کی ماں کون ہے ؟ نبی اکرم صلی اللہ علیہ وسلم نے فرمایا : اُس کی بیوی ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی طلحہ بن زید ہے ، جسے امام بخاری رحمہ اللہ اور امام أحمد نے ضعیف قرار دیا ہے ، ابن حبان نے اس کا تذکرہ کتاب الثقات میں کیا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” سیدنا نوح علیہ السلام کی اولاد یہ ہے : سام ، حام اور یافث ، سام کی اولاد اہل عرب ، اہل فارس اور اہل روم ہیں ، اور بھلائی ان میں ہے ، یافث کی اولاد یاجوج ماجوج ، ترک اور صقالبہ ہیں ، ان میں کوئی بھلائی نہیں ہے ، جبکہ حام کی اولاد قبطی ، بربر اور سیاہ فام لوگ ہیں ۔ “
یہ روایت امام بزار نے نقل کی ہے اس کی سند میں ایک راوی محمد بن یزید بن سنان رہاوی ہے ، جس نے اپنے باپ سے یہ روایت نقل کی ہے ، محمد نامی راوی کو ابن حبان نے ثقہ قرار دیا ہے ، ابوحاتم کہتے ہیں یہ صدوق ہے ، یحیی بن معین اور امام بخاری رحمہ اللہ نے اسے ضعیف قرار دیا ہے ، یزید بن سنان نامی راوی کو ابوحاتم نے ثقہ قرار دیا ہے ، وہ فرماتے ہیں : اس کا محل صدق ہے ، امام بخاری رحمہ اللہ فرماتے ہیں : یہ مقارب الحدیث ہے ، یحیی اور ایک جماعت نے اسے ضعیف قرار دیا ہے ۔

سیدنا عمران بن حصین رضی اللہ عنہ اور سیدنا سمرہ بن جندب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سیدنا نوح علیہ السلام کے تین بیٹے تھے ، سام ، عربوں کے جدامجد ہیں ، حام ، حبشیوں کے جدامجد ہیں اور یافث ، رومیوں کے جدامجد ہیں ۔ “
یہ روایت امام طبرانی نے معجم کبیر میں نقل کی ہے ، اس کے رجال کی توثیق کی گئی ہے ۔

نبی اکرم صلی اللہ علیہ وسلم کی زوجہ محترمہ سیدہ ام سلمہ رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” معد بن عدنان بن ادّ بن اُد بن زید بن براء بن اعراق الثرى ۔ “ سیدہ ام سلمہ رضی اللہ عنہا فرماتی ہیں : پھر نبی اکرم صلی اللہ علیہ وسلم نے ارشاد فرمایا : اللہ تعالیٰ نے قوم عاد کو ، قوم ثمود کو ، اصحاب رس کو اور اُن کے درمیان اور بھی بہت سے لوگوں کو ہلاکت کا شکار کیا ، جن کا علم صرف اللہ تعالیٰ کو ہے ۔ سیدہ ام سلمہ رضی اللہ عنہا فرماتی ہیں : معد ، معد اور عدنان ، عدنان اور اُدد ، ادد اور زید بن ہمیسع اور براء ، تبت اور اعراق الثریٰ ، اسماعیل بن ابراہیم ۔
یہ روایت امام طبرانی نے معجم صغیر میں نقل کی ہے ، اس کی سند میں ایک راوی عبدالعزیز بن عمران ہے ، جو سیدنا عبدالرحمن بن عوف کی اولاد میں سے ہے ، امام بخاری رحمہ اللہ اور ایک جماعت نے اسے ضعیف قرار دیا ہے ، ابن حبان نے اس کا تذکرہ کتاب الثقات میں کیا ہے ۔

سیدہ عائشہ رضی اللہ عنہا فرماتی ہیں : لوگوں کا نسب معد بن عدنان تک ٹھیک رہتا ہے ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی ابن اسحاق ہے اور وہ تدلیس کرنے والا ہے ۔

سیدنا عبداللہ بن عباس رضی اللہ عنہما بیان کرتے ہیں : ایک شخص نے نبی اکرم صلی اللہ علیہ وسلم سے سبا کے بارے میں دریافت کیا : کہ وہ کیا ہے ؟ کیا وہ مرد ہے ؟ یا عورت ہے ؟ یا کوئی جگہ ہے ؟ نبی اکرم صلی اللہ علیہ وسلم نے ارشاد فرمایا : وہ مرد ہے ، جس کے دس بچے ہوئے تھے ، جن میں سے چھ یمن میں رہائش پذیر ہوئے اور ان میں سے چار شام میں رہائش پذیر ہوئے ، یمن میں رہنے والوں کے نام یہ ہیں : مذحج ، کندہ ، ازد ، اشعریون ، انمار اور حمیر عرب سبھی لوگ ، شامیوں کے نام یہ ہیں ، لخم ، جذام ، عاملہ اور غسان ۔
یہ روایت امام أحمد نے ( اپنی مسند میں ) اور امام طبرانی نے معجم کبیر میں نقل کی ہے اور اس کی سند میں ایک راوی ابن لہیعہ ہے اور وہ ضعیف ہے ۔ ( علامہ ہیثمی فرماتے ہیں : ) میں یہ کہتا ہوں : یزید بن حصین کی نقل کردہ روایت آگے آئے گی ، جو سورہ سہا سے متعلق باب کے ضمن میں آئے گی ، اور وہ اس روایت سے زیادہ مستند ہے ۔

سیدنا عمرو بن مرہ جہنی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” یہاں جو شخص ” معد“ سے تعلق رکھتا ہے ، وہ کھڑا ہو جائے ، راوی بیان کرتے ہیں : میں کھڑا ہو گیا ، تو آپ صلی اللہ علیہ وسلم نے ارشاد فرمایا : تم بیٹھ جاؤ ! ایسا تین مرتبہ ہوا ، ہر مرتبہ میں ہی کھڑا ہو جاتا اور آپ صلی اللہ علیہ وسلم یہ فرما دیتے : تم بیٹھ جاؤ ! جب تیسری مرتبہ ایسا ہوا ، تو میں نے عرض کی : یا رسول اللہ ! ہمارا ( نسبی ) تعلق کس سے ہے ؟ آپ صلی اللہ علیہ وسلم نے ارشاد فرمایا : اے قضاعہ قبیلے کے افراد ! تم لوگ ” حمیر “ سے تعلق رکھتے ہو ۔ سیدنا عمرو رضی اللہ عنہ بیان کرتے ہیں ۔ میں نے بیس سال تک یہ حدیث چھپا کے رکھی ۔
یہ روایت امام أحمد ، امام ابویعلیٰ ، امام بزار نے ( اپنی اپنی مسند میں ) اور امام طبرانی نے معجم کبیر میں نقل کی ہے ، امام طبرانی نے اس کے مختلف طرق نقل کئے ہیں ، جن میں سے ایک میں یہ الفاظ ہیں : ” میں نے عرض کی : یا رسول اللہ ! ہمارا ( نسبی ) تعلق کس سے ہے ؟ نبی اکرم صلی اللہ علیہ وسلم نے ارشاد فرمایا : تمہارا تعلق پھیلے ہوئے ہاتھ اور سیر کرنے والے لقمے ( شاید اس سے مراد مہمان نواز اور سخی ہونا ہے ) ” حمیر “ سے ہے ۔ اس روایت کی سند میں ایک راوی ابن لہیعہ ہے ۔

سیدنا عمرو بن مرہ جہنی رضی اللہ عنہ بیان کرتے ہیں : ایک مرتبہ ہم لوگ نبی اکرم صلی اللہ علیہ وسلم کے پاس موجود تھے ، آپ نے ارشاد فرمایا : یہاں جو شخص ” معد “ سے تعلق رکھتا ہے وہ کھڑا ہو جائے ، تو سیدنا عمرو بن مرہ رضی اللہ عنہ کھڑے ہو گئے ، نبی اکرم صلی اللہ علیہ وسلم نے اُن سے فرمایا : تم بیٹھ جاؤ ! وہ بیٹھ گئے ، پھر نبی اکرم صلی اللہ علیہ وسلم نے دریافت کیا : یہاں ” معد“ سے تعلق رکھنے والا جو شخص موجود ہے ، وہ کھڑا ہو جائے ، تو سیدنا عمرو بن مرہ رضی اللہ عنہ کھڑے ہو گئے ، نبی اکرم صلی اللہ علیہ وسلم نے اُن سے فرمایا : تم بیٹھ جاؤ ! اُس کے بعد آپ صلی اللہ علیہ وسلم نے فرمایا : یہاں ” معد “ سے تعلق رکھنے والا جو شخص موجود ہے ، وہ کھڑا ہو جائے ، تو سیدنا عمرو بن مرہ رضی اللہ عنہ کھڑے ہو گئے ، نبی اکرم صلی اللہ علیہ وسلم نے ارشاد فرمایا : تم بیٹھ جاؤ ! انہوں نے عرض کی : یا رسول اللہ ! ہمارا تعلق کس سے ہے ؟ نبی اکرم صلی اللہ علیہ وسلم نے ارشاد فرمایا : تم لوگ قضاعہ بن مالک بن حمیر ( کی اولاد ) سے تعلق رکھتے ہو ، جو ایک معروف نسب ہے ، منکر نہیں ہے ۔ سیدنا عمرو بن مرہ رضی اللہ عنہ بیان کرتے ہیں : میں نے یہ روایت چھپا کے رکھی ، یہاں تک کہ سیدنا معاویہ رضی اللہ عنہ کے عہد خلافت میں انہوں نے مجھے پیغام بھیج کر بلایا اور بولے : کیا تم اس بات میں دلچسپی رکھتے ہو کہ تم منبر پر چڑھ کر قضاعہ بن معد بن عدنان کا تذکرہ کرو ! اس کے بدلے میں ، میں تمہیں زندگی بھر عراقین ( دو عراق ، یعنی کوفہ اور بصرہ ) اور مصر کا خراج ادا کرتا رہوں گا ، تو سیدنا عمرو بن مرہ رضی اللہ عنہ نے کہا: ٹھیک ہے تو یہ اعلان کیا گیا : لوگ جمع ہو جائیں ، لوگ جمع ہو گئے ، سیدنا عمرو بن مرہ رضی اللہ عنہ لوگوں کی گردنیں پھلانگتے ہوئے آئے اور منبر پر چڑھ گئے ، انہوں نے اللہ تعالیٰ کی حمد و ثناء بیان کرنے کے بعد ارشاد فرمایا : ” اے لوگوں کے گروہ ! جو شخص مجھے جانتا ہے ، وہ تو مجھے جانتا ہی ہے ، اور جو مجھے نہیں جانتا ، تو میں عمرو بن مرہ جہنی ہوں ، معاویہ بن ابوسفیان نے مجھے بلوایا ، تاکہ میں منبر پر چڑھ کر قضاعہ بن معد بن عدنان کا ذکر کروں : بے شک ہم چمکدار اور روشن بزرگ کی اولاد ہیں ، جو قضاعہ بن مالک بن حمیر ہے ، جو ایک معروف نسب ہے اور منکر نہیں ہے ۔ پھر وہ منبر سے نیچے آ گئے تو سیدنا معاویہ رضی اللہ عنہ نے ان سے کہا: اے وعدہ خلاف ! یہ کیا کیا ہے ؟ یہ بات انہوں نے تین مرتبہ کہی ۔ تو سیدنا عمرو بن مرہ جہنی رضی اللہ عنہ نے کہا: یہ وہی چیز ہے جو آپ نے ملاحظہ فرمائی ہے ، اے امیرالمؤمنین ! تو سیدنا عمرو رضی اللہ عنہ کے صاحبزادے زہیر ان کے پیچھے گئے اور ان سے کہا: اے ابا جان ! آپ پر کوئی حرج نہیں ہو گا ، اگر آپ امیر المؤمنین کی بات مان لیں ، وہ آپ کو دونوں عراقوں ( یعنی کوفہ اور بصرہ ) اور مصر کا خراج زندگی بھر دیتے رہیں گے ، تو سیدنا عمرو رضی اللہ عنہ نے یہ اشعار کہے : اے زہیر ! اگر میں تمہاری بات مان لوں تو تم نے لوگوں کے درمیان دن دیہاڑے مجھے عار کی چادر اوڑھا دی ہے ۔ ہمارا جدامجد قحطان ہے جس کے حوالے سے ہمیں بلایا جاتا ہے ۔ اور ابوخزیمہ خندف بن نزار ہے ۔ کیا تاریک رات میں لوگوں کے درمیان اپنے پتے گرانے والا زیادہ معذور شمار ہو گا ، یا دن میں ایسا کرنے والا ( زیادہ معذور شمار ہو گا ) ۔ جس باپ کے حوالے سے ہمیں بلایا جاتا ہے ، کیا ہم اسے مختلف گروہوں کے جدامجد کے عوض میں فروخت کر دیں جو پوشیدہ اور چھپا ہوا ہے ۔ یہ ایک ایسا سودا ہو گا ، جیسے سونے کو ڈھیلوں اور پتھروں کے عوض میں فروخت کر دیا جائے ۔ “
یہ روایت امام طبرانی نے معجم کبیر میں نقل کی ہے اس کی سند میں ایک راوی دلہاث بن داؤد ہے ، ازدی فرماتے ہیں : اس نے اپنے آباؤ اجداد کے حوالے سے جو روایت نقل کی ہے وہ مستند نہیں ہے ( علامہ ہیثمی فرماتے ہیں : ) یہ حدیث بھی اس نے اپنے آباؤ اجداد کے حوالے سے نقل کی ہے ۔

ربیع بن سبرہ اپنے والد کا یہ بیان نقل کرتے ہیں : میں نبی اکرم صلی اللہ علیہ وسلم کے پاس موجود تھا ، جب آپ صلی اللہ علیہ وسلم نے ارشاد فرمایا : یہاں ” معد “ ( کی اولاد ) سے تعلق رکھنے والا جو فرد موجود ہے وہ کھڑا ہو جائے ، تو سیدنا عمرو بن مرہ رضی اللہ عنہ کھڑے ہو گئے ، نبی اکرم صلی اللہ علیہ وسلم نے ان سے فرمایا : تم بیٹھ جاؤ ! ایسا تین مرتبہ ہوا ، پھر نبی اکرم صلی اللہ علیہ وسلم نے ارشاد فرمایا : قضاعہ کا تعلق حمیر سے ہے ۔
یہ روایت امام طبرانی نے معجم کبیر میں نقل کی ہے ، اس کے رجال صحیح کے رجال ہیں ، صرف محمد بن ابوعبید دراور دی کا معاملہ مختلف ہے ، جو عبدالعزیز کے والد ہیں ، میں نے کسی کو ان کا ذکر کرتے ہوئے نہیں دیکھا ہے ۔

ابوعشانہ بیان کرتے ہیں : میں نے سیدنا عقبہ بن عامر رضی اللہ عنہ کو منبر پر یہ بیان کرتے ہوئے سنا : ” نبی اکرم صلی اللہ علیہ وسلم مدینہ منورہ تشریف لائے ، میں اُس وقت اپنی بکریاں چرا رہا تھا ، میں نے بکریوں کو چھوڑا اور نبی اکرم صلی اللہ علیہ وسلم کی خدمت میں حاضر ہو گیا ، میں نے عرض کی : یا رسول اللہ ! آپ صلی اللہ علیہ وسلم مجھ سے بیعت لیں ، نبی اکرم صلی اللہ علیہ وسلم نے دریافت کیا : تمہارا تعلق کون سے خاندان سے ہے ؟ میں نے آپ صلی اللہ علیہ وسلم کو بتایا ، نبی اکرم صلی اللہ علیہ وسلم نے دریافت کیا : کون سی چیز تمہارے نزدیک زیادہ پسندیدہ ہے ؟ کیا ہجرت کی بیعت ؟ یا دیہاتی رہنے کی بیعت ؟ میں نے عرض کی : ہجرت کی بیعت ، آپ صلی اللہ علیہ وسلم نے مجھ سے بیعت لے لی ، ایک دن نبی اکرم صلی اللہ علیہ وسلم اللہ نے ارشاد فرمایا : یہاں معد ( کی اولاد ) سے تعلق رکھنے والا جو شخص موجود ہے وہ کھڑا ہو جائے ، تو میں کھڑا ہو گیا ، آپ صلی اللہ علیہ وسلم نے ارشاد فرمایا : تم بیٹھ جاؤ ! پھر آپ صلی اللہ علیہ وسلم نے دریافت کیا : یہاں جو شخص معد سے تعلق رکھتا ہے وہ کھڑا ہو جائے ، میں کھڑا ہو گیا ، تو آپ صلی اللہ علیہ وسلم نے ارشاد فرمایا : تم بیٹھ جاؤ ! تیسری مرتبہ آپ صلی اللہ علیہ وسلم نے یہی بات ارشاد فرمائی ، تو میں کھڑا ہو گیا ، آپ صلی اللہ علیہ وسلم نے فرمایا : تم بیٹھ جاؤ ! میں نے عرض کی : یا رسول اللہ ! ہم کس خاندان سے تعلق رکھتے ہیں ؟ آپ صلی اللہ علیہ وسلم نے ارشاد فرمایا : تم قضاعه بن مالک بن حمیر سے تعلق رکھتے ہو ۔ “
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے اور وہ ضعیف ہے ، اُن کا استاد معروف بن سوید ہے ، میں نے کسی کو اُس کا ذکر کرتے ہوئے نہیں دیکھا ہے ۔

سیدنا جفشیش کندی رضی اللہ عنہ بیان کرتے ہیں : کندہ سے تعلق رکھنے والے کچھ لوگ نبی اکرم صلی اللہ علیہ وسلم کی خدمت میں حاضر ہوئے ، اُنہوں نے کہا: آپ ہمارے خاندان سے تعلق رکھتے ہیں ، انہوں نے یہ دعویٰ کیا ، تو نبی اکرم صلی اللہ علیہ وسلم نے ارشاد فرمایا : ہم اپنی ماں کی طرف نسب کی نسبت نہیں کرتے اور اپنے باپ کی نفی نہیں کرتے ہیں ، ہم نضر بن کنانہ کی اولاد میں سے ہیں ۔
یہ روایت امام طبرانی نے معجم کبیر اور معجم صغیر میں نقل کی ہے ، اس کی سند میں ایک راوی اسماعیل بن عمرو بجلی ہے ، جسے ابوحاتم اور دارقطنی نے ضعیف قرار دیا ہے ، جبکہ ابن حبان نے اسے ثقہ قرار دیا ہے ، اس روایت کے بقیہ رجال ثقہ ہیں ۔ ( علامہ ہیثمی کہتے ہیں : ) میں یہ کہتا ہوں : نسب ، وفات ، اسماء اور کنیت سے متعلق بہت کی روایات ” مناقب صحابہ “ سے متعلق باب کے آخر میں آگے آئیں گی ۔