مجمع الزوائد ومنبع الفوائد

سیدنا عبداللہ بن مسعود رضی اللہ عنہ فرماتے ہیں : ( اسلاف کی ) پیروی کرو اور بدعت اختیار نہ کرو ، تمہاری کفایت ہو چکی ہے ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

عمرو بن سلمہ بیان کرتے ہیں : ایک مرتبہ مغرب اور عشاء کے درمیان ہم لوگ سیدنا عبداللہ بن مسعود رضی اللہ عنہ کے دروازے پر بیٹھے ہوئے تھے ، اسی دوران سیدنا ابوموسیٰ اشعری رضی اللہ عنہ تشریف لے آئے ، انہوں نے فرمایا : اے ابوعبدالرحمن ! آپ ہمارے پاس باہر تشریف لے آئیں ، سیدنا عبداللہ بن مسعود رضی اللہ عنہ باہر آ گئے ، سیدنا ابوموسیٰ رضی اللہ عنہ نے کہا: آپ اس وقت کیوں آئے ہیں ؟ تو انہوں نے کہا: اللہ کی قسم میں نے ایک معاملہ دیکھا ، جس نے مجھے پریشان کر دیا وہ بات بھلائی کی ہے ، لیکن اس نے مجھے پریشان کر دیا ہے ، اگرچہ وہ بات بھلائی کی ہے ، کچھ لوگ ایک مسجد میں اکٹھے بیٹھے تھے ، ان میں سے ایک شخص یہ کہتا ہے : اتنی اتنی مرتبہ سبحان اللہ پڑھو ! اتنی اتنی مرتبہ الحمد للہ پڑھو ! راوی بیان کرتے ہیں : سیدنا عبداللہ بن مسعود رضی اللہ عنہ چل پڑے ، ان کے ساتھ ہم بھی روانہ ہو گئے ، سیدنا عبداللہ رضی اللہ عنہ ان لوگوں کے پاس تشریف لائے اور بولے : تم لوگ کتنی جلدی گمراہی کا شکار ہو گئے ہو ؟ حالانکہ اللہ کے رسول کے اصحاب ابھی زندہ ہیں ، آپ صلی اللہ علیہ وسلم کی ازواج موجود ہیں ، آپ صلی اللہ علیہ وسلم کے کپڑے اور برتن خراب نہیں ہوئے ہیں ، تم لوگ اپنی برائیاں شمار کرو ، میں اللہ تعالیٰ کی طرف سے یہ ضمانت دیتا ہوں کہ وہ تمہاری نیکیاں شمار کرے گا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی مجالد بن سعید ہے ، جسے امام نسائی رحمہ اللہ نے ثقہ قرار دیا ہے جبکہ امام بخاری رحمہ اللہ ، امام أحمد بن حنبل اور یحیی نے اسے ضعیف قرار دیا ہے ۔

ابوبختری بیان کرتے ہیں : سیدنا عبداللہ بن مسعود رضی اللہ عنہ کو یہ اطلاع ملی کہ کچھ لوگ مغرب اور عشاء کے درمیان بیٹھ کر ( ایک دوسرے کو ) یہ کہتے ہیں : تم یہ پڑھو ! تم یہ پڑھو ! سیدنا عبداللہ بن مسعود رضی اللہ عنہ نے فرمایا : جب وہ ایسا کرنے لگیں گے ، تو تم لوگ مجھے بتا دینا جب وہ لوگ بیٹھ گئے ، تو دوسرے لوگ سیدنا عبداللہ رضی اللہ عنہ کے پاس آئے ، سیدنا عبداللہ رضی اللہ عنہ ان لوگوں کے ساتھ روانہ ہوئے اور وہاں پہنچ کر بیٹھ گئے ، اُنہوں نے ٹوپی لی ہوئی تھی ( یعنی اپنا چہرہ چھپایا ہوا تھا ) جب اُن لوگوں نے اپنی تسبیح شروع کی ، تو سیدنا عبداللہ رضی اللہ عنہ نے سر سے ٹوپی ہٹائی اور بولے : میں عبداللہ بن مسعود ہوں ، تو وہ لوگ خاموش ہو گئے ، سیدنا عبداللہ رضی اللہ عنہ نے فرمایا : تم نے ظلم کے طور پر بدعت کا ارتکاب کیا ہے ، اگر ایسا نہ ہو ، تو تم ہم پر یعنی سیدنا محمد کے اصحاب پر فضیلت رکھتے ہو ؟ تو عمرو بن عتبہ بن فرقد نے کہا: اے ابن مسعود ! میں اللہ تعالیٰ سے مغفرت طلب کرتا ہوں ، اور اس کی بارگاہ میں توبہ کرتا ہوں ، سیدنا عبداللہ رضی اللہ عنہ نے ان لوگوں کو حکم دیا کہ وہ بکھر جائیں ۔ راوی بیان کرتے ہیں : سیدنا عبداللہ بن مسعود رضی اللہ عنہ نے کوفہ کی مسجد میں دو حلقے دیکھے ، تو وہ ان دونوں کے درمیان کھڑے ہوئے اور دریافت کیا : تم دونوں میں سے کون سا حلقہ پہلے بنا تھا ؟ ایک حلقے کے افراد نے کہا: ہم ( پہلے حلقہ بنا کر بیٹھ گئے تھے ) تو سیدنا عبداللہ بن مسعود رضی اللہ عنہ نے دوسرے حلقے والوں سے کہا: تم لوگ اُٹھ کر ان کے ساتھ مل جاؤ ! تو سیدنا عبداللہ بن مسعود رضی اللہ عنہ نے انہیں ایک ہی حلقہ بنا دیا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عطا بن سائب ہے ، وہ ثقہ ہے ، لیکن اختلاط کا شکار ہو گیا تھا ۔ امام طبرانی کے بعض مستند طرق میں یہ روایت اختصار کے ساتھ منقول ہے ( جس میں یہ الفاظ ہیں : ) سیدنا عبداللہ بن مسعود رضی اللہ عنہ سر ڈھانپ کر تشریف لائے ، پھر انہوں نے ارشاد فرمایا : جو شخص مجھے جانتا ہے ، وہ تو جانتا ہی ہے ، اور جو مجھے نہیں جانتا ، تو میں عبداللہ بن مسعود ہوں ، کیا تم لوگ سیدنا محمد صلی اللہ علیہ وسلم اور اُن کے اصحاب سے زیادہ ہدایت والے ہو ؟ یا پھر تم لوگ گمراہی کے گناہ کے ساتھ چمٹ گئے ہو ؟ عطاء بن سائب کی ایک روایت میں یہ الفاظ ہیں : پھر سیدنا عبداللہ بن مسعود رضی اللہ عنہ نے فرمایا : اگر تم قوم ( یعنی صحابہ کرام ) کی پیروی کرتے ، تو وہ تم سے بہت زیادہ اور واضح سبقت لے جا چکے ہیں ، اور اگر تم نے دائیں بائیں کا راستہ اختیار کیا ، تو تم بہت زیادہ گمراہی کا شکار ہو جاؤ گے ۔

مصعب بن سعد بیان کرتے ہیں : میرے والد ( سیدنا سعد بن ابی وقاص رضی اللہ عنہ ) جب مسجد میں نماز ادا کرتے تھے تو مختصر ادا کرتے تھے ، تاہم وہ رکوع و سجود مکمل کرتے تھے ، اور جب وہ گھر میں نماز ادا کرتے تھے ، تو رکوع سجود اور نماز طویل ادا کرتے تھے ، میں نے کہا: اے ابا جان ! جب آپ مسجد میں نماز ادا کرتے ہیں ، تو مختصر ادا کرتے ہیں ، اور جب آپ گھر میں نماز ادا کرتے ہیں تو طویل ادا کرتے ہیں ، انہوں نے فرمایا : اے میرے بیٹے ! بیشک ہم ( یعنی صحابہ کرام ) پیشوا ہیں اور ہماری پیروی کی جائے گی ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

خالد بن عرفطہ بیان کرتے ہیں : میں سیدنا عمر رضی اللہ عنہ کے پاس بیٹھا ہوا تھا ، ایک شخص ان کی خدمت میں حاضر ہوا ، جس کا تعلق عبدالقیس قبیلے سے تھا اور اُس کی رہائش گاہ ” سوس “ میں تھی ، سیدنا عمر رضی اللہ عنہ نے اس سے دریافت کیا : کیا تم فلاں بن فلاں عبدی ہو ؟ اُس نے جواب دیا : جی ہاں ! تو سیدنا عمر رضی اللہ عنہ نے اپنے پاس موجود عصا اُسے مارا ، اس شخص نے کہا: امیرالمؤمنین ! میرا کیا قصور ہے ؟ سیدنا عمر رضی اللہ عنہ نے اُس سے فرمایا : تم بیٹھ جاؤ ! وہ بیٹھ گیا ، سیدنا عمر رضی اللہ عنہ نے اس کے سامنے یہ آیات تلاوت کیں : الٓرٰ یہ واضح کتاب کی آیات ہیں ، بے شک ہم نے تم پر عربی میں قرآن نازل کیا ہے ، تاکہ تم سمجھ بوجھ حاصل کرو ، ہم تمہارے سامنے بہترین قصہ بیان کرنے لگے ہیں ، اس کے حوالے سے ، جو ہم نے تمہاری طرف یہ قرآن وحی کیا ہے ، اگرچہ اس سے پہلے تم غافل لوگوں میں سے ایک تھے “ سیدنا عمر رضی اللہ عنہ نے اس شخص کے سامنے ان آیات کو تین مرتبہ تلاوت کیا اور تینوں مرتبہ اُسے مارا ، اس نے دریافت کیا : امیرالمؤمنین میرا قصور کیا ہے ؟ سیدنا عمر رضی اللہ عنہ نے فرمایا : کیا تم ہی وہ شخص ہو ، جس نے سیدنا دانیال علیہ السلام کی کتابوں کا نسخہ نقل کیا تھا ؟ اس شخص نے کہا: آپ مجھے حکم دیں ، میں اُس کی پیروی کروں گا ، سیدنا عمر رضی اللہ عنہ نے فرمایا : تم جاؤ اور اس تحریر کو گرم پانی اور صاف روئی کے ذریعے مٹا دو ! اور پھر کبھی اسے نہ پڑھنا ، اور نہ ہی کسی کو پڑھانا ، اگر تمہارے بارے میں مجھے یہ اطلاع ملی کہ تم نے اُسے پڑھا ہے ، یا کسی کو پڑھایا ہے ، تو میں تمہیں سزا دوں گا ، پھر سیدنا عمر رضی اللہ عنہ نے اُس سے فرمایا : تم بیٹھ جاؤ ! وہ بیٹھ گیا ، تو سیدنا عمر رضی اللہ عنہ نے فرمایا : ” ایک مرتبہ میں گیا ، اور میں نے اہل کتاب کی کتاب میں سے کچھ حصہ نقل کیا ، ایک چمڑے پر اُسے نوٹ کر کے میں لے آیا ، نبی اکرم صلی اللہ علیہ وسلم نے مجھ سے دریافت کیا : اے عمر ! تمہارے ہاتھ میں کیا ہے ؟ میں نے عرض کی : یا رسول اللہ ! یہ ایک تحریر ہے جسے میں نے نقل کیا ہے ، تاکہ اس کے ذریعے سے پہلے موجود معلومات میں اضافہ ہو جائے ، تو نبی اکرم صلی اللہ علیہ وسلم غصے میں آ گئے ، یہاں تک کہ آپ کے رخسار سرخ ہو گئے ، پھر یہ اعلان کیا گیا : لوگ اکٹھے ہو جائیں ، انصار نے کہا: کیا تمہارے نبی غضبناک ہوئے ہیں ؟ ہتھیار سنبھالو ! ہتھیار سنبھالو ! وہ لوگ آئے اور نبی اکرم صلی اللہ علیہ وسلم کے منبر کے گرد اکٹھے ہو گئے ، نبی اکرم صلی اللہ علیہ وسلم نے فرمایا : ” اے لوگو ! بے شک مجھے جامع اور اختتامی کلمات عطا کیے گئے ہیں ، میرے لیے اختصار کیا گیا ہے اور میں تمہارے پاس صاف اور واضح ہدایت لے کر آیا ہوں ، تو تم لوگ موشگافی کرنے والے نہ ہو جانا اور موشگافی کرنے والے لوگ تمہیں غلط فہمی کا شکار نہ کریں ۔ “ سیدنا عمر رضی اللہ عنہ کہتے ہیں : میں نے یہ کہا: میں اللہ تعالیٰ کے پروردگار ہونے ، اسلام کے دین ہونے اور آپ صلی اللہ علیہ وسلم کے رسول ہونے سے راضی ہوں ، پھر نبی اکرم ( منبر سے ) نیچے تشریف لے آئے ۔
یہ روایت امام ابویعلیٰ نے نقل کی ہے ، اس کی سند میں ایک راوی عبدالرحمن بن اسحاق واسطی ہے ، جسے امام أحمد اور ایک جماعت نے ضعیف قرار دیا ہے ۔